<B CMGAYTRY>
<Q M3/4 IR SERM GAYTR>
<N SERM GAYTRYGE>
<A GAYTRYGE DAN JON>
<C M3/4>
<O 1350-1420>
<M 1420-1500>
<K NON-CONTEMP>
<D NO>
<V PROSE>
<T SERMON>
<G X>
<F X>
<W X>
<X MALE>
<Y X>
<H OTHER>
<U X>
<E X>
<J X>
<I X>
<Z INSTR REL>
<S SAMPLE X>


[^GAYTRYGE, DAN JON.
TEXT:  DAN JON GAYTRYGE'S SERMON.
RELIGIOUS PIECES IN PROSE AND VERSE.
EARLY ENGLISH TEXT SOCIETY, O.S. 26.
ED. G. G. PERRY.
NEW YORK, 1969 (1914).
PP. 1.1 - 15.4^]

<P 1>
[}I. DAN JOHN GAYTRYGE'S SERMON.}]

Here begynnes a Sermon +tat Dan Iohn Gaytryge made, +te
whilke teeches how scrifte es to be made, & whare-of, and in
scrifte how many thynge+g solde be consederide. (\Et est Petrus
sentenciarum discrecione prima`.\) 

   Als a grett Doctour schewes in his buke, of all +te
creatoures +tat Gode made in heuen and in erthe,
in water and in ayere, or in oghte elles, +te Souerayne
cause & +te skyll whi He mad +tam was His awen
gud will and His gudnes, Thurgh +te whilke gudnes,
alls He es all gude, He walde +tat some creatures of +tase +tat
He made ware communers of +tat blyse +tat euer-mare lastis.
And for +tat na creatoure myghte come to +tat blyse with-owtten
knaweyng of Godd, als +tat clerkes teches, He made
skillwyse creatours Angelle and man, of witt and wysdom to
knawe God Almyghtyn, and, thorowe +taire knawynge lufe
Hym and serue Hym, and so come to +tat blyse +tat +tay ware 
made to. This manere of knawynge had oure forme-fadyrs in
+te state of Innocence +tat +tay ware mad In; and so sulde we
hafe hade, if +tay had noghte synnede. Noghte so mekill als
hally saules hase now in heuen, Bot mekill mare +tan man
hase now in erthe. For oure fourme-fadyrs synned, sayse +te
prophete, and we bere +te wykkydnes of +taire mysdedis; For
+te knawyng +tat +tay had of Godd All-myghten, they had it of
Goddes gyfte at +taire begynnynge, with-owtten trauayle, or
tray, or passinge of tym. And all +te knaweyng +tat we hafe
in +tis werlde of Hym, es of heryng, and of lerynge, and of
techyng of o+ter, of +te law and +te lare +tat langes till Haly
<P 2>
Kyrke, +te whilke all creatours +tat lufes God Almyghten awe
to knawe and to cun, and lede +taire lyfe aftir, and swa come
to +tat blysse +tat neuer mare blynnes.
   And for-thi +tat mekill folke now in +tis werlde ne ere      #
noghte 
wele ynoghe lerede to knawe God Almyghty, ne lufe Hym ne
serue Hym als +tay sulde do, and als +taire dedys oftesythes
opynly schewes, in gret perell to +tam, to lyfe and to saule;
and perawnter +te defaute may be in thaym +tat hase +tair       #
saules
for to kepe, and thaym sulde teche, - als prelates and persons,
vicars and prestes, +tat ere halden by dett for to lere +tam - 
For-thi our Fadir +te byschope +tat God Almyghty saue, +tat,
als Sayn Paule sayse in his pystill, will +tat all men be safe,
and knawe God Almyghten, and namely +tase vndirlowttes +tat
till hym langes, hase tretide and Ordeyned for +te comon
profett, thorowe +te councell of his clergy, +tat ilkane +tat
vndir hym hase cure of saule, Opynly, one ynglysche, apon
sonnondayes, preche and teche +taym +tat +tay hase cure off,
+te lawe and +te lare to knawe God Almyghty, +tat principally   #
may
be schewede in theis sexe thynges - In +te fourtene poyntes
+tat falles to +te trowthe, In +te ten commandementes +tat
Gode hase gyfen vs, In +te Seuen Sacramentes +tat er in 
Haly Kyrke, In +te Seuen werkes of mercy vntill oure euen
crystyn, In +te seuen vertus +tat ilke man sall vse, And
in +te Seuen dedly Synnes +tat ilke man sall refuse. And he
byddes and commandes in all +tat he may, +tat all +tat hase
cure or kepynge vndir hym Enioyne +tair parischennes and +tair 
sugettes +tat +tay here and lere +tise ilke sex thynges, and
oftesythes reherse +tam till +tat +tay cun +tam, and sythen
teche +tam +tair childir, if +tay any haue, whate tym so +tay
are of elde to lere +tam. And +tat persouns and vycars and
all parische prestis, Enquere delygently of +tair sugettes In
+te lentyn tym, when +tay come to scryfte, whe+ter +tay knawe
and cun +tise sex thynges; and if it be funden +tat +tay cun
+tam noghte, +tat +tay Enjoyne +tam appon his behalfe, and
Of payne of penance, for to cun +tam. And for-thi +tat nane
sall excuse thaym thurghe vnknawlechynge for to cun +tam,
<P 3>
our haly Fadir +te beschope, of his gudnes, hase ordaynede
and bedyn +tat +tay be schewede opynly one ynglysche amanges
+te folke.
   Whare-fore, anence +te fyrste of +tise sex thynges +tat es   #
