<B CMHORSES>
<Q M3 IS HANDM HORSES>
<N TREAT HORSES>
<A X>
<C M3>
<O 1350-1420>
<M 1350-1420>
<K X>
<D SO>
<V PROSE>
<T HANDB MEDICINE>
<G X>
<F X>
<W WRITTEN>
<X X>
<Y X>
<H X>
<U NON-PROF>
<E X>
<J X>
<I X>
<Z INSTR SEC>
<S SAMPLE X>


[^A LATE MIDDLE ENGLISH TREATISE ON HORSES.
STOCKHOLM STUDIES IN ENGLISH, XLVII.
ED. A. C. SVINHUFVUD.
STOCKHOLM: ALMQVIST & WIKSELL
INTERNATIONAL, 1978. 
PP. 85.1 - 129.576^]

<P 85>
   Sum-tyme olde wise clerckus +te
whiche knewe kyndes & complexciones
of men & of bestus +tei fondon & writoun
many grete resounus in helynge of bestus as wel as of
men. And for an hors is a best +tat muche worschepith
men. & many harmes take+t +trou+g mys-happus fele &
ofte-tyme be+t outerliche I-lost for defau+gte of help +terfore
I wol schewe +gou as j haue jlerned sum curus for hors
+tat al men knowe no+gt. And also wherof +te euel come+t
on an hors And also +te tokenus +terof. where-bi +tat
men schul hem knowe. & how +tei schul in a good feyre a good
hors chese. Hit is nedeful to hym be wise & warre +tat
schal an hors bye. ffor ofte-tyme +tei +tat weny+t hem-silf
sly. be+t bi-giled with blynd hors & pursif hors. & o+ter       #
wicked
tacches +tat men mowe no+gt redeliche se with here y+gen.
+terfore .4. +tyngus +tou schalt loke in an hors. & +tat +tei
faile no+gt. ffurste +te schap of an hors +tat +tou schalt
wite +tat he be of good heythe to suche trauaile as +tou nedest
& +tat he be +ticke & wel I-growe to his heythe &
strongliche I-made. longe sydes & fleyscheful. & grete          #
boddockes.
& rounde. & brod brest bi-fore. & al +te bodi knette with
wre+tes of brawn. drie bon & hole +tat schal his bodi bere
& +tat schal be a good hors. +Te secunde is +te beawte of an
hors +tat he semy+t faire. & +tat he haue a litul hed & a lene
with-oute flesche +te skyn ri+gt ny +te cheke-bon is no+gt
for to loke. schort eres & scharp for-sake hem no+gt. gret 
<P 87>
eyen & oute stepe is wel for to preise. & wyde nose+turlus
to +trast in +tin hond. an hy+ge hors bifore with a +ticke
mane +te tayle meneliche long with a good rumpe. a runde
fot & +ticke bi-come+t an hors wel. & +gif his pastron
be schort he is wel +te betere. wyde hors bi-twene +te
chaueles haue. I herde for to preise. & brode bi-twixst
+te y+gen is good at +te countre. And +ticke warres bifore
+te sadel bi-come+t an hors wel. And lowe-wombede
be+t comeliche good. And flat-crowped hors bu+t
esi to holde in poynte. +Te +tridde is bounte +tat is best of
alle. And +tat +tou schalt knowe by +tese signus. Loke +tat
he be hardi & coragious of herte. redi & ly+gt of his
feet & +tat he go wyde in resoun. & +tat his lymes tremeli
for +tat is sygne of streng+te. And also +tou+g he reste
muche +tat he be esi to hold. & if he be j-take for+t hastliche
with +te spore +tat he be sumdel kene. & +tat he be good to     #
rebaie
when +tat tyme is. & +tis be+t +te signes in a bounte hors.
+Te fer+te is colour +tat he schal haue of here. for sum haue+t
betur here +tan summe as I haue herde telle. ffor bayblak.
Mylkewhite. don with a blak lyste. yren-graye.
& o+ter many hewes +tat bu+t not to rekne. ffor whatso
his +tat hors bow+gte.
   And when +tou hast a good hors at +tin owen
wille loke +tat +tou be warre bi-tyme +tat he
take not harme +trou+g rauhede of blode where+trou+g 
an hors take+t many euelis. And +tus
<P 89>
schalt +tou knowe when +tin hors nede+t to be I-lete
blod. +Gif he be ranke of blod he wol gnappe himsilf
& rubbe him a-+gens +te walle +tat he stonde+t bi. his kaym
schal stynke. & hos pisse schal be rede & +ticke. his           #
ey+genwebbe
blod-schote & wateri with-alle. And ouer al his 
bodi +ter wol rise litel smale bleynes +te whiche +tou schalt
aspie bi felyng of +tyn honde. for +tei bu+t I-hud vndur +te
heere. And he schal leue his mete more +tan he was
I-wonede. And +tan schalt +tou latyn him blod a-boue
on his necke. & aftur +tat his stat is +tou schalt latym
blede. +gif he be passed .v. +gere. & be in good poynt to +te
whi+gte of .3. pond or .4. may he blede. And +gif he be
of .ij. +gere or of .3. or ellus +tat he be lene & feble of     #
flesche.
a pond & an half wol ouer-take hym wel  
or ellus at +te moste .ij. pond.
