<B CMHORN>
<Q MX/2 NI ROM HORN>
<N HORN>
<A X>
<C MX/2>
<O X>
<M 1250-1350>
<K X>
<D SL>
<V VERSE>
<T ROMANCE>
<G X>
<F X>
<W WRITTEN>
<X X>
<Y X>
<H X>
<U X>
<E X>
<J X>
<I X>
<Z NARR IMAG>
<S SAMPLE X>


[^TEXT:  KING HORN.
KING HORN, FLORIZ, AND BLAUNCHEFLUR,
THE ASSUMPTION OF OUR LADY, VOL. I.
EARLY ENGLISH TEXT SOCIETY, O.S. 14. 
ED. J. R. LUMBY AND G. H. MCKNIGHT. 
LONDON, 1962 (1866). 
PP. 1.1 - 69.1651 (CAMBR. UNIV. MS. GG. 4.27.2)^]

<P 1>
Alle beon he bli+te
+Tat to my song ly+te,
A sang ihc schal +gou singe
Of Murry +te kinge.
King he was biweste 
So longe so hit laste.
Godhild het his quen;
Faire ne mi+gte non ben.
He hadde a sone +tat het horn;
Fairer ne miste non beo born,
Ne no rein vpon birine,
Ne sunne vpon bischine.
Fairer nis non +tane he was;
He was bri+gt so +te glas.
He was whit so +te flur,
Rose red was his colur.
<P 2>
In none kinge riche
Nas non his iliche.
Twelf feren he hadde
+Tat alle wi+t him ladde,
Alle riche mannes sones,
And alle hi were faire gomes,
Wi+t him for to pleie.
And mest he luuede tweie;
+Tat on him het ha+tulf child,
And +tat o+ter ffikenild.
A+tulf was +te beste
And fikenylde +te werste.
Hit was vpon a someres day,
Also ihc +gou telle may,
Murri +te gode king
Rod on his pleing
Bi +te se side,
Ase he was woned ride.
He fond bi +te stronde,
Ariued on his londe,
Schipes fiftene,
Wi+t sarazins kene.
<P 3>
He axede what iso+gte
O+ter to londe bro+gte.
A Payn hit of herde
And hym wel sone answarede,
"+Ti lond folk we schulle slon
And alle +tat Crist luue+t vpon,
And +te selue ri+gt anon;
Ne schaltu todai henne gon."
+Te kyng ali+gte of his stede,
For +to he hauede nede,
And his gode kni+gtes two;
Al to fewe he hadde +to.
Swerd hi gunne gripe
And to gadere smite.
Hy smyten vnder schelde 
+Tat sume hit yfelde.
+Te king hadde al to fewe
To+genes so vele schrewe.
So fele mi+gten y+te
Bringe hem +tre to di+te.
+Te pains come to londe
And neme hit in here honde.
+Tat folc hi gunne quelle
And churchen for to felle.
<P 4>
+Ter ne moste libbe
+Te fremde ne +te sibbe,
Bute hi here la+ge asoke
And to here toke.
Of alle wymmanne
Wurst was godhild +tanne.
For Murri heo weop sore
And for horn +gute more.
He wenten vt of halle,
Fram hire Maidenes alle,
Vnder a roche of stone.
+Ter heo liuede alone.
+Ter heo seruede gode,
A+genes +te paynes forbode.
+Ter he seruede criste,
+Tat no payn hit ne wiste.
Euere heo bad for horn child,
+Tat Iesu crist him beo myld.
Horn was in paynes honde
Wi+t his feren of +te londe.
Muchel was his fairhede,
For ihesu crist him makede.
<P 5>
Payns him wolde slen
O+ter al quic flen.
+Gef his fairnesse nere,
+Te children alle asla+ge were.
+Tanne spak on Admirad,
Of wordes he was bald,
"Horn, +tu art wel kene,
And +tat is wel isene;
+Tu art gret and strong,
fair and euene long.
+Tu schalt waxe more
Bi fulle seue +gere.
+Gef +tu mote to liue go,
And +tine feren also,
+Gef hit so bi falle,
+Ge scholde slen vs alle.
+Taruore +tu most to stere,
+Tu and +tine ifere.
To schupe schulle +ge funde
And sinke to +te grunde.
+Te se +gou schal adrenche;
Ne schal hit us no+gt of +tinche.
For if +tu were aliue,
Wi+t swerd o+ter wi+t kniue
<P 6>
We scholden alle deie,
And +ti fader de+t abeie."
+Te children hi bro+gte to stronde,
Wringinde here honde,
Into schupes borde
At +te furste worde.
Ofte hadde horn beo wo,
At neure wurs +tan him was +to.
+Te se bigan to flowe
And hornchild to rowe.
+Te se +tat schup so faste drof,
+Te children dradde +ter of.
Hi wenden to wisse
Of here lif to misse,
Al +te day and al +te ni+gt,
Til hit sprang dai li+gt.
Til horn sa+g on +te stronde
Men gon in +te londe.
"Feren," qua+t he, "+gonge,
Ihc telle +gou ti+tinge.
<P 7>
Ihc here fo+geles singe
And +tat gras him springe.
Bli+te beo we on lyue,
Vre schup is on ryue."
Of schup hi gunne funde
And setten fout to grunde.
Bi +te se side
Hi leten +tat schup ride.
+Tanne spak him child horn,
In suddene he was iborn,
"Schup, bi +te se flode,
Daies haue +tu gode;
Bi +te se brinke
No water +te na drinke.
+Gef +tu cume to Suddenne,
Gret +tu wel of myne kenne;
Gret +tu wel my moder,
Godhild, quen +te gode.
And seie +te paene kyng,
Iesucristes wi+tering,
+tat ihc am hol and fer
On +tis lond ariued her.
<P 8>
And seie +tat hei schal fonde
+Te dent of myne honde."
+Te children +gede to Tune
Bi dales and bi dune.
Hy metten wi+t almair king,
Crist +geuen him his blessing,
King of Westernesse,
Crist +giue him Muchel blisse.
He him spac to horn child
Wordes +tat were Mild,
"Whannes beo +ge, faire gumes,
+Tat her to londe beo+t icume,
Alle +trottene 
Of bodie swi+te kene?
Bigod +tat me makede,
A swihc fair verade
Ne sau+g ihc in none stunde
Bi westene londe.
Seie me wat +ge seche."
Horn spak here speche,
He spak for hem alle,
Vor so hit moste biualle.
<P 9>
He was +te faireste 
And of wit +te beste.
"We beo+t of Suddenne,
Icome of gode kenne,
Of Cristene blode
And kynges su+te gode.