to
knawe, +te articles +tat falles to +te trouthe, - als gret      #
clerkes
teches and schewes in thaire bukes, - Thare Falles to +te       #
faythe
fourtene poyntes; Of +te whilke seuen Falles to Goddes          #
Goddhede,
and o+ter seuen Falles to Cristes manehede. The firste
poynte +tat we sall trowe of +te Godhede, Es to trow            #
stedfastely
In a trewe Godd, and +tat na no+ter es for to trowe In. The 
to+ter es, +tat +te heghe Fadir of heuen es stedfaste and       #
sothefaste
Godd Almyghtyn. The thirde es, +tat Ihesu Criste, Goddes
Sone of heuen, es sothefastely Gode, euen till His Fadir. The
ferthe es, +tat +te Haly Gaste, +tat samenly commes of bathe    #
+te
Fadir and +te Sonne, es sothefaste Godde, euen to +taym bathe;
and +te whethir noghte twa Goddes, +te Fadir and +te Sonne, ne
thre Goddes, +te Fadir and +te Sonne & +te Haly Gaste, Bot thre
sere persouns, and noghte bot a Godd. The fyfte arctecle es,
+tat +te Trynyte, +te Fadir and +te Sonne and +te Haly Gaste,
thre persouns and a Godd, es makere of heuen and erthe and
of all thynges. The Sexte artycle es, +tat Haly Kirke, oure
modire, es hallyly ane thorow-owte +te werlde, that es,         #
comonynge
and felawrede of all cristen folke +tat comouns to-gedir in +te
sacramentes, and in o+ter haly thynges +tat falles till Haly    #
Kyrke,
with-owtten +te whilke ne es na saule hele. The Seuend
article +tat vs awe to trowe es, vppe-rysynge of flesche, and   #
life
with-owtten Ende. For when +te dede hase sundyrde oure
bodyes and oure saules for a certayne tym, als oure kynd askes,
vnto when +tat God sall deme +te qwykke and +te dede, Thane
oure saules sall turne agayne till oure bodyes, and we +tase    #
ilke
(and nane o+ter +tan we are nowe), sothefastely sall ryse vp in
body and saule, +tat neuer mare sall sundire, fra +tat tym      #
furthe,
bot Samen (if we wele doo whiles we er here) wende with Godd
to +tat blysse +tat euer-mare lastes. And if we euyll do, till
Endles payne.
<P 4>
   Thir are o+ter seuen poyntes of Cristes Manhede +tat are
nedfull to trowe, till all +tat are crystyn. The fyrste es,     #
+tat
Ihesu Criste, Goddes Sone of heuen, was sothefastely conceyuede
of +te maden Marie, and tuke flesche and blude, and become
man thurghe +te myghte and +te strenghe of +te Haly Gaste,      #
with-owtten
any merryng of hir modirhede, with-owtten any mynynge
of hir maydenhede. The to+ter artecle es, +tat we sall trowe
+tat He, Godd and man bathe in a persoune, was sothefastely of
+tat blessyde mayden, Godd getyn of His Fadire be-fore any
tyme, and man, born of His modir, and broghte furthe in tyme.
The thirde poynte +tat we sall trowe es, Cristes Passione
that He tholede bodyly for synfull man-kynde, How He was
betraysede with His disciple, and taken with +te Iewes, beten
with scourges, +tat na skynn helde, naylede one +te rude, and
corounde with thornes, and many o+ter harde paynes, and dyede
at +te laste. The ferthe artecle es, +tat whene He was dede,
and His body tane doun, and wonden and doluen, +git +te whills
His body lay in +te graue, +te gaste with +te Godhede wente     #
vnto
Helle, and heryede it, and tuke owte +tase +tat ware +tare-in,  #
als
Adam and Eue and o+ter Forme-fadyrs whilke He in His forluke
walde +tat ware sauede. The fyfte poynte es, +tat one +te
thirde day after +tat He dyede, He rase fra dede to lyfe,
Sothefaste Godd and man in body and in saule. For als He
dyede in seknes of oure manhede, So He rase thurghe strenghe
of His Godhede, and swa dystroyed oure dede thurgh His
diynge, and quykkynd vs vnto lyfe thurghe His rysesynge.
The sexte artecle es, +tat we sall trowe +tat one +te fourtede
day eftyr +tat He rase, Thurgh strenghe of Hym-selfe, He steye
in-till Heuen, whare oure kynde es nowe in His blyssyde
personne, noghte anely euynne ne mete till His angells, Bot hey
coround kynge abowne all His angells, +tat be-fore tym was
lesse +tan +te kynde of angells. The seuend article es, +tat
righte als He dyede, and eftirwarde rase, and stey in-till
heuen, Righte swa sall He come apon +te laste day, Bathe
for to deme +te qwykke and +te dede, whare all +te folke +tat
euer was, or es, or sall be, sall sothefastely be schewede and
<P 5>
sene be-fore Hym, and ilke a man answere of his awen dedis,
and be saued or dampnede whe+ter so he serues; For, als His
ryghtwysenes now es mengede with mercy, swa sall it thane be
with-owtten mercy.

