<B CMHAVELO>
<Q M2 NI ROM HAVEL>
<N HAVELOK>
<A X>
<C M2>
<O 1250-1350>
<M 1250-1350>
<K CONTEMP>
<D EMO>
<V VERSE>
<T ROMANCE>
<G X>
<F X>
<W WRITTEN>
<X X>
<Y X>
<H X>
<U X>
<E X>
<J X>
<I X>
<Z NARR IMAG>
<S SAMPLE X>


[^HAVELOK.
ED. G. V. SMITHERS.
OXFORD: CLARENDON PRESS, 1987.
PP. 19.545  - 31.949      (SAMPLE 1)
PP. 35.1118 - 41.1353     (SAMPLE 2)
PP. 46.1715 - 58.2120     (SAMPLE 3)
PP. 63.2291 - 78.2856     (SAMPLE 4)^]

<S SAMPLE 1>
<P 19>
   Hwan Grim him hauede faste bounden,
And si+ten in an eld cloth wnden, 
[\THE FOLLOWING LINE SUPPLIED FROM CAMBRIDGE FRAGMENTS\]
He +triste in his muth wel faste
A keuel of clutes ful unwraste,
+Tat he mouthe speke ne fnaste
Hwere he wolde him bere or lede.
Hwan he hauede don +tat dede,
Hwan +te swike him hauede he+tede
+Tat he shulde him forth [{lede{]
And him drinchen in +te se - 
+Tat forwarde makeden he -
Jn a poke ful and blac
Sone he caste him on his bac,
Ant bar him hom to hise cleue,
And bitaucte him dame Leue,
<P 20>
And seyde 'Wite +tou +tis knaue,
Al so thou [{wilt{] mi lif haue [{saue{] !
J shal dreinchen him in +te se:
For him shole we ben maked fre,
Gold hauen ynou and o+ter fe -
+Tat hauet mi louerd bihoten me.'

   Hwan dame [{Leue{] herde +tat,
Vp she stirte and nouth ne sat,
And caste +te knaue so harde adoun
+Tat he crakede +ter his croune
Ageyn a gret ston +ter it lay.
+To Hauelok micte sei 'Weilawei
+Tat euere was I kinges bern - 
+Tat him ne hauede grip or ern,
Leoun or wlf, wluine or bere,
Or o+ter best +tat wolde him dere!'
So lay +tat child to middel-nicth,
+Tat Grim bad Leue bringen lict
For to don on his clo+tes:
'Ne thenkeste nowt of mine o+tes
+Tat Ich haue mi louerd sworen?
Ne wile I nouth be forloren:
J shal beren him to +te se -
+Tou wost +tat [{bi{]houes me -
And I shal drenchen him +ter-inne.
Ris up swi+te an go +tu binne,
And blou +te fir and lith a kandel.'
Als she shulde hise clo+tes handel
On for to don, and blawe +te fir,
She saw +ter-inne a lith ful shir,
Al so brith so it were day,
Aboute +te knaue +ter he lay.
Of hise mouth it stod a stem
Als it were a sunne-bem;
Al so lith was it +ter-inne
So +ter brenden cerges inne.
<P 21>
'Jesu Crist!' wat dame Leue,
'Hwat is +tat lith in vre cleue?
[{Ris{] up, Grim, and loke wat it menes!
Hwat is +te lith, as +tou wenes?'
He stirten bo+te up to +te knaue 
(For man shal god wille haue),
Vnkeueleden him and swi+te unbounden,
And sone anon [{upon{] him funden,
Als he tirueden of his serk,
On hise rith shuldre a kynemerk -
A swi+te brith, a swi+te fair.
'Goddot!' quath Grim '+tis ure eir,
+Tat shal [{ben{] louerd of Denemark!
He shal ben king strong and stark -
He shal hauen in his hand
A[{l{] Denemark and Engeland.
He shal do Godard ful wo -
He shal him hangen or quik flo,
Or he shal him al quic graue.
Of him shal he no merci haue.'
+Tus seide Grim, and sore gret,
And sone fel him to +te fet,
And seide 'Louerd, haue merci
Of me and Leue, +tat is me bi!
Louerd, we aren bo+te +tine -
+Tine cherles, +tine hine.
Lowerd, we sholen +te wel fede
Til +tat +tu cone riden on stede,
Til +tat +tu cone ful wel bere
Helm on heued, sheld and spere.
He ne shal neuere wite, sikerlike
(Godard, +tat fule swike).
+Toru o+ter man, louerd, than +toru +te
Shal I neuere freman be.
+Tou shalt me, louerd, fre[{man{] maken,
For I shal yemen +te and waken -
+Toru +te wile I fredom haue.'
+To was Haueloc a bli+te knaue!
<P 22>
He sat him up and crauede bred,
And seide 'Ich am ney ded,
Hwat for hunger, wat for bondes,
+Tat +tu leidest on min hondes,
And for [{+te{] keuel at +te laste,
+Tat in my mouth was +trist faste.
Y was +te[{r{]-with so harde prangled
+Tat I was +te[{r{]-with ney strangled!'
'Wel is me +tat +tu mayth hete!
Goddoth,' quath Leue 'Y shal +te fete
Bred an chese, butere and milk,
Pastees and flaunes - al with suilk
Shole we sone +te wel fede,
Louerd, in +tis mikel nede.'
Soth it is +tat men seyt and suereth:
+Ter God wile helpen nouth ne dereth.

   +Tanne sho hauede brouth +te mete,
Haueloc anon bigan to ete
Grundlike, and was ful bli+te.
Cou+te he nouth his hunger mi+te -
A lof he het, Y woth, and more,
For him hungrede swi+te sore.
+Tre dayes +ter-biforn, I wene,
Et he no mete - +tat was wel sene!
Hwan he hauede eten and was fed,
Grim dede maken a ful fayr bed,
Vnclo+tede him, and dede him +ter-inne,
And seyde 'Slep, sone, with muchel winne!
Slep wel faste and dred +te nouth -
Fro sorwe to ioie art +tu brouth!'
Sone so it was lith of day,
Grim it undertok +te wey
To +te wicke traitour Godard
+Tat was [{of{] Denema[{r{]k stiward,
And seyde 'Louerd, don Ich haue
+Tat +tou me bede of +te knaue:
He is drenched in +te flod,
Abouten his hals an anker god -
<P 23>
He is witerlike ded.
Eteth he neueremore bred:
He li+t drenched in +te se. 
Yif me gold [{and{] o+ter fe,
+Tat Y mowe riche be,
And with +ti chartre make fre;
For +tu ful wel bihetet me
+Tanne I last spak with +te!'
Godard stod and lokede on him
+Toruthlike, with eyne grim,
And seyde 'Wiltu ben erl?
Go hom swi+te, fule drit-cherl!
Go he+ten, and be eueremore
+Tral and cherl als +tou er wore -
Shal[{tu{] haue non o+ter mede.
For litel I do +te lede
To +te galues, so God me rede!
For +tou haues don a wicke dede.
+Tou mait stonden her to longe,
Bute +tou swi+te e+ten gonge!'

   Grim +toucte to late +tat he ran
Fro +tat traytour, +ta[{t{] wicke man,
And +toucte 'Wat shal me to [{ra+te{] ?
Wite he him on liue he wile [{us{] b[{a{]+te 
Heye hangen on galwe-tre.
Betere us is of londe to fle
And berwen bo+ten ure liues,
And mine children and mine wiues.'
Grim solde sone al his corn,
Shep wit wolle, neth wit horn,
Hors and swin, [{geet{] wit berd,
+Te gees, +te hennes of +te yerd -
Al he solde +tat outh douthe,
+Tat he eure selle moucte,
And al he to +te peni drou.
Hise ship he grey+tede wel inow:
He dede it tere an ful wel pike
<P 24>
+Tat it ne doutede sond ne krike,
+Ter-inne dide a ful god mast,
Stronge kables and ful fast,
Ores gode an ful god seyl -
+Ter-inne wantede nouth a nayl
+Tat euere he sholde +ter-inne do.
Hwan he hauedet grey+ted so,
Hauelok +te yunge he dede +ter-inne,
Him and his wif, hise sones +trinne,
And hise two doutres +tat faire wore.
And sone dede he leyn in an ore,
And drou him to +te heye se
+Tere he mith al+terbest fle.
Fro londe woren he bote a mile,
Ne were neuere but ane hwile
+Tat it ne bigan a wind to rise
Out of +te north men calleth 'bise',
And drof hem intil Engelond,
+Tat al was si+ten in his hond,
His +tat Hauelok was +te name.
But or he hauede michel shame,
Michel sorwe and michel tene,
And +trie he gat it al bidene,
Als ye shulen nou forthwar[{d{] here,
Yf that ye wilen +ter-to here.