Payns +ter gunne ariue
And duden hem of lyue.
Hi slo+gen and to dro+ge
Cristenemen ino+ge.
So crist me mote rede,
Vs he dude lede
In to a galeie,
Wi+t +te se to pleie.
Dai hit is igon and o+ter
Wi+tute sail and ro+ter.
Vre schip bigan to swymme
To +tis londes brymme.
Nu +tu mi+gt vs slen, and binde
Vre honde bihynde.
Bute +gef hit beo +ti wille,
Helpe +tat we ne spille."
+Tanne spak +te gode kyng,
I wis he nas no Ni+ting,
<P 10>
"Seie me, child, what is +ti name?
Ne schaltu haue bute game."
+Te child him answerde,
Sone so he hit herde,
"Horn ihc am ihote,
Icomen vt of +te bote,
Fram +te se side,
Kyng, wel mote +te tide."
+Tanne hym spak +te gode king,
"Wel bruc +tu +tin euening.
Horn, +tu go wel schulle
Bi dales and bi hulle.
Horn, +tu lude sune
Bi dales and bi dune.
So schal +ti name springe
Fram kynge to kynge,
And +ti fairnesse
Abute Westernesse,
+Te streng+te of +tine honde
Into Eurech londe.
Horn, +tu art so swete 
Ne may ihc +te forlete."
Hom rod Aylmar +te kyng,
And horn mid him his fundyng
<P 11>
And alle his ifere,
+Tat were him so dere.
+Te kyng com in to halle
Among his kni+gtes alle; 
For+t he clupede a+telbrus,
+Tat was stiward of his hus.
"Stiwarde, tak nu here
Mi fundlyng for to lere
Of +tine mestere,
Of wude and of riuere,
And tech him to harpe
Wi+t his nayles scharpe,
Biuore me to kerue
And of +te cupe serue.
+Tu tech him of alle +te liste
+Tat +tu eure of wiste.
In his feiren +tou wise
In to o+tere seruise.
Horn +tu vnderuonge
And tech him of harpe and songe."
Ailbrus gan lere
Horn and his yfere.
<P 12>
Horn in herte la+gte
Al +tat he him ta+gte.
In +te curt and vte,
And elles al abute,
Luuede men horn child;
And mest him louede Rymenhild,
+Te kynges o+gene dofter.
He was mest in +to+gte.
Heo louede so horn child,
+Tat ne+g heo gan wexe wild;
For heo ne mi+gte at borde
Wi+t him speke no worde,
Ne no+gt in +te halle
Among +te kni+gtes alle,
Ne nowhar in non o+tere stede,
Of folk heo hadde drede,
Bi daie ne bi ni+gte,
Wi+t him speke ne mi+gte.
Hire sore+ge ne hire pine
Ne mi+gte neure fine.
In heorte heo hadde wo,
And +tus hire bi+to+gte +to.
Heo sende hire sonde
A+telbrus to honde,
<P 13>
+Tat he come hire to,
And also scholde horn do
Al in to bure,
ffor heo gan to lure.
And +te sonde seide
+Tat sik lai +tat maide,
And bad him come swi+te
For heo nas no+ting bli+te.
+Te stuard was in herte wo,
For he nuste what to do.
Wat Rymenhild hure +to+gte,
Gret wunder him +tu+gte.
Abute horn +te +gonge
To bure for to bringe,
He +to+gte upon his mode
Hit nas for none gode.
He tok him ano+ter,
Athulf, hornes bro+ter.
"A+tulf," he sede, "ri+gt anon
+Tu schalt wi+t me to bure gon,
To speke wi+t Rymenhild stille
And witen hure wille.
In hornes ilike
+Tu schalt hure biswike.
<P 14>
Sore ihc me ofdrede
He wolde horn misrede."
A+telbrus gan A+tulf lede
And in to bure wi+t him +gede.
Anon vpon A+tulf child
Rymenhild gan wexe wild.
He wende +tat horn hit were
+Tat heo hauede +tere.
Heo sette him on bedde,
Wi+t A+tulf child he wedde.
On hire armes tweie
A+tulf heo gan leie.
"Horn," qua+t heo, "wel longe
Ihc habbe +te luued stronge.
+Tu schalt +ti trew+te pli+gte
On myn hond her ri+gte,
Me to spuse holde,
And ihc +te lord to wolde."
A+tulf sede on hire ire,
So stille so hit were,
"+Ti tale nu +tu lynne,
For horn nis no+gt her inne.
<P 15>
Ne beo we no+gt iliche,
Horn is fairer and riche,
Fairer bi one ribbe
+Tane eni Man +tat libbe.
+Te+g horn were vnder Molde,
O+ter elles wher he wolde,
O+ter henne a +tusend Mile,
Ihc nolde him ne +te bigile."
Rymenhild hire biwente,
And A+telbrus fule heo schente.
"Hennes +tu go, +tu fule +teof,
Ne wurstu me neure more leof
Went vt of my bur,
Wi+t muchel mesauenteur.
Schame mote +tu fonge
And on hi+ge rode anhonge.
Ne spek ihc no+gt wi+t horn,
Nis he no+gt so vnorn.
Hor[{n{] is fairer +tane beo he,
Wi+t muchel schame mote +tu deie."
A+telbrus in a stunde
Fel anon to grunde.
"Lefdi, Min o+ge,
Li+te me a litel +tro+ge.
<P 16>
Lust whi ihc wonde
Bringe +te horn to honde.
For horn is fair and riche,
Nis no whar his iliche.
Aylmar, +te gode kyng,
Dude him on mi lokyng.
+Gef horn were her abute,
Sore y me dute
Wi+t him +ge wolden pleie
Bitwex +gou selue tweie.
+Tanne scholde wi+tuten o+te
+Te kyng maken vs wro+te.
Rymenhild, for+gef me +ti tene,
Lefdi, my quene,
And horn ihc schal +te fecche,
Wham so hit recche."
Rymenhild, +gef he cu+te,
Gan lynne wi+t hire Mu+te.
Heo makede hire wel bli+te
Wel was hire +tat si+te.
"Go nu," qua+t heo, "sone,
And send him after none
Whane +te kyng arise,
On a squieres wise.
<P 17>
To wude for to pleie.
Nis non +tat him biwreie;
He schal wi+t me bileue
Til hit beo nir eue,
To hauen of him mi wille.
After ne recchecche what me telle."
Aylbrus wende hire fro;
Horn in halle fond he +to,
Bifore +te kyng on benche,
Wyn for to schenche.