[} (\SECUNDO.\) }]
[} (\DECEM PRECEPTA DEI.\) }]
[}THE TEN COMMANDEMENTIS.}]
   
   +Te secund thyng of +te Sex to knawe God Almyghten es,
+te ten Commandmentes +tat He hase gyffen vs. Of +te
whilke ten, +te thre +tat ere firste, awe vs hallyly to halde
anence oure Godd, and +te Seuen +tat ere eftyre, anence
oure euen cristen. The firste comandement charges vs, and
teches vs, +tat we leue ne lowte na false goddes. And in +tis
commandement es forboden vs alkyn mysbyleues and all
mawmetryes, all false enchauntementes, and all soceryes, all
false charmes, and all wichecraftes, +tat men of myssebyleue
traystes appon, or hopes any helpe In, with-owtten God
Almyghten. The to+ter commandement byddes vs noghte
take in ydillchipe, ne in vayne, +te name of oure Lorde Godd, 
so +tat we trowe noghte in His name bot +tat es sothefaste,     #
+tat
we swere noghte by His name bot it be byhouely, and +tat we
neuen noghte His name bot wirchipfully. The thirde
commandement es, +tat we halde and halowe oure haly day,
+te Sonondaye, and all o+ter +tat falles to +te +gere, +tat er  #
ordeynede
to halowe thurgh Haly Kyrke. In +te whilke dayes all folke,
bathe lerede and lawede, awe to gyffe +tam gudly to Goddes
seruyce, to here and say it efter +taire state es, in wirchipe  #
of
Godd All-myghty and of His gud halowes, noghte +tan for to
tente to tary with +te werlde, ne lyffe in lykynge ne luste,    #
+tat
+te flesche +gernes, Bot gudly to serue Godd in clennes of      #
lyfe.
The ferthe commandement byddes vs doo wyrchipe to Fadire
and to modire, noghte anely to fleschely fadyr and modire, +tat
getes vs and fosters vs furthe in +te werlde, bot till oure     #
gastely
Fadire +tat hase heuede of vs, and teches vs to lyffe till      #
hele of
<P 6>
oure saules, and till oure gastely modyr, +tat es, Haly Kyrke,
to be bouxome +tare-to, and saue +te ryghte of it, For it es
modir till all +tat cristenly lyffes, and alswa till ilke man   #
+tat
wyrchipfull es, for to do wyrchipe eftere +tat it es. The fyfte
comandement byddes vs +tat we sla na man, +tat es to say,
bodyly ne gastely no+ter; For als many we sla, in +tat at we
may, als we sclaundire or bakbyte or falsely deffames, or       #
fandes
for to confounde +taym +tat noghte serues, or withdrawes        #
lyfelade
fra +tam +tat hase nede, if we be of hauynge for to helpe +tam.
The sexte commandment forbeddes us to syn or for to foly
fleschely with any woman, ow+ter sybbe or fremmede, wedde or
vnwedde, or any fleschely knawynge or dede haue with any,
o+ter +tan +te Sacrament of matremoyne excuse+g, and +te lawe   #
and
+te lare of Haly Kyrke teches. The seuend byddis vs +tat