   In Humber Grim bigan to lende,
Jn Lindeseye rith at +te north ende.
+Ter sat is ship upon +te sond;
But Grim it drou up to +te lond,
And +tere he made a litel cote
To him and to hise flote.
Bigan he, +tere for to er+te,
A litel hus to maken of er+te,
So +tat he wel +tore were
Of here herboru herborwed +tere.
And for +tat Grim +tat place aute
+Te stede of Grim +te name laute,
So +tat Grimesbi it calle
+Tat +ter-offe speken alle;
<P 25>
And so shulen men callen it ay,
Bituene +tis and Domesday.

   Grim was fishere swi+te god
And mikel cou+te on +te flod -
Mani god fish +ter-inne he tok,
Bo+te with neth and with hok.
He tok +te sturgiun and +te qual,
And +te turbut and lax withal;
He tok +te sele and +te hwel -
He spedde ofte swi+te wel.
Keling he tok, and tumberel,
Hering and +te makerel,
+Te butte, +te schulle, +te +tornebake.
Gode paniers dede he make,
On til him, and o+ter +trinne
Til hise sones, to beren fishe inne,
Vp o londe to selle and fonge -
Forbar he ney+te[{r{] tun ne gronge
+Tat he ne to-yede with his ware.
Kam he neuere hom hand-bare,
+Tat he ne broucte bred and sowel
Jn his shirte or in his couel,
Jn his poke benes and korn - 
Hise swink ne hauede he nowt forlorn.
And hwan he tok +te grete laumprei,
Ful we[{l{] he cou+te +te rithe wei
To Lincolne, +te gode boru;
Ofte he yede it +toru and +toru,
Til he hauede wol wel sold
And +ter-fore +te penies told.
+Tanne he com +tenne he were bli+te,
For hom he brouthe fele si+te
Wastels, simenels with +te horn,
Hise pokes fulle of mele an korn,
Netes flesh, shepes and swines,
And hemp to maken of gode lines,
And stronge ropes to hise netes -
Jn +te se-weres he ofte setes.

<P 26>
   +Tus-gate Grim him fayre ledde:
Him and his genge wel he fedde
Wel twelf winter o+ter more.
Hauelok was war +tat Grim swank sore
For his mete, and he lay at hom -
+Thouthe 'Ich am nou no grom!
Jch am wel waxen, and wel may eten
More +tan euere Grim may geten.
Jch ete more, bi God on liue,
+Tan Grim an hise children fiue!
Jt ne may nouth ben +tus longe.
Goddot, Y wile with +te[{m{] gange
For to leren sum god to gete.
Swinken Ich wolde for mi mete -
Jt is no shame for to swinken!
+Te man +tat may wel eten and drinken
+Tat nouth ne haue but on swink long -
To liggen at hom it is ful strong.
God yelde him, +ter I ne may,
+Tat haueth me fed to +tis day!
Gladlike I wile +te paniers bere -
Jch woth ne shal it me nouth dere,
+Tey +ter be inne a bir+tene gret
Al so heui als a neth.
Shal Ich neuere lengere dwelle -
Tomorwen shal Ich forth pelle.'

   On +te morwen, hwan it was day,
He stirt up sone and nouth ne lay,
And cast a panier on his bac
With fish giueled als a stac.
Al so michel he bar him one,
So he foure, bi mine mone!
Wel he it bar and solde it wel;
+Te siluer he brouthe hom il del,
Al +tat he +ter-fore tok -
With-held he nouth a fer+tinges nok.
So yede he forth ilke day
+Tat he neuere at home lay -
So wolde he his mester lere.  
<P 27>
Bifel it so a strong dere
Bigan to rise of korn of bred,
That Grim ne cou+te no god red
Hw he sholde his meine fede.
Of Hauelok hauede he michel drede,
For he was strong and wel mouthe ete
More +tanne heuere mouthe be gete;
Ne he ne mouthe on +te se take
Ney+ter lenge ne +tornbake,
Ne non o+ter fish +tat douthe
His meyne feden with he mouthe.
Of Hauelok he hauede kare,
Hwil-gat +tat he micthe fare;
Of his children was him nouth -
On Hauelok was al hise +touth,
And seyde 'Hauelok, dere sone,
J wene that we deye mone
For hunger: +tis dere is so strong,
And hure mete is uten long.
Betere is +tat +tu henne gonge
+Tan +tu here dwelle longe -
He+ten +tou mayt gangen to late.
+Tou canst ful wel +te ricthe gate
To Lincolne, +te gode borw -
+Tou hauest it gon ful ofte +toru.
Of me ne is me nouth a slo.
Betere is +tat +tu +tider go,
For +ter is mani god man inne:
+Ter +tou mayt +ti mete winne.
But wo is me +tou art so naked:
Of mi seyl Y wolde +te were maked
A cloth +tou mithest inne gongen,
Sone, no cold +tat +tu ne fonge.'

   He tok +te sh[{e{]res of +te nayl
And made him a couel of +te sayl,
And Hauelok dide it sone on.
Hauede ney+ter hosen ne shon,
Ne none kines o+te[{r{] wede:
To Lincolne barfot he yede.
<P 29>
Hwan he kam +te[{r{] he was ful wil -
Ne hauede he no frend to gangen til.
Two dayes +ter fastinde he yede,
+Tan non for his werk wolde him fede.
+Te +tridde day herde he calle:
'Bermen, bermen, hider forth alle!'
[\NO GAP IN MS\] . . . . . . . . 
Sprongen forth so sparke on glede.
Hauelok shof dun nyne or ten
Rith amidewarde +te fen,
And stirte forth to +te kok
[\NO GAP IN MS\] . . . . . . . .
+Tat he bouthe at +te brigge.
+Te bermen let he alle ligge,
And bar +te mete to +te castel,
And gat him +tere a fer+ting wastel.

   +Tet o+ter day kepte he ok
Swi+te yerne +te erles kok,
Til +tat he say him on +te b[{r{]igge,
And bi him mani fishes ligge.
+Te herles mete hauede he bouth
Of Cornwalie, and kalde oft:
'Bermen, bermen, hider swi+te!'
Hauelok it herde, and was ful bli+te
+Tat he herde 'Bermen!' calle:
Alle made he hem dun-falle
+Tat in his gate yeden and stode -
Wel sixtene laddes gode.
Als he lep +te kok til,
He shof hem alle upon an hyl -
Astirte til him with his rippe
And bigan +te fish to kippe.
He bar up wel a carte-lode
Of segges, laxes, of playces brode,
Of grete laumprees, and of eles.
Sparede he ney+ter tos ne heles
Til +tat he to +te castel cam,
+Tat men fro him his bir+tene nam.
<P 30>
+Tan men haueden holpen him doun
With +te bir+tene of his croun,
+Te kok stod and on him low,
And +toute him stalwor+te man ynow,
And seyde 'Wiltu ben wit me?
Gladlike wile Ich feden +te.
Wel is set +te mete +tu etes,
And +te hire +tat +tu getes!'

   '[{G{]oddot!' quoth he 'leue sire,
Bidde Ich you non o+ter hire,
But yeue+t me inow to ete -
Fir and water Y wile you fete,
+Te fir blowe an ful wel maken.
Stickes kan Ich breken and kraken,
And kindlen ful wel a fyr,
And maken it to brennen shir.
Ful wel kan Ich cleuen shides,
Eles to-turuen of here hides;
Ful wel kan Ich dishes swilen,
And don al +tat ye euere wilen.'
Quoth +te kok 'Wile I no more!
Go +tu yunder and sit +tore,
And Y shal yeue +te ful fair bred,
And make +te broys in +te led.
Sit now doun and et ful yerne -
Da+teit hwo +te mete werne!'