"Horn," qua+t he, "so hende,
To bure nu +tu wende,
After mete stille,
Wi+t Rymenhild to duelle.
Wordes su+te bolde
In herte +tu hem holde.
Horn, beo me wel trewe;
Ne schal hit +te neure rewe."
Horn in herte leide
Al +tat he him seide.
He +geode in wel ri+gte
To Rymenhild +te bri+gte.
<P 18>
On knes he him sette,
And sweteliche hure grette.
Of his feire si+gte
Al +te bur gan li+gte.
He spac faire speche;
Ne dorte him noman teche.
"Wel +tu sitte and softe,
Rymenhild +te bri+gte,
Wi+t +tine Maidenes sixe
+Tat +te sitte+t nixte.
Kinges stuard vre
Sende me in to bure.
Wi+t +te speke ihc scholde;
Seie me what +tu woldest.
Seie, and ich schal here,
What +ti wille were."
Rymenhild vp gan stonde
And tok him bi +te honde.
Heo sette him on pelle,
Of wyn to drinke his fulle.
Heo makede him faire chere
And tok him abute +te swere.
Ofte heo him custe,
So wel so hire luste.
<P 19>
"Horn," heo sede, "wi+tute strif
+Tu schalt haue me to +ti wif.
Horn, haue of me rew+te,
And plist me +ti trew+te."
Horn +to him bi+to+gte
What he speke mi+gte.
"Crist," qua+t he, "+te wisse,
And +giue +te heuene blisse
Of +tine husebonde,
Wher he beo in londe;
Ihc am ibore to lowe
Such wimman to knowe.
Ihc am icome of +tralle,
And fundling bifalle.
<P 20>
Ne feolle hit +te of cunde
To spuse beo me bunde.
Hit nere no fair wedding
Bitwexe a +tral and a king."
+To gan Rymenhild mis lyke,
And sore gan to sike.
Armes heo gan bu+ge;
Adun he feol iswo+ge.
Horn in herte was ful wo,
And tok hire on his armes two.
He gan hire for to kesse,
Wel ofte mid ywisse.
"Lemman," he sede, "dere,
+Tin herte nu +tu stere.
Help me to kni+gte,
Bi al +tine mi+gte
To my lord +te king,
+Tat he me +giue dubbing.
+Tanne is mi +tralhod
Iwent in to kni+gthod,
And i schal wexe more,
And do, lemman, +ti lore."
Rymenhild, +tat swete +ting,
Wakede of hire swo+gning.
<P 21>
"Horn," qua+t heo, "vel sone
+Tat schal beon idone.
+Tu schalt beo dubbed kni+gt
Are come seue ni+gt.
Haue her +tis cuppe,
And +tis Ring +ter vppe,
To Aylbrus and stuard,
And se he holde foreward.
Seie ich him biseche,
Wi+t loueliche speche,
+Tat he adun falle
Bifore +te king in halle,
And bidde +te king ari+gte
Dubbe +te to kni+gte.
Wi+t seluer and wi+t golde
Hit wur+t him wel i+golde.
Crist him lene spede
+Tin erende to bede."
Horn tok his leue,
For hit was ne+g eue.
A+telbrus he so+gte
And +gaf him +tat he bro+gte,
And tolde him ful +gare
Hu he hadde ifare,
<P 22>
And sede him his nede,
And bihet him his mede.
A+telbrus also swi+te 
Wente to halle bliue.
"Kyng," he sede, "+tu leste
A tale mid +te beste.
+Tu schalt bere crune
Tomore+ge in +tis tune. 
Tomore+ge is +ti feste;
+Ter bihoue+t geste.
Hit nere no+gt for loren
For to kni+gti child horn
+Tine armes for to welde;
God kni+gt he schal +gelde."
+Te king sede sone,
"+Tat is wel idone.
Horn me wel iqueme+t;
God kni+gt him biseme+t.
He schal haue mi dubbing
And afterward mi derling.
And alle his feren twelf
He schal kni+gten him self.
<P 23>
Alle he schal hem kni+gte
Bifore me +tis ni+gte."
Til +te li+gt of day sprang
Ailmar him +tu+gte lang.
+Te day bigan to springe, 
Horn com biuore +te kinge,
Mid his twelf yfere;
Sume hi were lu+tere.
Horn he dubbede to kni+gte 
Wi+t swerd and spures bri+gte.
He sette him on a stede whit;
+Ter nas no kni+gt hym ilik.
He smot him a litel wi+gt
And bed him beon a god kni+gt.
A+tulf fel a knes +tar
Biuore +te king Aylmar.
"King," he sede, "so kene,
Grante me a bene.
Nu is kni+g[{t{] sire horn
+Tat in suddenne was iboren.
Lord he is of londe,
Ouer us +tat bi him stonde.
+Tin armes he ha+t and scheld,
To fi+gte wi+t vpon +te feld.
<P 24>
Let him vs alle kni+gte,
For +tat is vre ri+gte."
Aylmar sede sone ywis,
"Do nu +tat +ti wille is."
Horn adun li+gte 
And makede hem alle kni+gtes.
Murie was +te feste,
Al of faire gestes.
Ac Rymenhild nas no+gt +ter,
And +tat hire +tu+gte seue +ger.
After horn heo sente,
And he to bure wente.
Nolde he no+gt go one;
A+tulf was his mone.
Rymenhild on flore stod,
Hornes come hire +tu+gte god,
And sede, "Welcome, sire horn,
And A+tulf, kni+gt +te biforn.
Kni+gt, nu is +ti time
For to sitte bi me.
Do nu +tat +tu er of spake,
To +ti wif +tume take.
Ef +tu art trewe of dedes,
Do nu ase +tu sedes.
<P 25>
Nu +tu hast wille +tine,
Vnbind me of my pine."
"Rymenhild," qua+t he, "beo stille;
Ihc wulle don al +ti wille.
Also hit mot bitide,
Mid spere ischal furst ride,
And mi kni+gthod proue,
Ar ihc +te ginne to wo+ge.
We be+t kni+gtes +gonge,
Of o dai al isprunge,
And of vre mestere
So is +te manere,
Wi+t sume o+tere kni+gte
Wel for his lemman fi+gte,
Or he eni wif take;
For +ti me stonde+t +te more rape.
Today, so crist me blesse,
Ihc wulle do pruesse
For +ti luue in +te felde,
Mid spere and mid schelde.
If ihc come te lyue,
Ihc schal +te take to wyue."
"Kni+gt," qua+t heo, "trewe,
Ihc wene ihc mai +te leue.
<P 26>
Tak nu her +tis gold ring,
God him is +te dubbing.