we sall noghte stele: In whilke es forboden vs robbyng and
reuyng, and all wrangwyse takynge or with-haldynge, or
hydynge or helelynge of o+ter menes gudes, agaynes +taire witt
and +taire will +tat hase ryghte to +taym. The aughten
commandement byddes vs +tat we sall bere no false wytnes
agaynes oure euen cristen: In +te whilke es forboden vs all
manere of lesynges, False consperacye and false swerynge,
whare-thurghe oure euen cristyn may lese +tayre catell, Faith,
Fauour or Fame, or anything ells, whe+ter it be in gastely or   #
in
bodyly gudes. The nyende commandement es, +tat we +gerne 
noghte oure neghtboure house: In whilke es forboden all 
wrangwyse couetyse of land or of lythe, or of oghte elles +tat
may noghte be lyftede ne raysede fra +te grounde, als thynge
+tat es stedfaste, and may noghte be styrrede. The tend
commandement an +te laste es, +tat we +gerne noghte +te wyefe
of oure neghteboure ne of oure euyn cristen, ne his mayden, ne
his knaue, ne his oxe, ne his asse: In +te whilke es forboden
vs to +gerne or to take any thynge +tat may be styrride of      #
o+ter
mens gudes, als robes or reches or o+ter catell, +tat we hafe   #
na
gude titill ne na ryghte to; For what thyng so we take or
getes one o+ter wyse +tan +te lawe and +te lare of Haly Kyrke
teches, we may noghte be assoylede of +te trespase bot if we
<P 7>
make assethe, in +tat +tat we may, to +tam +tat we harmede with
haldande +taire gude. And in case +tat we hafe thurghe false
athes, als in assises or o+ter enquestes, wetandly or willfully
gerte oure euen cristyn lesse +taire patremoyne or +taire       #
heritage,
or falsely be dyssessede of lande or of lythe, or false         #
deuorce be
made, or any man dampnede, +tofe all we do +tat we may to +te
party, +git may we noghte be assoylede of +te trespas, bot of 
oure beschoppe, or of hym +tat hase his powere, For swylke caas
es ryuely reseruede till hym seluen. Thise ten commandemente+g 
+tat I hafe now rekkenede er vmbylowkede in twa of
+te gospelle. The tane es, +tat we luffe Godd ouer all thynges;
The to+ter es, +tat we lufe oure euen cristen hallely in oure 
herte als we do oure seluen; For Godd awe vs to lufe hally
with herte, with all oure myghte, with all oure thoghte, with
worde and with dede. Oure euyn crysten, als-swa awe vs to
lufe vn-to +tat ilke gude +tat we lufe oure-selfe, +tat es,     #
+tat +tay
wele fare in body and in saule, and come to +tat ilke blysse    #
+tat
we thynke to; and whate-so-euer +tat he bee, +tat +tise twa     #
wele
+gemes, all +te ten commandementes forsothe he fulfilles.

[} (\TERTIO.\) }]
[} (\SEPTEM SUNT SACRAMENTA ECCLESIE.\) }]
[}THE SEUENE SACRAMENTES OF HALY KYRKE.}]