   Hauelok sette him dun anon
Al so stille als a ston,
Til he hauede ful wel eten;
+To hauede Hauelok fayre geten!
Huan he hauede eten inow,
He kam to +te welle, water up-drow,
And filde +te[{r{] a michel so -
Bad he non ageyn him go,
But bitwen his hondes he bar it in,
A[{l{] him one, to +te kichin.
<P 31>
Bad he non him water to fett,
Ne fro b[{r{]igge to bere +te mete.
He bar +te turues, he bar +te star,
+Te wode fro +te brigge he bar,
Al +tat euere shulden he nytte
Al he drow and al he citte - 
Wolde he neuere hauen rest
More +tan he were a best.
Of alle men was he mest meke,
Lauhwinde ay and bli+te of speke.
Euere he was glad and bli+te - 
His sorwe he cou+te ful wel mi+te.  

<S SAMPLE 2>
<P 35>
   Godrich +te erl was swi+te wroth
+Tat she swor swilk an oth,
And seyde 'Hwor +tou wilt be
Quen and leuedi ouer me?
+Tou shalt hauen a gadeling - 
Ne shalt +tou hauen non o+ter king!
+Te shal spusen mi cokes knaue -
Ne shalt +tou non o+ter louerd haue.
Da+teit +tat +te o+ter yeue
Eueremore hwil I liue!
Tomo[{r{]we ye sholen ben weddeth,
<P 36>
And maugre +tin togidere beddeth.'
Goldeborw gret and [{yaf{] hire ille;
She wolde ben ded, bi hire wille.
On +te morwen, hwan day was sprungen,
And day-belle at kirke rungen,
After Hauelok sente +tat Iudas
+Tat werse was +tanne Sathanas,
And seyde 'Mayster, wilte wif?'
'Nay!' quoth Hauelok, 'bi my lif!
Hwat sholde Ich with wif do?
J ne may hire fede ne clo+te ne sho.
Wider sholde Ich wimman bringe?
J ne haue none kines +tinge - 
J ne haue hws, Y ne haue cote,
Ne I ne haue stikke, Y ne haue sprote,
I ne haue ney+ter bred ne sowel,
Ne cloth but of an hold with couel.
+Tis clo+tes +tat Ich onne-haue
Aren +te kokes and Ich his knaue!'
Godrich stirt up and on him dong,
[\NO GAP IN MS\] . . . . . . . .
And seyde 'But +tou hire take
+Tat Y wole yeuen +te to make,
J shal hangen +te ful heye,
Or Y shal +tristen vth +tin heie!'
Hauelok was one and was odrat,
And grauntede him al +tat he bad.
+To sende he after hire sone,
+Te fayrest wymman under mone,
And seyde til hire, [{fel{] and slike
(+Tat wicke +tral, +tat foule swike):
But +tu +tis man understonde
J shal flemen +te of londe,
Or +tou shal to +te galwes renne,
And +ter +tou shalt in a fir brenne!'
Sho was adrad for he so +trette,
And durste nouth +te spusing lette,
But +tey hire likede swi+te ille,
+Touthe it was Godes wille -
<P 37>
God +tat makes growen +te korn,
Formede hire wimman to be born.
Hwan he hauede don him, for drede,
+Tat he sholde hire spusen and fede,
And +tat she sholde til him holde,
+Ter weren penies +ticke tolde
Mikel plente upon +te bok -
He ys hire yaf, and she as tok.
He weren spused fayre and wel:
+Te messe he dede, eueri del
+Tat fel to spusing, an god cle[{r{]k -
+Te erchebishop uth of Yerk,
+Tat kam to +te parlement,
Als God him hauede +tider sent.

   Hwan he weren togydere in Godes lawe,
+Tat +te folc ful wel it sawe,
He ne wisten hwat he mouthen
Ne he ne wisten wat hem douthe -
+Ter to dwellen or +tenne to gonge.
+Ter ne wolden he dwellen longe,
For he wisten and ful wel sawe
+Tat Godrich hem hatede - +te deuel him hawe!
And yf he dwelleden +ter outh - 
+Tat fel Hauelok ful wel on +touth - 
Men sholde don his leman shame,
Or elles bringen in wicke blame,
+Tat were him leuere to ben ded.
For+ti he token ano+ter red,
+Tat +tei sholden +tenne fle
Til Grim, and til hise sones +tre -
+Ter wenden he al+terbest to spede,
Hem for to clo+te and for to fede.
+Te lond he token under fote -
Ne wisten he non o+ter bote -
And helden ay +te rith [{sti{]
Til he komen to Grimesby.
+Tanne he komen +tere tanne was Grim ded -
Of him ne haueden he no red.
<P 38>
But hise children alle fyue
Alle weren yet on liue,
+Tat ful fayre ayen hem neme
Hwan he wisten +tat he keme,
And maden ioie swi+te mikel -
Ne weren he neuere ayen hem fikel.
On knes ful fayre he hem setten
And Hauelok swi+te fayre gretten,
And seyden 'Welkome, louerd dere,
And welkome be +ti fayre fere!
Blessed be +tat ilke +trawe
+Tat +tou hire toke in Godes lawe!
Wel is hus we sen +te on lyue.
+Tou mithe us bo+te selle and yeue;
+Tou mayt us bo+te yeue and selle,
With +tat +tou wilt here dwelle.
We hauen, louerd, alle gode -
Hors, and neth, and ship on flode,
Gold, and siluer, and michel auchte,
+Tat Grim ure fader us bitawchte.
Gold and siluer and o+ter fe
Bad he us bitaken +te.
We hauen shep, we hauen swin;
Bileue her, louerd, and al be +tin!
+To[{u{] shalt ben louerd, +tou shalt ben syre
And we sholen seruen +te and hire.
And hure sistres sholen do
Al +tat euere biddes sho:
He sholen hire clo+ten washen and wringen,
And to hondes water bringen:
He sholen bedden hire and +te,
For leuedi wile we +tat she be.'
Hwan he +tis ioie haueden maked,
Sithen stikes broken and kraked,
And +te fir brouth on brenne,
Ne was +ter spared gos ne henne,
Ne +te hende ne +te drake.
Mete he deden plente make -
Ne wantede +tere no god mete.
Wyn and ale deden he fete
<P 39>
And made hem glade and bli+te;
Wesseyl ledden he fele si+te.

   On +te nith als Goldeborw lay,
Sory and sorwful was she ay,
For she wende she were biswike,
+Tat she [{we{]re yeuen unkyndelike.
O nith saw she +ter-inne a lith,
A swi+te fayr, a swi+te bryth -
Al so brith, al so shir,
So it were a blase of fir.
She lokede no[{r{]+t and ek south,
And saw it comen ut of his mouth
+Tat lay bi hire in +te bed.
No ferlike +tou she were adred!
+Touthe she 'Wat may +tis bimene!
He beth heyman yet, als Y wene -
He beth heyman er he be ded!'
On hise shuldre, of gold red, 
She saw a swi+te noble croiz.
Of an angel she herde a uoyz:

   'Goldeborw, lat +ti sorwe be!
For Hauelok, +tat haue+t spuset +te,
He [{is{] kinges sone and kinges eyr -
+Tat bikenneth +tat croiz so fayr.
Jt bikenneth more - +tat he shal
Denemark hauen and Englond al.
He shal ben king strong and stark
Of Engelond and Denemark -
+Tat shal +tu wit +tin eyne sen,
And +to[{u{] shalt quen and leuedi ben.'