+Ter is vpon +te ringe
Igraue, 'Rymenhild +te +gonge.'
+Ter nis non betere anonder sunne,
+Tat eni man of telle cunne.
For my luue +tu hit were,
And on +ti finger +tu him bere.
+Te stones beo+t of suche grace,
+Tat +tu ne schalt in none place
Of none duntes beon ofdrad,
Ne on bataille beon amad,
Ef +tu loke +teran
And +tenke vpon +ti lemman.
And sire A+tulf, +ti bro+ter,
He schal haue ano+ter.
Horn, ihc +te biseche
Wi+t loueliche speche,
Crist +geue god erndinge,
+Te a+gen to bringe."
+Te kni+gt hire gan kesse,
And heo him to blesse.
<P 27>
Leue at hire he nam
And in to halle cam.
+Te kni+gtes +geden to table,
And horne +gede to stable.
+Tar he tok his gode fole,
Also blak so eny cole.
+Te fole schok +te brunie,
+Tat al +te curt gan denie.
+Te fole bigan to springe,
And horn murie to singe.
Horn rod in a while
More +tan a myle.
He fond o schup stonde
Wi+t he+tene honde.
He axede what hi so+gte,
O+ter to londe bro+gte.
An hund him gan bihelde
+Tat spac wordes belde,
"+Tis lond we wulle+g wynne,
And sle +tat +ter is inne."
<P 28>
Horn gan his swerd gripe
And on his arme wype.
+Te sarazins he smatte,
+Tat his blod hatte.
At eureche dunte
+Te heued of wente.
+To gunne +te hundes gone,
Abute horn al one.
He lokede on +te ringe,
And +to+gte on rimenilde.
He slo+g +ter on haste
On hundred bi +te laste.
Ne mi+gte noman telle
+Tat folc +tat he gan quelle.
Of alle +tat were aliue 
Ne mi+gte +ter non +triue.
Horn tok +te maisteres heued,
+Tat he hadde him bireued,
And sette hit on his swerde,
Anouen at +tan orde.
He verde hom in to halle,
Among +te kni+gtes alle.
"Kyng," he sede, "wel +tu sitte,
And alle +tine kni+gtes mitte.
<P 29>
To day, after mi dubbing,
So i rod on mi pleing,
I fond o schup Rowe,
+To hit gan to flowe,
Al wi+t sarazines kyn,
And none londisse Men.
To dai, for to pine
+Te and alle +tine.
Hi gonne me assaille.
Mi swerd me nolde faille;
I smot hem alle to grunde,
O+ter +gaf hem di+tes wunde.
+Tat heued i +te bringe
Of +te maister kinge.
Nu is +ti wile i+golde,
King, +tat +tu me kni+gti woldest."
A More+ge +to +te day gan springe,
+Te king him rod an huntinge.
At hom lefte ffikenhild,
+Tat was +te wurste moder child.
Heo ferde in to bure,
To sen auenture.
<P 30>
Heo sa+g Rymenild sitte
Also he were of witte.
Heo sat on +te sunne,
Wi+t tieres al birunne.
Horn sede, "lef +tin ore,"
Wi wepestu so sore?"
Heo sede, "no+gt i ne wepe;
Bute ase i lay aslepe,
To +te se my net icaste,
And hit nolde no+gt ilaste.
A gret fiss at +te furste,
Mi net he gan to berste.
Ihc wene +tat ihc schal leose
+Te fiss +tat ihc wolde cheose."
"Crist," qua+t horn, " and seint steuene,
Turne +tine sweuene.
Ne schal i +te biswike,
Ne do +tat +te mislike.
I schal me make +tin owe,
To holden and to knowe,
<P 31>
For eurech o+tere wi+gte;
And +tarto mi treu+te i +te pli+gte."
Muchel was +te ru+te
+Tat was at +tare tru+te,
For Rymenhild weop ille,
And horn let +te tires stille.
"Lemman," qua+t he, "dere,
+Tu schalt more ihere.
+Ti sweuen schal wende,
O+ter sum Man schal vs schende.
+Te fiss +tat brak +te lyne,
Ywis he do+t us pine.
+Tat schal don vs tene
And wur+t wel sone isene."
Aylmar rod bi sture,
And horn lai in bure.
Fykenhild hadde enuye
And sede +tes folye: - 
"Aylmar, ihc +te warne,
Horn +te wule berne.
Ihc herde whar he sede,
And his swerd for+t leide,
To bringe +te of lyue,
And take Rymenhild to wyue.
<P 32>
He li+t in bure,
Vnder couerture,
By Rymenhild, +ti do+gter;
And so he do+t wel ofte.
And +tider +tu go al ri+gt;
+Ter +tu him finde mi+gt.
+Tu do him vt of londe,
o+ter he do+t +te schonde."
Aylmar a+gen gan turne,
Wel Modi and wel Murne.
He fond horn in arme,
On Rymenhild barme.
"Awei vt," he sede, "fule +teof,
Ne wurstu me neuremore leof.
Wend vt of my bure,
Wi+t muchel messauenture.
Wel sone bute +tu flitte, 
Wi+t swerde ihc +te anhitte.
Wend ut of my londe,
O+ter +tu schalt haue schonde."
<P 33>
Horn sadelede his stede,
And his armes he gan sprede. 
His brunie he gan lace,
So he scholde, in to place.
His swerd he gan fonge;
Nabod he no+gt to longe.
He +gede for+t bliue
To Rymenhild his wyue.
He sede, "lemman, derling,
Nu hauestu +ti sweuening.
+Te fiss +tat +ti net rente,
Fram +te he me sente.
Rymenhild, haue wel godne day,
No leng abiden i ne may.
In to vncu+te londe,
Wel more for to fonde.
I schal wune +tere 
Fulle seue +gere.
At seue +geres ende,
+Gef i ne come ne sende,
<P 34>
Tak +te husebonde,
ffor me +tu ne wonde.
In armes +tu me fonge,
And kes me wel longe."
He custe him wel a stunde,
And Rymenhild feol to grunde. 
Horn tok his leue;
Ne mi+gte he no leng bileue.
He tok A+tulf, his fere,
Al abute +te swere,
And sede, "kni+gt so trewe,
Kep wel mi luue newe.
+Tu neure me ne forsoke,
Rymenhild +tu kep and loke."
His stede he gan bistride,
And for+t he gan ride.
To +te hauene he ferde,
And a god schup he hurede,
+Tat him scholde londe
In westene londe.
A+tulf weop wi+t i+ge,
And al +tat him isi+ge.