   +Te thirde thynge of +te Sex +tat I firste touchide, es +te
Seuen Sacramentes +tat Haly Kirke gyffes, thurghe
prelates and o+ter prestes +tat hase +te powere. Of 
whilke seuen, the first fyve ilke cristen man awe
lawefully to take efter his elde es; and twa lyes in +taire     #
will
+tat ressayues +taym. The firste sacrament of seuen es oure
'baptym,' +tat we take +te firste tym +tat we be-com cristyn.   #
In
whilke, bathe +te firste synn +tat we ere borne with, and alkyn
o+ter synnes, ere waschen awaye, +tat we ere fylede with are we
take it; and +te trouthe of Haly Kyrke es taken +tare-in,       #
with-owtten 
whilke na synfull mans saule may be sauede. And till
+tis sacrament Falles foure thynges, if it sall ryghtely be     #
tane
als Haly Kirke teches. Ane es, ryghte sayeyng and carpyng
<P 8>
of +te wordes +tat hym awe for to say +tat gyffes +tis          #
sacrament, 
+tat ere +tise: - 'I Baptise +te in +te name of +te Fadir and   #
+te 
Sonne and +te Haly Gaste.' Ane o+ter es, +tat it be done anely
in watire, For na no+ter licoure es lefulle +tare-fore. +Te     #
thirde
es, +tat he +tat gyffes +tis sacrement be in witt and in will   #
for to 
gyffe it. And +te ferthe es, +tat he +tat takes it be, no+ter   #
of
lerede nor of lewde, Baptisede be-fore; For if +te preste be    #
in 
were of hym +tat sall take it, whethire he be baptisede or he   #
be
noghte, +tan sall he say +te wordes one +tis wyese, 'If +tou be
noghte baptisede, I baptise +te in +te name of +te Fadire and   #
+te
Sone and +te haly Gaste.' The secunde sacrament es              #
'confermynge,'
+tat +te byschope gyffes to +tam +tat ere baptisede,
+tat gyffes thorowe his powere to +tam +tat takes it +te grace
and +te gyfte of +te Haly Gaste, to make +taym mare             #
stalleworthe
+tan +tay ware be-fore, to stande agaynes +te fende and dedly
syn; +tat nane hase powere to do bot +te byschope allane, +tat
hase the state and +te stede of Cristes Appostilles. The
thirde sacrament es callede 'penance,' +tat es, sothefaste      #
for-thynkynge
+tat we hafe of oure syn, with-owtten will or 
thoghte to turne agayne to it. And +tis sacrament must haue
thre thynges: - Ane es, sorowe in oure herte +tat we hafe       #
synnede.
Ano+ter es, opyn scrifte of mouthe, how we hafe synnede.
The [{third es, satisfaccion, +tat we maun do for oure syn{] .
+Tise thre, with gud will to forsake oure syn, clense+g vs
and wasches vs of alkyn syn. The ferthe es, '+te Sacrament
of +te Autyr,' Cristes awen body in lyknes of brede, als hale   #
als
He tuke it of +te blysside mayden, the whilke, ilke man and
woman +tat of elde es, awe for to rescheyue anes in +te +gere,  #
+tat
es at say, at +te pasch, als Haly Kyrke vses, when +tay ere
clensede of syn thurghe penance, O payne of doynge owte of
Haly Kyrke, bot if +tay forbere it by skillwyse cause, +tat awe
to be knawen to +tam +tat sall gyffe it; For he +tat tase it 
worthily, tase his saluacyone; and wha-so takes it vnworthily,
<P 9>
tase his dampnacione. The fyfte sacrament es '+te laste         #
Enoyntynge
with oyle,' +tat es halowede and handelyde of prestes; +te
whilke sacrament awe anely to be gyffen to +tam +tat he wate
ere of skillwyse elde, and +tat he sese sekyrly in perelle of
dede, in lyghtenes and alegeance of +taire sekenes, if Godde
will +tat +tay turne agayne to +te hele, and als in forgyffnes  #
of 
venial synnes, and in lessynge of payne if +tay passe he+ten.
The Sexte sacrament of Haly Kyrke es 'ordire,' +tat gyffes
powere to +tam +tat ryghtwysly tase it, For to serue in Haly
Kirke efter +taire state es, and to +tam +tat takes +te ordyre  #
of
preste, for to synge messe, aand for to mynystre +te            #
Sacramentes 
of Haly Kyrke, +tat to +tam fallys, Eftyr +te state +tat +tay   #
hafe,
and +taire degre askes. The seuend Sacrament es 'Matrymoyne,'
+tat es, lawefull festynnynge be-twyx man and woman
at +taire bathere assente, for to lyffe samen with-owtten any
lowssynge, whills +taire lyfe lastes, in remedy of syn and      #
getynge
of grace, if it be tane in gude Entente and clennes of lyfe.

[}THE FERTHE THYNG OF +TE SEX.}]
[}THESE BE +TE SEUENE WERKES OF MERCY BODYLY.}]