   +Tanne she hauede herd the steuene
Of +te angel uth of heuene,
She was so fele si+tes bli+te
+Tat she ne mithe hire ioie mythe,
But Hauelok sone anon she kiste,
And he slep and nouth ne wiste
<P 40>
Hwa[{t{] +tat aungel hauede seyd.
Of his slep anon he brayd,
And seide, 'Lemman, slepes +tou?
A selkuth drem dremede me nou -

   Herkne nou hwat me haueth met.
Me +touthe Y was in Denemark set,
But on on +te moste hil
+Tat euere yete kam I til.
Jt was so hey +tat Y wel mouthe
Al +te werd se, als me +touthe.
Als I sat up-on +tat lowe
J bigan Denemark for to awe,
+Te borwes and +te castles stronge;
And mine armes weren so longe
That I fadmede al at ones
Denemark with mine longe bones.
And +tanne Y wolde mine armes drawe
Til me and hom for to haue,
Al +tat euere in Denemark liueden
On mine armes faste clyueden,
And +te stronge castles alle
On knes bigunnen for to falle -
+Te keyes fellen at mine fet. 
Ano+ter drem dremede me ek
+Tat Ich fley ouer +te salte se
Til Engeland, and al with me
+Tat euere was in Denemark lyues
But bondemen and here wiues,
And +tat Ich kom til Engelond -
Al closede it intil min hond,
And, Goldeborw, Y gaf [{it{] +te.
Deus, lemman! hwat may +tis be?'
Sho answerede and seyde sone
'Jesu Crist, +tat made mone,
+Tine dremes turne to ioye...  
[\NO GAP IN MS\] 
+Tat wite +tw +tat sittes in trone!
Ne non strong king ne caysere
So +tou shalt be, fo[{r{] +tou shalt bere
<P 41>
Jn Engelond corune yet.
Denemark shal knele to +ti fete;
Alle +te castles +tat aren +ter-inne
Shaltow, lemman, ful wel winne -
J woth so wel so Ich it sowe.
To +te shole comen heye and lowe,
And alle +tat in Denemark wone -
Em and bro+ter, fader and sone,
Erl and baroun, dreng an[{d{] [{+t{]ayn,
Knithes and burgeys and sweyn -
And [{bes{] mad king heyelike and wel.
Denemark shal be +tin euere-ilc del -
Haue +tou nouth +ter-offe douthe,
Nouth +te worth of one nouthe!
+Ter-offe with-inne +te firste yer
Shalt +tou ben king of euere-il del. 
But do nou als Y wile rathe:
Nim in wit l[{i{]+te to Denema[{r{]k ba+te,
And do +tou nouth on frest +tis fare -
Lith and selthe felawes are -
For shal Ich neuere bli+te be
Til I with eyen Denemark se,
For Ich woth +tat al +te lond
Shalt +tou hauen in +tin hon[{d{] .
Prey Grimes sones alle +tre
That he wenden for+t with +te;
J wot he wilen +te nouth werne -
With +te wende shulen he yerne,
For he louen +te hertelike.
+Tou maght t[{e{]l he aren quike,
Hwore-so he o worde aren;
+Tere ship +tou do hem swi+te yaren,
And loke +tat +tou dwelle nouth -
Dwelling haueth ofte sca+te wrouth!

<S SAMPLE 3>
<P 46>
   Hwan it was comen time to ete,
Hise wif dede Ubbe sone in fete,
And til hire seyde al on gamen:
'Dame, +tou and Hauelok shulen ete samen,
And Goldeboru shal ete wit me
+Tat is so fayr so flour on tre -
<P 47>
Jn al Denemark [{n{]is wimman 
So fayr so sche, bi Seint Iohan.'
+Tanne [{he{] were set and bord leyd,
And +te beneysun was seyd,
Biforn hem com +te beste mete
+Tat king or cayser wolde ete:
Kranes, swannes, ueneysun,
Lax, lampreys, and god sturgun,
Pyment to drinke and god clare,
Win hwit and red, ful god plente -
Was +ter-inne no page so lite
+Tat euere wolde ale bite.
Of +te mete for to telle
Ne of +te [{win{] bidde I nout dwelle;
+Tat is +te storie for to lenge -
Jt wolde anuye +tis fayre genge.
But hwan he haueden +te kil+ting de[{y{]led,
And fele si+tes haueden wosseyled,
And with gode drinkes seten longe,
And it was time for to gonge
Jl man to +ter he cam fro,
+Touthe Ubbe 'Yf I late hem go
+Tus one foure, withuten mo,
So mote Ich brouke finger or to,
For +tis wimman bes mike wo!
For hire shal men hire louerd slo.'
He tok sone knithes ten,
And wel sixti o+ter men
Wit gode bowes and with gleiues,
And sende him unto +te greyues -
+Te beste man of al +te toun,
+Tat was named Bernard Brun -
And bad him als he louede his lif
Hauelok wel y[{e{]men and his wif,
And wel do wayten al +te nith
Til +te o+ter day +tat it were lith.
Bernard was trewe and swi+te with -
Jn al +te borw ne was no knith
+Tat betere cou+te on stede riden,
<P 48>
Helm on heued ne swerd bi side.
Hauelok he gladlike understod
With mike loue and herte god,
And dide grey+te a super riche
(Al so he was no-with chiche)
To his bihoue eueril del,
+Tat he mithe supe swi+te wel.

   Al so he seten and sholde soupe,
So comes a ladde in a ioupe,
And with him sixti o+ter stronge,
With swerdes drawen and kniues longe,
Jlkan in hande a ful god gleiue,
And seyde 'Undo, Bernard +te greyue!
Vndo swi+te and lat us in,
Or +tu art ded, bi Seint Austin!'
Bernard stirt up, +tat was ful big,
And caste a brinie upon his rig,
And grop an a[{x{] +tat was ful god -
Lep to +te dore so he wore wod,
And seyde 'Hwat are ye +tat are +ter-oute,
+Tat +tus biginnen for to stroute?
Goth henne swi+te, fule +teues!
For bi +te Louerd +tat man on leues,
Shol Ich casten +te dore open,
Summe of you shal Ich drepen,
And +te o+tre shal Ich kesten
Jn feteres and ful faste festen!'
'Hwat haue ye seid?' quoth a ladde,
'Wenestu +tat we ben adradde?
We shole at +tis dore gonge
Maugre +tin, carl, or outh longe!'
He gripen sone a bulder-ston,
And let it fleye, ful god won,
Agen +te dore, +tat it to-rof.
Auelok it saw, and +tider drof,
And +te barre sone vt-drow,
+Tat was unride and gret ynow,
And caste +te dore open wide
<P 49>
And seide 'Her shal Y now abide!
Comes swi+te vnto me -
Da+teyt hwo you henne fle!'
'No,' quodh on, '+tat shaltou coupe!'
And bigan til him to loupe,
Jn his hond his swerd ut-drawe,
(Hauelok he wende +tore haue slawe),
And with [{him{] comen o+ter two
+Tat him wolde of liue haue do.
Hauelok lifte up +te dore-tre,
And at a dint he slow hem +tre:
Was non of hem +tat hise hernes
Ne lay +ter ute ageyn +te sternes.
+Te fer+te, +tat he si+ten mette,
Wit +te barre so he him grette
Bifor +te heued +tat +te rith eye
Vt of +te hole made he fleye,
And si+te clapte him on +te crune
So +tat he stan-ded fel +tor dune.
+Te fifte +tat he ouertok
Gaf he a ful sor dint ok
Bitwen +te sholdres +ter he stod,
+Tat he speu his herte-blod.
+Te sixte wende for to fle,
And he clapte him with +te tre
Rith in +te fule necke so
+Tat he smot hise necke on to.
+Tanne +te sixe weren doun-feld,
+Te seuen+te brayd ut his swerd,
And wolde Hauelok riht in the eye;
And Haue[{lok{] le[{t +te{] barre fleye
And smot him sone ageyn +te brest,
+Tat hauede ne neuere sch[{r{]ifte of prest
(For he was ded on lesse hwile
+Tan men mouthe renne a mile).
Alle +te o+tere weren ful kene:
A red +tei taken hem bitwene
+Tat he sholde him bihalue,
<P 51>
And brisen so +tat wit no salue
Ne sholde him helen leche non.
+Tey drowen ut swerdes, ful god won,
And shoten on him so don on bere
Dogges +tat wolden him to-tere,
+Tanne men doth +te bere beyte.
+Te laddes were kaske and teyte
And v[{m{]biyeden him ilkon:
Sum smot with tre, and sum wit ston,
Summe putten with gleyue in bac and side
And yeuen wundes longe and wide
Jn twenti stedes, and wel mo,
Fro +te croune til the to.
Hwan he saw +tat, he was wod,
And was it ferlik hw he stod!
For +te blod ran of his sides
So water +tat fro +te welle glides.
But +tanne bigan he for to mowe
With +te barre, and let hem sh[{a{]we
Hw he cow+te sore smite;
For was +ter non, long ne lite,
+Tat he mouthe ouertake,
+Tat he ne garte his croune krake,
So +tat on a litel stund
Felde he twenti to +te grund.