<P 35>
To lond he him sette,
And fot on stirop sette.
He fond bi +te weie,
Kynges sones tweie;
+Tat on him het harild,
And +tat o+ter berild.
Berild gan him preie
+Tat he scholde him seie
What his name were,
And what he wolde +tere.
"Cutberd," he sede, "ihc hote,
Icomen vt of +te bote,
Wel feor fram bi weste,
To seche mine beste."
Berild gan him nier ride,
And tok him bi +te bridel.
"Wel beo +tu, kni+gt, ifounde;
Wi+t me +tu lef a stunde.
Also mote i sterue,
+Te king +tu schalt serue.
Ne sa+g i neure my lyue
So fair kni+gt aryue."
Cutberd heo ladde in to halle,
And he a kne gan falle.
<P 36>
He sette him a knewelyng,
And grette wel +te gode kyng.
+Tanne sede Berild sone,
"Sire king, of him +tu hast to done.
Bitak him +ti lond to werie;
Ne schat hit noman derie,
For he is +te faireste man
+Tat eure+gut on +ti londe cam."
+Tanne sede +te king so dere,
"Welcome beo +tu here.
Go nu, Berild, swi+te,
And make him ful bli+te.
And whan +tu farst to wo+ge,
Tak him +tine gloue.
Iment +tu hauest to wyue,
Awai he schal +te dryue;
For Cutberdes fairhede
Ne schal +te neure wel spede."
Hit was at Cristesmasse,
Nei+ter more ne lasse,
+Ter cam in at none,
A Geaunt su+te sone,
<P 37>
Iarmed fram paynyme,
And seide +tes ryme: - 
"Site stille, sire kyng,
And herkne +tis ty+tyng.
Her bu+t paens ariued,
Wel mo +tane fiue.
Her beo+t on +te sonde,
King, vpon +ti londe.
On of hem wile fi+gte
A+gen +tre kni+gtes.
+Gef o+ter +tre slen vre,
Al +tis lond beo +goure;
+Gef vre on ouercome+t +gour +treo,
Al +tis lond schal vre beo.
Tomore+ge be +te fi+gtinge,
Whan +te li+gt of daye springe."
+Tanne sede +te kyng +turston,
"Cutberd schal beo +tat on;
Berild schal beo +tat o+ter;
+Te +tridde, Alrid, his bro+ter.
For hi beo+t +te strengeste,
And of armes +te beste.
Bute what schal vs to rede?
Ihc wene we be+t alle dede." 
<P 38>
Cutberd sat at borde,
And sede +tes wordes: - 
"Sire king, hit nis no ri+gte,
On wi+t +tre to fi+gte;
A+gen one hunde,
+Tre cristen men to fonde.
Sire, i schal al one,
Wi+tute more ymone,
Wi+t mi swerd wel e+te
Bringe hem +tre to de+te."
+Te kyng aros a more+ge,
+Tat hadde muchel sor+ge;
And Cutberd ros of bedde,
Wi+t armes he him schredde.
Horn his brunie gan on caste,
And lacede hit wel faste,
And cam to +te kinge,
At his vp risinge.
"King," he sede, "cum to fel[{de{] ,
For to bihelde
Hu we fi+gte schulle,
And togare go wulle."
Ri+gt at prime tide,
Hi gunnen ut ride,
<P 39>
And funden on a grene,
A geaunt su+te kene,
His feren him biside,
Hore de+t to abide.
+Teilke bataille
Cutberd gan assaille.
He +gaf dentes ino+ge;
+Te kni+gtes felle iswo+ge.
His dent he gan wi+tdra+ge,
For hi were ne+g asla+ge.
And sede, "kni+gtes, nu +ge reste
One while, ef +gou leste."
Hi sede, "hi neure nadde
Of kni+gte dentes so harde.
He was of hornes kunne,
Iborn in suddenne."
Horn him gan to agrise,
And his blod arise.
Biuo him sa+g he stonde
+Tat driuen him of londe,
And +tat his fader slo+g.
To him his swerd he dro+g.
<P 40>
He lokede on his rynge,
And +to+gte on Rymenhilde.
He smot him +ture+g +te herte,
+Tat sore him gan to smerte.
+Te paens +tat er were so sturne,
Hi gunne awei vrne.
Horn and his compaynye
Gunne after hem wel swi+te hi+ge,
And slo+gen alle +te hundes,
Er hi here schipes funde.
To de+te he hem alle bro+gte;
His fader de+t wel dere hi bo+gte.
Of alle +te kynges kni+gtes,
Ne scapede +ter no wi+gte.
<P 41>
Bute his sones tweie
Bifore him he sa+g deie.
+Te king bigan to grete,
And teres for to lete.
Me leiden hem in bare,
And burden hem ful +gare.
+Te king com in to halle,
Among his kni+gtes alle.
"Horn," he sede, "i seie +te,
Do as i schal rede +te.
Asla+gen be+t mine heirs,
And +tu art kni+gt of muchel pris,
And of grete streng+te,
And fair o bodie leng+te.
Mi Rengne +tu schalt welde,
And to spuse helde
Reynild, mi do+gter,
+Tat sitte+t on +te lofte."
"O sire king, wi+t wronge
Scholte ihc hit vnderfonge.
+Ti do+gter +tat +ge me bede,
Ower rengne for to lede.
<P 42>
Welmore ihc schal +te serue,
Sire kyng, or +tu sterue.
+Ti sorwe schal wende
Or seue +geres ende.
Wanne hit is wente,
Sire king, +gef me mi rente.
Whanne i +ti do+gter +gerne,
Ne schaltu me hire werne."
Cutberd wonede +tere
Fulle seue +gere,
+Tat to Rymenild he ne sente,
Ne him self ne wente.
Rymenild was in Westernesse,
Wi+t wel muchel sorinesse.
A king +ter gan ariue
+Tat wolde hire haue to wyue.
Aton he was wi+t +te king,
Of +tat ilke wedding.
+Te daies were schorte,
+Tat Riminhild ne dorste
Leten in none wise.
A writ he dude deuise;
<P 43>
A+tulf hit dude write,
+Tat horn ne luuede no+gt lite.
Heo sende hire sonde
To euereche londe,
To seche horn, +te kni+gt,
+Ter me him finde mi+gte.
Horn no+gt +ter of ne herde,
Til, o dai +tat he ferde
To wude for to schete,
A knaue he gan imete.
Horn seden, "Leue fere,
Wat sechestu here?"
"Kni+gt, if beo +ti wille,
I mai +te sone telle.