   +Te ferthe thynge of +te Sex to knawe Godd Almyghty, +tat
vs byhoues fulfill in all +tat we maye, ere +te seuen
dedis of mercy vntill oure euen cristen, +tat Godd
sall reherse vs apon +te dredfull day of dome, and wiet
howe we haue done +tam here in +tis lyfe, als sayne Mathewe
makes mynde in his gospelle. Of whilke, +te firste es, to
fede +taym +tat er hunngry. The to+ter es, to gyffe +taym
drynke +tat er thristy. The thyrde es, for to clethe +tam +tat
er clatheles or nakede. The ferthe es, for to herber +tam +tat
er houseles. The fyfte es, for to vesete +tam +tat lyes in
sekenes. The Sexte es, for to helpe +tam +tat lyes or er in
presoun. The Seuend es, to bery dede men +tat hase myster.
+Tise ere the Seuen bodyly dedis of mercy +tat ilke man awe
to doo +tat es myghtty. +Tar are of mercy alswa Seuen gastely
dedis +tat vs awe to doo till +tam +tat hase nede till vs. Ane
es, to consaile and wysse +tam +tat are wyll. Ano+ter es, to
<P 10>
chasty +tam +tat wyrkkys ill. +Te thyrd es, to solauce thaym
+tat er sorowefull, and comforthe thaym. The ferthe es, to 
pray for thaym +tat ere synfull. +Te fyfte es, to be thole-mode
when men mysdose vs. +Te Sexte es, Gladly to forgyffe when
men haues greuede vs. The seuend, when men askes vs for 
to lere thaym, if we cun mare +tan +tay, for to lere thaym.
+Tise vn-till oure neghtebours ere full nedfull, and to +tam    #
+tat 
duse thaym wondir medefull; For he sall Mercy +tat Mercyfull
es; and man with-owtten Mercy, of Mercy sall mysse.

(\vij. opera misericordie corporalia:,: vnde versus: - 
Vestio, cibo, poto, redimo, tego, colligo, condo.\)
(\vij. opera misericordie spiritualia: - 
Consule, castiga, solare, remitte, fer, ora,
Instrue, si poteris, sic Christo carus haberis.\)

[}THE FIFTE THYNG OF +TE SEX.}]
[}THE SEUENE GASTELY VERTUS.}]

   +Te fyfte thynge of +te Sex to knawe God Almyghten, are
+te Seuen vertus +tat Haly Writte teches. Of whilke
seuen, +te thre first +tat are hede thewes, teches vs how
to hafe vs vn-to God Almyghtty; and +te foure teches
vs swa for to lyffe +tat it be bathe lykande to Godd and to     #
man.
+Te firste vertu es 'trouthe,' wharethurghe we trow anely in 
Godd +tat made all thynges, with all +te o+ter vertus I         #
touchede
be-fore. And +tis es nedfull till all +tat cristenly lyffes;    #
For
trouthe es begynnynge of all gude dedis; For no+ter es trouthe
worthe with-owtten gud werk, ne na werke with-owtten trouthe
may pay Godd Almyghtty. +Te to+ter gude thewe or vertue
es 'hope,' +tat es, a sekyr habydynge of gastely gude, thurghe
Goddes gudnes and oure gude dedis, for to com to +tat blysse
+tat neuer mare blynnes, Noghte anely in trayste of Goddes
gudnes, ne allanly in trayste of oure gude dedis, Bot in        #
trayste
of thaym bathe when +tay are bathe Sammen; For no+ter sall
we fall sa ferre in-till whanhope +tat we ne sall traiste to    #
hafe
<P 11>
+tat blysse if we wele do; Ne we sall noghte com so ferre in-to
ouerhope for to trayste so mekill in Goddes gudnes +tat we sall
hope to haue +tat blysse with-owtten gude dedys. +Te thirde
vertue or thewe es 'charyte,' +te whylke es a dere lufe +tat vs
awe vn-till Godd Almyghtty als for Hym selfe, and till oure
euencristen for God Almyghttyn; For +te tane may noghte
be lufede with-owtten +te to+ter, als Sayn Iohn +te gospellere
sayse in his pystill. '+Tat commandement,' he saise, 'hafe we
of Godd +tat wha-sa-euer lufes Gode, lufes his euencristyn.
For he +tat lufes noghte his bro+ter wham he may see, how sulde
he lufe God wham he sese noghte?' +Te ferthe vertue or 
thewe es 'ryghtwysenes,' +tat es, to +gelde to all men +tat we  #
awe
+tam, For to do to ilke a man +tat vs awe to doo, for to        #
wirchipe
tham +tat ere worthy, For to helpe +te pure +tat er nedy, to do
no gyle ne wrange vn-to na man, Bor for to do +tat skill es
vntill ilke mane. +Te fyfte vertue or thewe es 'sleghte or
sleghenes,' +tat wysses vs to be-warre with wathes of +te       #
werlde;
For it kennes vs to knawe +te gud and +te ill, and alswa to
sundire +te tane fra +te to+ter, and for to leue +tat es        #
euyll, and
take to +te gude, and of twa gud thynges for to chese +te       #
better.
+Te Sexte vertue es 'strenghe or stalworthnes,' noghte anely
of body, bot of herte and will, euynly to suffire +te wele and  #
+te
waa, welthe or wandreth, whethire so betyde, and +tat oure      #
herte
be noghte to hye for na wele-fare, ne ouermekill vndire for     #
nane
euyll fare, Bot styffely for to stande agaynes oure faas,       #
whethir
+tay be bodyly or +tay be gastely, swa +tat na fulle fandynge
make vs to falle ne be false in oure faythe agaynes God         #
Almyghtty.
+Te Seuend vertue and +te laste es, 'methe or methefulnes,' 
+tat kepes vs fra owterage and haldes vs in euenhede,
lettes fulle lykynge and luste of +te flesche, and +gemes vs    #
fra
+gernynges of werldly gudes, and kepes in clennes of body and
of saule. For methe es mesure and mett of all +tat we do, if 
we lyffe skillwysly als +te lawe teches.