   +To bigan gret dine to rise,
For +te laddes on ilke wise
Him asayleden wit grete dintes.
Fro fer he sto[{n{]den him with flintes,
And gleyues schoten him fro ferne,
For drepen him he wolden yerne;
But dursten he newhen him nomore
+Tanne he bor or leun wore.

   Huwe Rauen +tat dine herde,
And +towthe wel, +tat men misferde
With his louerd for his wif,
And grop an ore, and a long knif,
<P 52>
And +tider drof al so an hert,
And cham +ter on a litel stert,
And saw how +te laddes wode
Hauelok his louerd umbistode,
And beten on him so doth +te smith
With +te hamer on +te stith.

   'Allas' hwat Hwe '+tat Y was boren!
+Tat euere et Ich bred of koren!
+Tat Ich here +tis sorwe se!
Roberd, William, hware ar ye?
Gripeth e+ter unker a god tre,
And late we nouth +tise doges fle
Til ure louerd wreke [{be{] !
Cometh swi+te, and folwes me:
Jch haue in honde a ful god ore -
Da+teit wo ne smite sore!'
'Ya, leue, ya!' quod Roberd sone,
'We hauen ful god lith of +te mone.'
Roberd grop a staf strong and gret
+Tat mouthe ful wel bere a net,
And Willam Wendut grop a tre
Mikel grettere +tan his +tre,
And Bernard held his ax ful faste
(J seye, was he nouth +te laste!)
And lopen forth so he weren wode
To +te laddes +ter he stode,
And yaf hem wundes swi+te grete.
+Ter mithe men wel se boyes bete,
And ribbes in here sides breke,
And Hauelok on hem wel wreke.
He broken armes, he broken knes,
He broken shankes, he broken thes,
He dide +te blod +tere renne dune
To +te fet rith fro +te crune,
For was +ter spared heued non.
He leyden on heuedes ful god won,
And made croune breke and crake
Of +te broune and of +te blake.
<P 53>
He maden here backes al so bloute
Als he[{re{] wombes and made hem rowte
Als he weren kradel-barnes,
So dos +te child +tat moder +tarnes.

   Da+teit +te recke! for he it seruede.
Hwat dide he +tore? weren he werewed!
So longe haueden he but and bet,
With neues under hernes set,
+Tat of +to sixti men and on
Ne wente +ter awey liues non.

   On +te morwen, h[{w{]an it was day,
Jlc on o+ter wirwed lay
Als it were dogges +tat weren henged,
And summe leye in dikes slenget,
And summe in gripes bi +te her
Drawen ware and laten +ter.
Sket cam tiding intil Ubbe
+Tat Hauelok hauede with a clubbe
Of hise slawen sixti and on -
Sergaunz, +te beste +tat mithen gon.
(\'Deus!'\) quoth Ubbe, 'hwat may +tis be?
Betere his I nime miself and se
+Tat +tis baret on hwat is wold
+Tanne I sende yunge or old;
For yif I sende him unto,
J wene men sholde him shame do,
And +tat ne wolde Ich for no +ting.
J loue him wel, bi heueneking -
Me wore leuere I wore lame
+Tanne men dide him ani shame,
Or tok or onne handes leyde
Vnornelike, or shame seyde.'
He lep up on a stede lith,
And with him mani a noble knith,
And ferde forth unto +te tun,
And dide calle Bernard Brun
Vt of his hus, hwan he +ter cam;
<P 54>
And Bernard sone ageyn-nam,
Al to-tused and al to-torn,
Ner al so naked so he was born,
And al to-brised bac and +te.
Quoth Ubbe, 'Bernard, hwat is +te?
Hwo haues +te +tus ille maked,
+Tus to-riuen, and al mad naked?'

   '[{L{]ouerd, merci!' quot he sone,
'Tonicht, al so ros +te mone,
Comen her mo +tan sixti +teues
With lokene copes and wide sleues,
Me for to robben and to pine,
And for to drepe me and mine.
Mi dore he broken up ful sket,
And wolde me binden hond and fet.
Wan +te godemen +tat sawe
(Hauelok and he +tat bi +te wowe
Leye), he stirten up sone onon,
And summe grop tre, and sum grop ston,
And driue hem ut, +tei he weren crus,
So dogges ut of milne-hous.
Hauelok grop +te dore-tre,
And [{at{] a dint he slow hem +tre.
He is +te beste man at nede
+Tat eueremar shal ride stede -
Als helpe God, bi mine wone
A +thousend of men his he worth one!
Yif he ne were Ich were nou ded -
So haue Ich don mi soule red!
But it is of him mikel sinne:
He maden him swilke woundes +trinne
+Tat of +te al+terleste wounde
Were a stede brouht to grunde.
He haues a wunde in +te side
With a gleyue, ful unride;
And he haues on +toru his arum
(+Ter-of is ful mikel harum);
And he haues on +toru his +the -
<P 55>
+Te vnrideste +tat men may se.
And o+te[{r{] wundes haues he stronge,
Mo +tan twenti, swi+te longe.
But si+ten he hauede lauth +te sor
Of +te wundes, was neuere bor
+Tat so fauth so he fauth +tanne!
Was non +tat hauede +te hernpanne
So hard +tat he ne dede al to-cruhsse,
And al to-shiuere, and al to-frusshe.
He folwede hem so hund dos hare!
Da+teyt on he wolde spare,
+Tat ne made hem euerilkon
Ligge stille so doth +te ston.
And +ter nis he nouth to frie,
For o+ter sholde he make hem lye
Ded, or +tei him hauede slawen,
Or al to-heuen or al to-drawen.

   Louerd, haui nomore plith
Of +tat Ich was +tus gre+ted tonith.
+Tus wolde +te +teues me haue reft;
But, God +tank, he hauenet sure keft!
But it is of him mikel sca+te -
J woth +tat he bes ded ful ra+te.'

   Quoth Ubbe: 'Bernard, seyst +tou soth?'
'Ya, sire, that I ne le[{y{]e oth!
Yif Y, louerd, a word leye,
Tomorwen do me hengen heye!'
+Te burgeys +tat +ter-bi stode +tore
Grundlike and grete o+tes swore,
Litle and mikle, yunge and holde,
+Tat was soth +tat Bernard tolde -
Soth was +tat he wolden him bynde,
And trusse al +tat he mithen fynde
Of hise in arke or in kiste,
+Tat he mouthe in seckes +triste.
'Louerd, he haueden al awey born
His +ting, and himself al to-torn,
<P 56>
But als God self barw him wel
+Tat he ne tinte no catel.
Hwo mithe so mani stonde ageyn,
Bi nither-tale, knith or swein?
He weren bi tale sixti and ten -
Starke laddes, stalwor+ti men,
And on +te mayster of hem alle,
+Tat was +te name G[{r{]iffin Galle.
Hwo mouthe agey[{n{] so mani stonde,
But als +tis man of ferne londe
Haueth hem slawen with a tre?
Mikel ioie haue he!
God yeue him mikel god to welde,
Bo+te in tun and ek in felde:
We[{l{] is set he etes mete!'
Quoth Ubbe 'Doth him swi+te fete,
+Tat Y mouthe his woundes se,
Yf +tat he mouthen holed be;
For yf he mouthe couere yet
And gangen wel upon hise fet,
Miself shal dubbe him to knith,
For+ti +tat he is so with.
And yif he liuede, +to foule +teues
(+Tat weren of Kaym[{es{] kin and Eues),
He sholden hange bi +te necke -
Of here ded da+teit wo recke,
Hwan he yeden +tus on nithes
Tobinde bo+te burgmen and knithes!
For bynderes loue Ich neueremo -
Of hem ne yeue Ich nouht a slo!'

   Hauelok was bifore Ubbe browth, 
+Tat hauede for him ful mikel +touth
And mikel sorwe in his herte,
For hise wundes +tat we[{re{] so smerte.