I seche fram bi weste,
Horn of westernesse,
For a Maiden Rymenhild
+Tat for him gan wexe wild.
A king hire wile wedde,
And bringe to his bedde,
King Modi of Reynes,
On of hornes enemis.
Ihc habbe walke wide
Bi +te se side,
<P 44>
Nis he no war ifunde,
Walawai +te stunde.
Wailaway +te while,
Nu wur+t Rymenild bigiled."
Horn iherde wi+t his ires,
And spak wi+t bidere tires,
"Knaue, wel +te bitide,
Horn stonde+t +te biside.
A+gen to hure +tu turne,
And seie +tat heo ne murne,
For i schal beo +ter bitime,
A soneday bi pryme."
+Te knaue was wel bli+te,
And hi+gede a+gen bliue.
+Te se bigan to +tro+ge
Vnder hire wo+ge.
+Te knaue +ter gan adrinke;
Rymenhild hit mi+gte of +tinke.
Rymenhild vndude +te dure pin
Of +te hus +ter heo was in,
<P 45>
To loke wi+t hire i+ge,
If heo o+gt of horn isi+ge.
+To fond heo +te knaue adrent
+Tat he hadde for horn isent,
And +tat scholde horn bringe;
Hire fingres he gan wringe.
Horn cam to +turston +te kyng,
And tolde him +tis ti+ting.
+To he was iknowe
+Tat Rimenh[{ild{] was hise o+ge,
Of his gode kenne,
+Te king of suddenne,
And hu he slo+g in felde
+Tat his fader quelde,
And seide, "king +te wise,
+Geld me mi seruise.
Rymenhild help me winne;
+Tat +tu no+gt ne linne,
And i schal do to spuse
+Ti do+gter wel to huse.
Heo schal to spuse haue
A+tulf, mi gode fela+ge,
God kni+gt mid +te beste,
And +te treweste."
<P 46>
+Te king sede so stille,
"Horn, haue nu +ti wille."
He dude writes sende
Into yrlonde,
After kni+gtes li+gte,
Irisse men to fi+gte.
To horn come ino+ge,
+Tat to schupe dro+ge.
Horn dude him in +te weie,
On a god Galeie.
+Te him gan to blowe
In a litel +tro+ge.
+Te se bigan to posse
Ri+gt in to Westernesse.
Hi strike seil and maste,
And Ankere gunne caste,
Or eny day was sprunge
O+ter belle irunge.
+Te word bigan to springe
Of Rymenhilde weddinge.
Horn was in +te watere;
Ne mi+gte he come no latere.
He let his schup stonde,
And +gede to londe.
<P 47>
His folk he dude abide
Vnder wude side.
Hor[{n{] him +gede alone,
also he sprunge of stone. 
A palmere he +tar mette,
And faire hine grette.
"Palmere, +tu schalt me telle
Al of +tine spelle."
He sede vpon his tale,
"I come fram o brudale,
Ihc was at o wedding
Of a Maide Rymenhild.
Ne mi+gte heo adri+ge
+Tat heo ne weop wi+t i+ge.
Heo sede +tat 'heo nolde
Ben ispused wi+t golde;
Heo hadde on husebonde,
+Te+g he were vt of londe.'
And in strong halle,
Bi+tinne castel walle,
<P 48>
+Ter i was atte +gate;
Nolde hi me in late.
Modi ihote hadde
To bure +tat me hire ladde.
Awai i gan glide;
+Tat deol i nolde abide.
+Te bride wepe+t sore,
And +tat is muche deole!"
Qua+t horn, "So crist me rede,
We schulle chaungi wede.
Haue her clo+tes myne,
And tak me +ti sclauyne.
Today i schal +ter drinke,
+Tat some hit schulle of+tinke."
His sclauyn he dude dun legge,
And tok hit on his rigge.
He tok horn his clo+tes,
+Tat nere him no+gt lo+te.
Horn tok burdon and scrippe,
And wrong his lippe. 
He makede him a ful chere,
And al bicolmede his swere.
He makede him vn bicomelich;
Hes he nas neuremore ilich.
<P 49>
He com to +te gateward,
+Tat him answerede hard.
Horn bad undo softe,
Mani tyme and ofte.
Ne mi+gte he awynne
+Tat he come +terinne.
Horn gan to +te +gate turne,
And +tat wiket vnspurne. 
+Te boye hit scholde abugge;
Horn +treu him ouer +te brigge,
+Tat his ribbes him to brake;
And su+t+te com in atte gate.
He sette him wel lo+ge,
In beggeres rowe.
He lokede him abute,
Wi+t his colmie snute.
He se+g Rymenhild sitte
Ase heo were of witte,
Sore wepinge and +gerne;
Ne mi+gte hure noman wurne.
He lokede in eche halke;
Ne se+g he nowhar walke
A+tulf his felawe,
+Tat he cu+te knowe.
<P 50>
A+tulf was in +te ture,
Abute for to pure
After his comynge,
+Gef schup him wolde bringe.
He se+g +te se flowe,
And horn nowar rowe.
He sede vpon his songe,
"Horn, nu +tu ert wel longe.
Rymenhild +tu me toke,
+Tat i scholde loke.
Ihc habbe kept hure eure;
Com nu o+ter neure.
I ne may no leng hure kepe;
For sore+ge nu y wepe."
Rymenhild Ros of benche,
Wyn for to schenche,
After mete in sale,
Bo+te wyn and ale.
On horn he bar an honde,
So la+ge was in londe.
Kni+gtes and squier
Alle dronken of +te ber;
Bute horn al one
Nadde +terof no mone.
<P 51>
Horn sat vpon +te grunde;
Him +tu+gte he was ibunde.
He sede, "quen so hende,
To meward +tu wende.
+Tu +gef vs wi+t +te furste;
+Te beggeres beo+t of +turste."
Hure horn heo leide adun,
And fulde him of a brun,
His bolle of a galun,
For heo wende he were a glotoun.
He seide, "haue +tis cuppe,
And +tis +ting +ter vppe.
Ne sa+g ihc neure, so ihc wene,
Beggere +tat were so kene."
Horn tok hit his ifere,
And sede, "quen so dere,
Wyn nelle ihc, Muche ne lite,
Bute of cuppe white.
+Tu wenest i beo a beggere,
And ihc am a fissere,
Wel feor icome bi este,
For fissen at +ti feste.
Mi net li+t her bi honde,
Bi a wel fair stronde.
<P 52>
Hit ha+t ileie +tere
Fulle seue +gere.
Ihc am icome to loke
Ef eni fiss hit toke.
Ihc am icome to fisse;
Drink to me of disse.