<P 12>
[}THE SEXTE THYNG AND +TE LASTE.}]

   +Te sexte thynge, and +te laste of +tase I firste towchede   #
es,
+te Seuen heuede or dedly synnes +tat ilke a man and
woman awe for to knawe to flee and forhewe, For
folkes may noghte flee +tam bot +tay knawe thaym.
Pride an Enuye, Wreth and Glotonye, Couetyse
and Slouthe, and Lecherye. And for-+ti er +tay callede
Seuen heuede Synnes, for +tat all o+ter commes of thaym; and
for-+ti er +tay callede dedely synnes, for +tay gastely slaa    #
ilke
manes & womanes saule +tat es haunkede in alle or in any of
thaym. Whare-fore +te wyese man byddes in his buke 'als fra
+te face of +te neddyre, fande to flee syn.' For als +te venym  #
of
+te neddire slaas manes body, Swa +te venym of syn slaas manes
saule. The firste of +tise Seuen synnes es callede 'Pryde,'     #
+tat
es, a lykande heghenees of a manes herte, Of offyce or of heghe
state, or o+ter noblaye +tat he ou+ter haues of kynde or of     #
grace,
or he hopes +tat he haues mare +tan anothire. And of +tis       #
wikkede
synn commes some sere spyces: Boste and auauntynge and
vn-bouxsomnes, despite, and ypocrisy and vnhamlynes, and o+ter
+tat ofte ere sene amanges prowde men. The secunde dedely
synn es hatten 'Enuy,' +tat es, a sorowe and a syte of +te
wele-fare, and a ioy of +te euyll fare, of oure euencristen: Of
whilke synn, many spyces sprenges and spredes. Ane es,
hateredyn to speke or here oghte be spoken, +tat may sown
vn-to gude to +taym +tat +tay hate. Ane-o+ter, false juggynge   #
or
dome of +taire dedis, and ay turne vn-to euyll +tat es done to
gude. +Te thirde es 'bakbyttynge,' to saye be-hynde +tam, +tat
we will noghte avowe ne saye be-fore +tam; whare noghte
anely he +tat spekes +te euyll, bot he +tat heres it be         #
spoken, es
for to blame; For, ware +tare na herere, +tare ware na          #
bakbyttere.
+Te thirde dedly synn or heuede syn es 'wrethe,' +tat es, a 
wykkede stirrynge or bollenynge of herte, whare-fore a man
wilnes for to wreke hym, or wykkydly to venge hym, appon his
euyncristyn. And of +tis wykkede syn commes stryvynge and
<P 13>
flytynge, with many false athes and many foule wordes,          #
Sclaundere,
for to for-do a man's gude fame, Feghtynge and Felony, and
ofte manes-slaughtere, and many ma +tat nowe es [{na{] nede for
to be neuenede. +Te fferthe dedly synn men calles 'glotonye,'
+tat es, ane vnskilwyse lykynge of lufe in taste or in takynge
of mete or of drynke. And +tise trespas men duse apponne sere
wyse: - Ane es, ou+ter ouer arely or ouer late, or ouer         #
oftesythe,
for to ete or drynke bot if nede gere it. Ane o+ter es, for to  #
lyffe
ouer delycately. +Te thirde es, for to ete or drynke ouer       #
mekyll.
+Te ferthe es, ouer hastely to ete or to drynke. +Te fifte es,  #
to
compas & caste appon whate wyese we may gette dylicious metis
or drynkes to fulfill +te lykynges and +te lustes of +te        #
flesch o+ter
+tan we may gudly lede oure lyffe with, (\Secundum versum,
Prepropere, laute, nimis ardenter, studiose\) .
+Te fyfte dedly syn es callede 'Couetyse,' +tat es, a wrangwyse
wilnynge or +gernynge to haue any maner of gude vs awe noghte.
And +tis es donne pryncypally appon twyn wyese. Ane es,
wrangwysely to get any thynge +tat oure likynge or oure lufe 