   But hwan his wundes weren sh[{a{]wed,
And a leche hauede knawed
+Tat he hem mouthe ful wel hele,
<P 57>
Wel make him gange and ful wel mele,
And wel a palefrey bistride,
And wel upon a stede ride,
+To let Ubbe al his care
And al his sorwe ouer-fare,
And seyde, 'Cum now forth with me,
And Goldeboru +ti wif with +te,
And +tine seriaunz alle +tre!
For nou wile Y youre warant be:
Wile Y non of here frend
+Tat +tu slowe with +tin hend
Mouthe wayte +te [{to{] slo
Al so +tou gange to and fro.
J shal lene +te a bowr
+Tat is up in +te heye tour,
Til +tou mowe ful wel go
And wel ben hol of al +ti wo.
Jt ne shal no+ting ben bitwene
+Ti bour and min, al so Y wene,
But a fayr firrene wowe - 
Speke Y loude or spek Y lowe,
+Tou shalt ful wel heren me,
And +tan +tu wilt +tou shalt me se.
A rof shal hile us bo+te o nith,
+Tat none of mine, clerk ne knith,
Ne sholen +ti wif no shame bede
No more +tan min, so God me rede!'

   He dide unto +te borw bringe
Sone anon, al with ioiinge,
His wif and his serganz +tre
(+Te beste men +tat mouthe be!).
+Te firste nith he lay +ter-inne,
Hise wif and his serganz +trinne,
Aboute +te middel of +te nith
Wok Ubbe and saw a mikel lith
Jn +te bour +ta[{r{] Hauelok lay,
Al so brith so it were day.

<P 58>
   (\'Deus!'\) quoth Ubbe, 'hwat may +tis be?
Betere is I go miself and se
Hwe+ter he sitten nou and wesseylen,
Or of ani shotshipe to-deyle
+Tis tid nithes also foles;
+Tan bir+te men casten hem in poles,
Or in a grip, or in +te fen -
Nou ne sitten none but wicke men,
Glotuns, reures, or wicke +teues,
Bi Crist +tat alle folk onne leues!'

   He stod and totede in at a bord
Her he spak anilepi word,
And saw hem slepen faste ilkon,
And lye stille so +te ston,
And saw al +tat mikel lith
Fro Hauelok cam +tat was so brith.
Of his mouth it com il del -
+Tat was he war ful swi+te wel.
(\'Deus!'\) quoth he, 'hwat may +tis mene?'
He calde bo+te arwe men and kene,
Knithes and serganz swi+te sleie,
Mo [^EDITION: Mpo^] +tan an hundred, withuten leye,
And bad hem alle comen and se
Hwat +tat selcuth mithe be.  

<S SAMPLE 4>
<P 63>
   Hwan he haueden alle +te king gret,
And he weren alle dun-set,
+To seyde Ubbe 'Lokes here
Vre louerd swi+te dere,
+Tat shal ben king of al +te lond
And haue us alle under hond,
For he is Birkabeynes sone -
+Te king +tat was vmbe stou[{n{]de wone
[{Us{] for to yeme and wel were
Wit sharp swerd and longe spere.
Lokes nou hw he is fayr:
Sikerlike he is hise eyr.
Falles alle to hise fet -
Bicomes hise men ful sket!'
He weren for Ubbe swi+te adrad,
And dide sone al +tat he bad.
And yet deden he sumdel more:
O bok ful grundlike he swore
+Tat he sholde with him halde,
Bo+te ageynes stille and bolde
+Tat euere wo[{l{]de his bodi dere.
+Tat dide hem o boke swere. 

   Hwan he hauede manrede and oth
Taken of lef and of loth,
Vbbe dubbede him to knith
<P 64>
With a swerd ful swi+te brith,
And +te folk of al +te lond
Bitauhte him al in his hond,
+Te cunnriche eueril del,
And made him king heylike and wel.
Hwan he was king, +ter mouthe men se
+Te moste ioie +tat mouhte be -
Buttinge with sharpe speres,
Skirming with taleuaces +tat men beres,
Wrastling with laddes, putting of ston,
Harping and piping ful god won,
Leyk of mine, of hasard ok,
Romanz-reding on +te bok.
+Ter mouthe men here +te gestes singe,
+Te glevmen on +te tabour dinge;
+Ter mouhte men se +te boles beyte
And +te bores, with hundes teyte;
+To mouthe men se eueril gleu;
+Ter mouthe men se hw grim greu -
Was neuere yete ioie more
Jn al +tius werd +tan +to was +tore.
+Ter was so mike yeft of clo+tes
+Tat, +tou I swore you grete othes,
J ne wore nouth +ter-offe [{trod{] .
+Tat may I ful wel swere, bi God:
+Tere was swi+te gode metes,
And of wyn +tat men fer fetes
Rith al so mik and gret plente
So it were water of +te se.
+Te feste fourti dawes sat -
So riche was neuere non so +tat!
+Te king made Roberd +tere knith,
+Tat was ful strong and ful with,
And Willam Wendut hec, his bro+ter,
And Huwe Rauen, +tat was +tat o+ter,
And made hem barouns alle +tre,
And yaf hem lond and o+ter fe,
So mikel +tat ilker twent[{i{] knihtes
Hauede of genge, dayes and nithes.

<P 65>
   Hwan +tat feste was al don, 
A thusand knihtes wel o-bon
With-held +te king with him to lede,
+Tat ilkan hauede ful god stede,
Helm, and sheld, and brinie brith,
And al +te wepne +tat fel to knith.
With hem fiue thusand gode
Sergaunz +tat weren to fyht wode
With-held he al of his genge -
Wile I namore +te storie lenge.
Yet hwan he hauede of al +te lond
+Te casteles alle in his hond,
And conestables don +ter-inne,
He swor he ne sholde neuer blinne
Til +tat he were of Godard wreken,
+Tat Ich haue of ofte speken.
Hal[{f{] hundred knithes dede he calle,
And hise fif thusand sergaunz alle,
And dide sweren on +te bok
Sone, and on +te auter ok,
+Tat he ne sholde neuere blinne,
Ne for loue ne for sinne,
Til +tat he haueden Godard funde
And brouth biforn him faste bunde.

   +Tanne he haueden swor +tis oth,
Ne leten he nouth, for lef ne loth,
+Tat he ne foren swi+te rathe
+Ter he was, unto +te pa+te
+Ter he yet on hunting for,
With mikel genge and swi+te stor.
Robert, +tat was of al +te ferd
Mayster, was girt wit a swerd,
And sat upon a ful god stede
+Tat vnder him rith wolde wede.
He was +te firste +tat with Godard
Spak, and seyde, 'Hede, cauenard!
Wat dos +tu here at +tis pa+te?
Cum to +te king swi+te and ra+te!
+Tat sendes he +te word and bedes,
<P 66>
+Tat +tu +tenke hwat +tu him dedes
Hwan +tu reftes with a knif
Hise sistres here lif,
An si+ten bede +tu in +te se
Drenchen him; +tat herde he -
He is to +te swi+te grim!
Cum nu swi+te unto him,
+Tat king is of +tis kuneriche,
+Tu fule man, +tu wicke swike,
And he shal yelde +te +ti mede,
Bi Crist +tat wolde on rode blede!'

   Hwan Godard herde +tat [{he{] +ter +trette,
With +te neue he Robert sette
Biforn +te teth a dint ful strong,
And Robert kipt ut a knif long,
And smot him +toru +te rith arum -
+Ter-of was ful litel harum!

   Hwan his folk +tat sau and herde,
Hwou Robert with here louerd ferde,
He haueden him wel-ner browt of liue,
Ne were his two bre+tren and o+tre fiue
Slowen of here laddes ten
Of Godardes al+terbeste men.
Hwan +te o+tre sawen +tat, he fledden,
And Godard swi+te loude gredde:
'Mine knithes, hwat do ye?
Sule ye +tus-gate fro me fle?
Jch haue you fed and yet shal fede -
Helpe me nu in +tis nede,
And late ye nouth mi bodi spille,
Ne Hauelok don of me hise wille!
Yif ye i[{t{] do, ye do you shame
And bringeth youself in mikel blame!'
Hwan he +tat herden, he wenten ageyn,
And slowen a knit and a sweyn
<P 67>
Of +te kinges oune men,
And woundeden abuten ten.