Drink to horn of horne,
Feor ihc am i orne."
Rymenhild him gan bihelde;
Hire heorte bigan to chelde.
Ne kneu heo no+gt his fissing,
Ne horn hymselue no+ting;
Ac wunder hire gan +tinke,
Whi he bad to horn drinke.
Heo fulde hire horn wi+t wyn,
And dronk to +te pilegrym.
Heo sede, "drink +ti fulle,
And su+t+te +tu me telle
If +tu eure isi+ge
Horn vnder wude li+ge."
Horn dronk of horn a stunde,
And +treu +te ring to grunde.
<P 53>
+Te quen +gede to bure,
Wi+t hire maidenes foure.
+To fond heo what heo wolde,
A ring igrauen of golde,
+Tat horn of hure hadde.
Sore hure dradde
+Tat horn isteue were,
For +te Ring was +tere.
+To sente heo a damesele
After +te palmere.
"Palmere," qua+t heo, "trewe,
+Te ring +tat +tu +trewe,
+Tu seie whar +tu hit nome,
And whi +tu hider come."
He sede, "bi seint gile,
Ihc habbe go mani Mile,
Wel feor bi +gonde weste,
To seche my beste.
I fond horn child stonde,
To schupeward in londe.
<P 54>
He sede he wolde agesse
to ariue in westernesse.
+Te schip nam to +te flode,
Wi+t me and horn +te gode.
Horn was sik and deide,
And faire he me preide,
'Go wi+t +te ringe,
To Rymenhild +te +gonge.'
Ofte he hit custe, 
God +geue his saule reste."
Rymenhild sede at +te furste,
"Herte, nu +tu berste,
For horn nastu namore,
+Tat +te ha+t pined +te so sore."
Heo feol on hire bedde
+Ter heo knif hudde,
To sle wi+t king lo+te,
And hure selue bo+te,
In +tat vlke ni+gte,
If horn come ne mi+gte.
To herte knif he sette;
Ac horn anon hire kepte.
<P 55>
He wipede +tat blake of his swere,
And sede, "Quen so swete and dere,
Ihc am horn +tino+ge;
Ne canstu me no+gt knowe?
Ihc am horn of westernesse;
In armes +tu me cusse."
Hi custe hem mid ywisse,
And makeden Muche blisse.
"Rymenhild," he sede, "ywende
Adun to +te wudes ende.
+Ter be+t myne kni+gtes,
Redi to fi+gte,
Iarmed vnder clo+te.
Hi schulle make wro+te
+Te king and his geste
+Tat come to +te feste.
Today i schal hem teche,
And sore hem areche."
Horn sprong ut of halle,
And let his sclauin falle.
+Te quen +gede to bure,
And fond A+tulf in ture.
"A+tulf," heo sede, "be bli+te,
And to horn +tu go wel swi+te.
<P 56>
He is vnder wude bo+ge,
And wi+t him kni+gtes Ino+ge."
A+tulf bigan to springe
For +te ti+tinge.
After horn he arnde anon,
Also +tat hors mi+gte gon.
He him ouertok ywis;
Hi makede sui+te Muchel blis.
Horn tok his preie,
And dude him in +te weie.
He com in wel sone,
+Te +gates were vndone,
Iarmed ful +tikke
Fram fote to +te nekke.
Alle +tat were +terin,
Bi+tute his twelf ferin
And +te king Aylmare,
He dude hem alle to kare
+Tat at +te feste were.
Here lif hi lete +tere.
Horn ne dude no wunder
Of ffikenhildes false tunge.
Hi sworen o+tes holde,
+Tat neure ne scholde
<P 57>
Horn neure bitraie,
+Te+g he at di+te laie.
Hi Runge +te belle,
+Te wedlak for to felle.
Horn him +gede with his,
To +te kinges palais.
+Ter was brid and ale suete,
For riche men +ter ete.
Telle ne mi+gte tunge
+Tat gle +tat +ter was sunge.
Horn sat on chaere,
And bad hem alle ihere.
"King," he sede, "+tu luste
A tale mid +te beste.
I ne seie hit for no blame,
Horn is mi name.
+Tu me to kni+gt houe,
And kni+gthod haue proued.
To +te king men seide
+Tat i +te bitraide;
<P 58>
+Tu makedest me fleme,
And +ti lond to reme.
+Tu wendest +tat iwro+gte
+Tat y neure ne +to+gte,
Bi Rymenhild for to ligge,
And +tat i wi+tsegge.
Ne schal ihc hit biginne,
Til i suddene winne.
+Tu kep hure a stunde,
+Te while +tat i funde
In to min heritage
And to mi baronage.
+Tat lond i schal ofreche,
And do mi fader wreche.
I schal beo king of tune,
And bere kinges crune.
+Tanne schal Rymenhilde
Ligge bi +te kinge."
Horn gan to schupe dra+ge,
Wi+t his yrisse fela+ges.
A+tulf wi+t him his bro+ter;
Nolde he non o+ter.
+Tat schup bigan to crude,
+Te wind him bleu lude.
<P 59>
Bi+tinne daies fiue
+Tat schup gan ariue,
Abute middelni+gte.
Horn him +gede wel ri+gte.
He tok a+tulf bi honde,
And vp he +gede to londe.
Hi founde vnder schelde,
A kni+gte hende in felde.
+Te kni+gt him aslepe lay
Al biside +te way.
Horn him gan to take,
And sede, "kni+gt, awake.
Seie what +tu kepest,
And whi +tu her slepest.
Me +tink+t, bi +tine crois li+gte,
+Tat +tu longest to vre dri+gte.
Bute +tu wule me schewe,
I schal +te to hewe."
+Te gode kni+gt vp aros;
Of +te wordes him gros.
<P 60>
He sede, "ihc haue, a+genes my wille,
Payns ful ylle.
Ihc was cristene a while,
+To i com to +tis ille
Sarazins blake,
+Tat dude me forsake.
On Crist ihc wolde bileue;
On him hi makede me reue,
To kepe +tis passage
Fram horn +tat is of age,
+Tat wunie+t bi este,
Kni+gt wi+t +te beste.
Hi slo+ge wi+t here honde,
+Te king of +tis londe,
And wi+t him fele hundred.
And +terof is wunder
+Tat he ne come+t to fi+gte;
God sende him +te ri+gte,
And wind him hider driue,
To bringe hem of liue.
Hi slo+gen kyng Murry,
Hornes fader, king hendy.
Horn hi vt of londe sente;
Tuelf fela+ges wi+t him wente,
<P 61>
Among hem a+tulf +te gode,
Min o+gene child, my leue fode.