lyghtes apon, als be Sacrelege or by symony, falsehede or okyr,
or o+ter gelery, whilke +tise worldely men er wounte for to vse
+tat castes +taire conaundenes swa vn-to couetyse +tat +tay ne
rekke whe+ter it be with ryghte or with wrange, bot +tat +tay
may gette +tat at +taire herte +gernes. Ano+ter es, wrangwisely
to halde +tat at es getyn, +tat es, when we will noghte do to
Godd Almyghten ne till Haly Kyrke, ne till oure euencristyn, 
+tat vs awe for to do by dett and by lawe, bot anely
haldes +tat we hafe for ese of oure selfen, whare noghte anely 
he +tat wrangwysly getes, bot he +tat wrangwysely haldes,       #
falles 
in +te synn. +Te sexte dedly synn es 'slewthe or slawenes,'
+tat es, a hertly angere or anoye till vs of any gastely gud    #
+tat
we sall do. And of +tis wikkede synn comes sere spyces: -  
Ane es, latesommes or lyte to drawe apon lenghte or to lache
<P 14>
any gude dedis +tat we sall do +tat may turne vs till helpe or
hele of oure saules. Ano+ter es, a 'dullnes or heuenes of       #
herte'
+tat lettes vs for to lufe oure Lorde God Almyghten, or any
lykynge to hafe in His seruyse. +Te thirde es, 'ydillchipe,'    #
+tat
ouer mekyll es hauntede, +tat makes lathe to begynn any gude
dedis, and lyghtly dose vs to leue when oghte es begun, and
+tare whare we ere kyndely borne for to swynke, als +te feule   #
es
kyndely brede for to flie, It haldes vs euermare in ese agayne
oure kynde, For Idillnes es Enemy to cristen man saule,
stepmodire and stamerynge agaynes gude thewes, and              #
witter-wyssynge
and waye till alkyn vices. +Te Seuend dedely syn
es hatten 'lychery,' +tat es, a foule lykynge or luste of +te
flesche. And of +tis foule syn comes many sere spyces: - Ane
es 'Fornycacyone,' a fleschely synn be-twyxe ane anlypy man
and ane anlypy woman: and for-thi +tat it [{es{] agaynes +te
lawe, & +te leue and +te lare +tat Haly Kirke haldes, it is     #
dedly
syn to +taym +tat it duse. Ano+ter es 'Avowtry,' and +tat es
spousebreke, whe+ter it be bodyly or it be gastely, +tat        #
greuosere
and gretter es +tan +te to+ter. +Te thirde es 'Incest,' +tat    #
es, when
a man synnes fleschely with any of his sybb frendes, or any
o+ter +tat es of his affynyte gastely or bodyly, whe+ter so it  #
be.
O+ter spyces many sprynges of +tis syn +tat ouer mekill es
knawen and kende in +tis werlde with +taym +tat ledes +taire
lyfe als +taire flesche +gernes.
   +Tise are +te sex thynges +tat I hafe spoken off, +tat +te
lawe of Haly Kirke lyes maste in; The whilke we er
halden to knawe and to cun, if we sall knawe God
Almyghty, and come till His blysse. And for to gyffe
+gow better wyll for to cun thaym, Oure ffadir +te beschope
grauntes of his grace Fourty dayes of pardoun till all 
+tat cunnes thaym, and ratyfyes alswa +tat o+ter men gyffes,
Swa mekill coueites he +te hele of +gour saules. For +gife +ge
conandely knawe +tise Sex thynges, thurgh thaym sall +ge cun
knawe Godd Almyghty, whaym, als Sayne Iohn sayse in his
gospelle, cunnandely for to knawe swylke als He es, It es       #
endles
lyfe and lastande blysse. To +te whilke blysse He brynge vs,
<P 15>
oure Lorde Gode Almyghty! Amen! Amen! Amen! (\Per 
Dominum nostrum Iesum Christum, qui cum Deo patre et
Spiritu Sancto viuit et regnat omnipotens deus in secula 
seculorum.\) Amen! Amen! Amen!