   +Te kinges men, hwan he +tat sawe,
Scuten on hem, heye and lowe,
And euerilk fot of hem slowe,
But Godard one, +tat he flowe,
So +te +tef men dos henge,
Or hund men sholen in dike slenge.
He bunden him ful swi+te faste
Hwil +te bondes wolden laste,
+Tat he rorede als a bole
+Tat wore parred in an hole
With dogges for to bite and beite.
Were +te bondes nouth to leite -
He bounden him [{s{]o fele sore
+Tat he gan crien Godes ore,
+Tat he sholde of his hend plette;
Wolden he nouht +ter-fore lette
+Tat he ne bounden hond and fet.
Da+teit +tat on +tat +ter-fore let,
But dunten him so man doth bere,
And keste him on a scabbed mere,
Hise nese went un-to +te cri[{c{]e:
So ledden he +tat ful swike
Til he was biforn Hauelok brouth,
+Tat he haue[{de{] ful wo wrowht,
Bo+te with hungre and with cold.
Or he were twel[{ue{] winter old,
And with mani heui swink,
With poure mete and feble drink,
And [{wi+t{] swi+te wikke clo+tes,
For al hise manie grete othes.
Nu be[{y{]es he his holde blame:
Old sinne makes newe shame!
Wan he was [{brouth{] so shamelike
Biforn +te king (+te fule swike!)
<P 68>
+Te king dede Ubbe swi+te calle
Hise erles and hise barouns alle,
Dreng and thein, burgeis and knith,
And bad he sholden demen him rith,
For he kneu +te swikedam;
Eueril del God was him gram!
He setten hem dun bi +te wawe,
Riche and pouere, heye and lowe,
+Te helde men and ek +te grom,
And made +ter +te rithe dom,
And seyden unto +te king anon,
+Tat stille sat so +te ston:
'We deme +tat he be al quic [{f{]lawen,
And si+ten to +te galwes drawe
At +tis foule mere tayl,
+Toru is fet a ful strong nayl,
And +tore ben henged wit two feteres;
And +tare be writen +tise leteres:
"+Tis is +te swike +tat wende wel
+Te king haue reft +te lond il del,
And hise sistres with a knif
Bo+te refte here lif" -
+Tis writ shal henge bi him +tare.
+Te dom is demd seye we namore.'

   Hwan +te dom was demd and giue,
And he was wit +te prestes shriue,
And it ne mouhte ben non o+ter,
Ne for fader ne for bro+ter,
[{But{] +tat he sholde +tarne lif,
Sket cam a ladde with a knif
And bigan rith at +te to
For to ritte and for to flo;
And he bigan for to rore
So it were grim or gore,
+Tat men mithe +te+ten a mile
Here him rore, +tat fule file!
+Te ladde ne let nowith for+ti,
<P 69>
+Tey he criede 'merci! merci!'
+Tat ne flow [{him{] eueril del
With knif mad of grunden stel.
+Tei garte bringe +te mere sone,
Skabbe[{d{] and ful iuele o-bone,
And bunden him rith at hire tayl
With a rop of an old seyl,
And drowen him unto +te galwes
(Nouth bi +te gate but ouer +te falwes),
And henge +tore bi +te hals -
Da+teit hwo recke: he was fals!

   +Tanne he was ded, +tat Sathanas,
Sket was seysed al +tat his was
Jn +te kinges hand il del -
Lond and lith, and o+ter catel -
And +te king ful sone it yaf
Vbbe in +te hond, wit a fayr staf,
And seyde 'Her Ich sayse +te,
Jn al +te lond, in al +te fe.'
+To swor Hauelok he sholde make,
Al for Grim, of monekes blake
A priorie to seruen inne ay
Jesu Crist til Domesday,
For +te god he hauede him don
Hwil he was pouere and [{iuel{] o-bon.
And +ter-of held he wel his oth,
For he it made, God it woth,
Jn +te tun +ter Grim was grauen,
+Tat of Grim yet haues +te [{nauen{] -
Of Grim bidde Ich namore spelle. 
But wan Godrich herde telle,
Of Cornwayle +tat was erl
(+Tat fule traytour, that mixed cherl!)
+Tat Hauelok, was king of Denemark,
And ferde with him, strong and stark,
Comen Engelond with-inne,
Engelond al for to winne,
<P 70>
And +tat she +tat was so fayr,
+Tat was of Engelond rith eir,
Was comen up at Grimesbi,
He was ful sorful and sori,
And seyde 'Hwat shal me to ra+te?
Goddoth I shal do slon hem ba+te!
J shal don hengen hem ful heye,
So mote Ich brouke mi rith eie,
But yif he of mi lond fle.
Hwat! wenden he to deserite me?'
He dide sone ferd ut-[{bede{] ,
+Tat al +tat euere mouhte o stede
Ride or helm on heued bere,
Brini on bac, and sheld and spere
Or ani o+ter wepne bere,
Hand-ax, sy+te, gisarm, or spere,
Or aunlaz and god long knif,
+Tat als he louede leme or lif
+Tat +tey sholden comen him to, 
'With ful god wepne ye ber[{e{] ', so 
To Lincolne, +ter he lay,
Of Marz +te seuenten+te day,
So +tat he cou+te hem god +tank.
And yif +tat ani were so ran[{k{]
+Tat he +tanne ne come an[{a{]n,
He swor bi Crist and Seint Johan
That he sholde maken him +tral,
And al his ofspring forthwithal.

   +Te Englishe +tat herde +tat
Was non +tat euere his bode sat,
For he him dredde swi+te sore,
So runci spore, and mikle more.
At +te day he come sone
+Tat he hem sette, ful wel o-bone,
To Lincolne with gode stedes
And al +te wepne +tat knith ledes.
<P 71>
Hwan he wore come, sket was +te erl [{y{]are
Ageynes Denshe men to fare,
And seyde 'Ly+tes nu, alle samen!
Haue Ich gadred you for no gamen,
But Ich wile seyen you forwi.
Lokes hware here at Grimesbi
His uten-laddes here comen,
And haues nu +te priorie numen -
Al +tat euere mithen he finde,
He brenne kirkes and prestes binde;
He strangleth monkes and nunnes b[{a{]+te.
Wat wile ye, frend, her-offe r[{a+t{]e?
Yif he regne +tus-gate longe,
He moun us alle ouer-gange -
He moun vs alle quic henge or slo,
Or +tral maken and do ful wo,
Or elles reue us ure liues
And ure children and ure wiues.
But dos nu als Ich wile you lere,
Als ye wile be with me dere:
Nimes nu swi+te forth and ra+te, 
And helpes me and yuself ba+te,
And slos upo +te dogges swi+te!
For [{I{] shal neueremore be bli+te,
Ne hoseled ben ne of prest shriuen,
Til +tat he ben of londe driuen.
Nime we swi+te and do hem fle,
And folwes alle faste me!
For Ich am he, of al +te ferd,
+Tat first shal slo with drawen swerd -
Da+teyt hwo ne stonde faste
Bi me hwil hise armes laste!'
'[{Y{]e, lef, [{y{]e!' [{qu{]oth +te erl Gunter;
'Ya!' qouth +te erl of Cestre, Reyner.
And so dide alle +tat +ter stode,
And stirte forth so he were wode.
+To mouthe men se +te brinies brihte
<P 72>
On backes keste and la[{c{]e rithe,
+Te helmes heye on heued sette.
To armes al so swi+te plette
+Tat +tei wore on a litel stunde
Gre+tet als men mithe telle a pund,
And lopen on stedes sone anon;
And toward Grimesbi, ful god won,
He foren softe bi +te sti,
Til he come ney at Grimesbi.

   Hauelok, +tat hauede spired wel
Of here fare eueril del,
With al his ferd cam hem ageyn.
Forbar he no+ter knith ne sweyn:
+Te firste knith +tat he +ter mette
With +te swerd so he him grette,
For[{+t{] his heued of he plette -
Wolde he nouth for sinne lette.
Roberd saw +tat dint so hende -
Wolde he neuere +te+te[{n{] wende
Til +tat he hauede ano+ter slawen
With +te swerd he held ut-drawen. 
Willam Wendut his swerd vt-drow,
And +te +tredde so sore he slow
+Tat he made upon +te feld
His lift arm fleye with the swerd.