Ef horn child is hol and sund,
And A+tulf bi+tute wund,
He luue+t him so dere,
And is him so stere,
Mi+gte iseon hem tueie,
For ioie i scholde deie."
"Kni+gt, beo +tanne bli+te,
Mest of alle si+te.
Horn and A+tulf his fere,
Bo+te hi ben here."
To horn he gan gon, 
And grette him anon.
Muche ioie hi makede +tere,
+Te while hi togadere were.
"Childre," he sede, "hu habbe +ge fare?
+Tat ihc +gou se+g hit is ful +gare.
Wulle +ge +tis londe winne,
And sle +tat +ter is inne?"
He sede, "leue horn child,
+Gitt lyue+t +ti moder Godhild.
<P 62>
Of ioie heo miste,
If heo +te aliue wiste."
Horn sede on his rime,
"Iblessed beo +te time
I com to suddenne,
Wi+t mine irisse menne.
We schulle +te hundes teche
To speken vre speche.
Alle we hem schulle sle,
And al quic hem fle."
Horn gan his horn to blowe;
His folk hit gan iknowe.
Hi comen vt of stere,
Fram hornes banere.
Hi slo+gen and fu+gten,
+Te ni+gt and +te v+gten.
+Te Sarazins cunde,
Ne lefde +ter non in +tende.
Horn let wurche
Chapeles and chirche;
<P 63>
He let belles ringe,
And Masses let singe.
He com to his Moder halle,
In a roche walle.
Corn he let serie,
And makede feste merie.
Murie lif he wro+gte;
Rymenhild hit dere bo+gte.
Fikenhild was prut on herte,
And +tat him dude smerte.
+Gonge he +gaf and elde,
Mid him for to helde.
Ston he dude lede,
+Ter he hopede spede.
Strong castel he let sette,
Mid see him biflette.
+Ter ne mi+gte li+gte
Bute fo+gel wi+t fli+gte;
<P 64>
Bute whanne +te see wi+t dro+ge,
Mi+gte come men yno+ge.
Fikenhild gan wende
Rymenhild to schende.
To wo+ge he gan hure +gerne;
+Te kyng ne dorste him werne.
Rymenhild was ful of mode;
He wep teres of blode. 
+Tat ni+gt horn gan swete,
And heuie for to mete
Of Rymenhild his make,
Into schupe was itake.
+Te schup bigan to blenche;
His lemman scholde adrenche.
Rymenhild wi+t hire honde
Wolde vp to londe.
Fikenhild a+gen hire pelte
Wi+t his swerdes hilte.
<P 65>
Horn him wok of slape,
So a man +tat hadde rape.
"A+tulf," he sede, "fela+ge,
To schupe we mote dra+ge.
Fikenhild me ha+t idon vnder,
And Rymenhild to do wunder.
Crist, for his wundes fiue,
To ni+gt me +tuder driue."
Horn gan to schupe Ride,
His feren him biside.
Fikenhild, or +te dai gan springe,
Al ri+gt he ferde to +te kinge,
After Rymenhild +te bri+gte,
To wedden hire bi ni+gte.
He ladde hure bi +te derke,
Into his nywe werke.
+Te feste hi bigunne,
Er +tat ros +te sunne.
Er +tane horn hit wiste,
To fore +te sunne vpriste.
His schup stod vnder ture,
At Rymenhilde bure.
<P 66>
Rymenhild, litel wene+t heo
+Tat Horn +tanne aliue beo.
+Te castel +tei ne knewe,
For he was so nywe.
Horn fond sittinde Arnoldin,
+Tat was A+tulfes cosin,
+Tat +ter was in +tat tide,
Horn for tabide.
"Horn kni+gt," he sede, "kinges sone,
Wel beo +tu to londe icome.
Today ha+t y wedde fikenhild,
+Ti swete lemman, Rymenhild.
Ne schal i +te lie;
He ha+t giled +te twie.
+Tis tur he let make
Al for +tine sake.
Ne mai +ter come inne
Noman wi+t none ginne.
Horn, nu crist +te wisse,
Of Rymenhild +tat +tu ne misse."
Horn cu+te al +te liste
+Tat eni man of wiste.
<P 67>
Harpe he gan schewe,
And tok fela+ges fewe,
Of kni+gtes sui+te snelle,
+Tat schrudde hem at wille.
Hi +geden bi +te grauel,
Toward +te castel.
Hi gunne murie singe,
And makede here gleowinge.
Rymenhild hit gan ihere,
And axede what hi were.
Hi sede hi weren harpurs,
And sume were gigours.
He dude horn in late,
Ri+gt at halle gate.
He sette him on +te benche,
His harpe for to clenche.
He makede Rymenhilde lay,
And heo makede walaway.
Rymanhild feol yswo+ge;
Ne was +ter non +tat lou+ge.
Hit smot to hornes herte
So bitere +tat hit smerte.
<P 68>
He lokede on +te ringe,
And +to+gte on Rymenhilde.
He +gede vp to borde,
Wi+t gode suerdes orde.
Fikenhildes crune
+Ter ifulde adune,
And al his men arowe
Hi dude adun +trowe!
Whanne hi weren asla+ge,
Fikenhild hi dude to dra+ge.
Horn makede Arnoldin +tare
King, after king Aylmare,
Of al westernesse,
For his meoknesse.
+Te king and his homage
+Geuen Arnoldin trewage.
Horn tok Rymenhild bi +te honde,
And ladde hure to +te stronde,
And ladde wi+t him A+telbrus,
+Te gode stuard of his hus.
+Te se bigan to flowe,
And horn gan to Rowe.
Hi gunne for ariue
+Ter king modi was sire.
<P 69>
A+telfrus he makede +ter king,
For his gode teching.
He +gaf alle +te kni+gtes ore,
For horn kni+gtes lore.
Horn gan for to ride;
+Te wind him bleu wel wide.
He ariuede in yrlonde,
+Ter he wo fondede.
+Ter he dude A+tulf child
Wedden maide Reynild.
Horn com to suddenne,
Among al his kenne.
Rymenhild he makede his quene,
So hit mi+gte wel beon.
Alfolk hem mi+gte rewe,
+Tat loueden hem so trewe;
Nu ben hi bo+te dede;
Crist to heuene hem lede.
Her ende+t +te tale of horn
+Tat fair was and no+gt vnorn.
Make we vs glade Eure among,
For +tus him ende+t hornes song.
Jesus +tat is of heuene king,
+Geue vs alle his suete blessing.
(\EX-PLI-CIT.\) Amen. 