   Huwe Rauen ne forgat nouth
+Te swerd he hauede +tider brouth:
He kipte it up, and smot ful sore
An erl +tat he saw priken +tore
Ful noblelike upon a stede
+Tat with him wolde al quic wede.
He smot him on +te heued so
+Tat he +te heued clef a two,
And +tat bi +te shuldre-blade
+Te sharpe swerd [{he{] let wade
+Torw the brest unto +te herte.
+Te dint bigan ful sore to smerte,
<P 73>
+Tat +te erl fel dun anon
Al so ded so ani ston.
Quoth Ubbe 'Nu dwelle Ich to longe!'
And leth his stede sone gonge
To Godrich, with a god spere
+Tat he saw ano+ter bere,
And smoth Godrich and Godrich him
Hetelike with herte grim,
So +tat he bo+te felle dune
To +te er+te, first +te croune.
+Tanne he woren fallen dun bo+ten,
Grundlike here swerdes ut-drowen
+Tat weren swi+te sharp and gode,
And fouhten so +tei woren wode,
+Tat +te swot ran fro +te crune
[\NO GAP IN MS\] . . . . . . . .
+Ter mouthe men se [{tw{]o knicthes bete
Ay+ter on o+ter dintes grete,
So +tat with [{+t{]al+terlest dint
Were al to-shiuered a flint.
So was bitwenen hem a fiht,
Fro +te morwen ner [{t{]o +te niht,
So +tat +tei nouth ne bl[{u{]nne
Til +tat to sette bigan +te sunne.
+To yaf Godrich +torw +te side
Vbbe a wunde ful unride,
So +tat +torw +tat ilke wounde
Hauede ben brouth to +te grunde
And his heued al of-slawen,
Yif God ne were and Huwe Rauen,
+Tat drow him fro Godrich awey
And barw him so +tat ilke day.
But er he were fro Godrich drawen,
+Ter were a +tousind knihtes slawen
Bi bo+te halue and mo ynowe.
+Ter +te ferdes togidere slowe,
+Ter was swilk dreping of +te folk
+Tat on +te feld was neuere a polk
<P 74>
+Tat it ne stod of blod so ful
+Tat +te stem ranintil +te hul.
+To tarst bigan Godrich to go
Vpon +te Danshe and faste to slo,
And forthrith, also [{leun{] fares
+Tat neuere kines best ne spares,
+Tanne his gon, for he garte alle
+Te Denshe men biforn him falle.
He felde browne, he felde blake,
+Tat he mouthe ouertake.
Was neuere non +tat mouhte +taue
Hise dintes, noy+ter knith ne knaue,
+Tat he feldem so dos +te gres
Biforn +te sy+te +tat ful sharp [{e{]s.
Hwan Hauelok saw his folk so brittene
And his ferd so swi+te littene,
He cam driuende upon a stede,
And bigan til him to grede,
And seyde 'Godrich, wat is +te,
+Tat +tou fare +tus with me
And mine gode knihtes slos?
Sikerlike, +tou misgos!
+Tou wost ful wel, yif +tu wilt wite,
+Tat A+telwold +te dide site
On knes and sweren on messe-bok,
On caliz and on [{pateyn{] hok,
+Tat +tou hise douhter sholdest yelde,
+Tan she were wimman of elde,
Engelond eueril del.
Godrich +te erl, +tou wost it wel!
Do nu wel withuten fiht
Yeld hire +te lond, for +tat is rith:
Wile Ich forgiue +te +te lathe,
Al mi dede and al mi wrathe,
For Y se +tu art so with
And of +ti bodi so god knith.'
'+Tat ne wile Ich neueremo',
Quoth erl Godrich, 'for Ich shal slo
<P 75>
+Te, and hire forhenge heye!
J shal +trist ut +ti rith eye,
+Tat +tou lokes with on me,
But +tu swi+te he+ten fle!'
He grop +te swerd ut sone anon,
And hew on Hauelok ful god won,
So +tat he clef his sheld on two.
Hwan Hauelok saw +tat shame do
His bodi +ter biforn his ferd,
He drow ut sone his gode swerd,
And smot him so upon +te crune
+Tat Godrich fel to +te er+te adune.
But Godrich stirt up swi+te sket - 
Lay he nowth longe at hise fet - 
And smot him on +te sholdre so
+Tat he dide +tare undo
Of his brinie ringes mo
+Tan +tat Ich kan tellen fro,
And woundede him rith in +te flesh,
+Tat tendre was and swi+te nesh,
So +tat +te blod ran til his to.
+To was Hauelok swi+te wo,
+Tat he hauede of him drawe[{n{]
Blod and so sore him slawen.
Hertelike til him he wente
And Godrich +ter fulike shente,
For his swerd he hof up heye,
And +te hand he dide of-fleye
+Tat he smot him with so sore -
Hw mithe he don him shame more?

   Hwan he hauede him so shamed,
His hand of-plat and yuele lamed,
He tok him sone bi +te necke
Als a traytour (da+teyt wo recke!),
And dide him binde and fetere wel
With gode feteres al of stel,
And to +te quen he sende him,
<P 76>
+Tat birde wel to him ben grim,
And bad she sholde don him gete,
And +tat non ne sholde him bete
Ne shame do, for he was knith,
Til knithes haueden demd him rith.
+Tan +te Englishe men +tat sawe,
+Tat +tei wisten, heye and lawe,
+Tat Goldeboru +tat was so fayr
Was of Engeland rith eyr,
And +tat +te king hire hauede wedded,
And haueden ben samen bedded,
He comen alle to crie 'merci',
Vnto +te king at one cri,
And beden him sone manrede and oth
+Tat he ne sholden, for lef ne loth,
Neueremore ageyn him go
Ne ride, for wele ne for wo.

   +Te king ne wolde nouth forsake
+Tat he ne shulde of hem take
Manrede +tat he beden and ok
Hold-o+tes sweren on +te bok.
But or bad he +tat +tider were brouth
+Te quen for hem (swilk was his +touth)
For to se and forto shawe
Yif +tat he hire wolde knawe.
+Toruth hem witen wolde he
Yif +tat she aucte quen to be.

   Sixe erles weren sone yare
After hire for to fare:
He nomen onon and comen sone,
And brouthen hire, +tat under mone
Jn al +te werd ne hauede per
Of hendeleik, fer ne ner.
Hwan she was come +tider, alle
+Te Englishe men bigunne to falle
O knes, and greten swi+te sore,
And seyden 'Leuedi, K[{r{]istes ore
<P 77>
And youres! We hauen misdo mikel,
+Tat we ayen you haue be fikel,
For Englond auhte for to ben
Youres, and we youre men.
Js non of us, yung ne old,
+Tat [{he{] ne wot +tat A+telwold
Was king of +tis kunerike
And ye his eyr, and +tat +te swike
Haues it halden with mikel wronge -
God leue him sone to honge!'

   Quot Hauelok 'Hwan +tat ye it wite,
Nu wile Ich +tat ye doun-site;
And after Godrich haues wrouht,
+Tat haues in sorwe himself brouth,
Lokes +tat ye demen him rith
(For dom ne spare[{+d{] clerk ne knith),
And si+ten shal Ich understonde
Of [{y{]ou, after lawe of londe,
Manrede and holde-o+tes bo+te,
Yif ye it wilen and ek rothe.'
Anon +ter dune he hem sette,
For non +te dom ne durste lette,
And demden him to binden faste
Vpon an asse swi+te unwraste,
(Andelong, nouht ouer+twert,
His nose went unto +te stert)
And so to Lincolne lede,
Shamelike in wicke wede;
And, hwan he cam unto +te borw,
Shamelike ben led +ter-+toru,
Bi-sou+te +te borw unto a grene 
+Tat +tare is yet, als Y wene,
And +tere be bunden til a stake,
Abouten him ful gret fir make,
And al to dust be brend rith +tere. 
And yet demden he +ter more,
<P 78>
O+ter swikes for to warne:
+Tat hise children shulde +tarne
Eueremore +tat eritage
+Tat his was, for hise utrage.

   Hwan +te dom was demd and seyd,
Sket was +te swike on +te asse leyd,
And [{led hun{]til +tat ilke grene
And brend til asken, al bidene.
+To was Goldeboru ful bli+te -
She +tanked God fele sy+te
+Tat +te fule swike was brend
+Tat wende wel hire bodi haue shend,
And seyde 'Nu is time to take
Manrede of brune and of blake
+Tat Ich se ride and go,
Nu Ich am wreke of mi fo!'

   Hauelok anon manrede tok
Of alle Englishe on +te bok,
And dide hem grete o+tes swere
+Tat he sholden him god feyth bere,
Ageyn alle +tat woren liues
And +tat sholde ben born of wiues. 