   Many euelus come+t on hors +tat bledu+t not in
tyme +trou+g +tat kynde of +tat euel blod +tat gendre+t in his
bodi +tat is to say +te farcioun. +tat in his skyn bore+t many
an hole. schale & mangew. & turtes & many o+ter
euellis +tat I schal here afturward nemyny as +tei gendre+t
in +te bodi of here owene kynde. And nameliche of 
+tese euelus +tat oon hors may cacche of an-o+ter +tat he
stondu+t bi. And whan an hors is I-let blod & wol
not staunche. Or ellus he strobule+t his veyne with
rubbynge of hym in self. +Ten schalt +tou take felt & brenne
it sumdel. & wete it in +te lus of +te rede nettel. & ley hit
<P 91>
upon +te ueyne +tat +tou wolt staunche. Or ellus take
+tou +te woluyfiste & geder out +te dust & medle hit
with swynes +tost +tat lyue+t bi +te gras. grynde hem
wel to-geder & make hem on a plaster. & make it hot.
& ley it to +te veyne. & in-to +te +tridde daye remoue it
not. Or ellus take hors-cayme & grynd it wel &
bynde it fast to +te veyne. Or ellus sum wol tak
a fe+ter & twyne it in +te heere +ter +te blod renne+t out
& fe+teres bynde +tere-to. & so I haue seye hit staunche
wel I-now+g. A charme for to cese blod. God
was bore in betheleem. Ido on +te rode-tre in ierhusalem fulled
he was in flum iordan. Lord as +te flode with-stode
so staunche +tis horsus blod. Lord +gif +ti wille be. Pater
noster &. Aue Maria. An-o+ter. Put +tese syngnus to +te
nauel I-write vpon sum-+tyng. (\fac. per. nomen. matris.        #
Christi. altae.
sacrae. & .7. nomen. mariae.\) An-o+ter. Take +te knotte of a   #
stre
& wete it in +te blod & make .v. crosses in +te forhed
& sey +tese wordus at euery crosse boram uex. Ano+ter.
I coniure +te wonde in +te uertu of +te .v. wondes
of oure lord ihesus crist. & in +te vertu  of +te mylke
+tat he soke of his moder brest & of his de+t & of his
up-rist +tat +tou rankil no+ter swelle ne blede ne
festre no more +tan do+t +te wonde +tat longeus
made with +te spere in +te ri+gt side of our lord ihesus crist.
(\In nomine patris & filii & spiritus sancti. Amen.\)
   Farcyn is an euel of to muche mosture 
<P 93>
of flesche. & to muche plente of humurus +te whiche
euel sum men clepe+t +te worme. And +te cause whifor
+te forseide humors +tat be+t in +te flesche make+t
rounde holes in +te flesche & in +te skyn as +te angeltweches
do+t in +te er+te. And also ofte-tymes hit come+t 
of blak blod & of humors +tat renne+t with-in +te
veynus. & o+ter-while with-oute. And o+ter-while it come+t
of grete strokes or of a wonde +tat with-inne too
mon+tes is not heled. Also it come+t o+ter-while
bi-twext +te schuldres or in +te sides. & +tat may oone
hors take of an-o+ter. Cure +terfore now wol I schewe.
Take hede +tou marchal to +tis euel & in what stede it is.
for o+ter-while it is in synewe stedes. & in brawne & in
+te cauernes of +te bones & in dyuerse place a-boute +te
lymes +tat euel is to hele. And sum-tyme in fleschy stedus
+tat is esi to hele. +Gif +te farcyn be in +te forhalf of his
bodi. & +tou perceyue ranckehede of blod. in his neckeveyne
let him blede wel. And if it be on his +ty or
ellus in his legge let him blede in his fot & +tat is good.
And aftur take .3. plantes of auence. & .3. of of weybrede.
& .3. of egrymonye & a rote of radysche. &
grynde hem al to-geder. & tempere it with a litul quantite of
stondinge water of a pole or of sum o+ter & let +te hors
swelwy him adoun in-to his bodi. And +ten aftur +tou make
a plaster of auence & of +te rote of radische of bo+te
I-liche muche. & a litel swope. & as muche hony. &
<P 95>
grynde hem al to-geder & +ten +tou schalte schaue +te heere     #
a-boute
+te holes. & ley +tis plaster +ter-to. Or ellus take arnement. 
& brenne in +te fyer. & take +te pouder of it. & as
muche of vnslekid lyme & tempere hem to-geder with swope
+tat is old. & with good hony as +tou+g it were gruel. &
ley it to +te holes. & do so twyes on +tre dayes
tyl +te farcin be drie. & +gif +te holes be to strayte make
hem wyddur with a rasur. And while +tou curest +tis hors
loke he be foddered with a barli-straw. or ellus with hard      #
hey. &
prouendre +gif him non. & as ferfor+t as +tou may let him not
drynke. And +te farcyn be not in +te cauernes of +te bone
ne in +te brawn ne in +te schuldres. but onliche in +te fleschi
stedus +ten do +tus. Take a rasour & schere awey +te
skyn & make it al bare as fer as it seme+t +te a-tamed
& +ten tak an hot yre & brenne it wel abouen & +ten make
a plaster of auence or ellus of egrimonye. or lekes. & ferst
grynde hem wel. & do +ter-to +gelkus of eyren & faire barlimele
& tempere hem al to-geder. & ley a-boue +te farcyn. Or 
ellus take & fille ful +te holes of podur of bremston ri+gt
to +te grounde. & aftur tak an hot yre +tat is smal bi-fore
& put in-to +te holes as depe as +tei be+t. Or ellus take 
a pynte of +te ius of planteyne. & a pynte of +te ius
smalache. & half a pynte of +te jus rubarbe & half
a pynte of +te Ius of [\LACUNA IN MS: SPACE FOR EIGHT LETTERS\] #
& a pynte of +te
Ius of +te leues of eldre +tat beru+t +te beries. &. half
a pynte of venegre. & half a pynte of +ticke hony. &
<P 97>
half a pynte of +te Ius of morel. & half a pynte
of +te jus of +te wilde tesel. & too or +tre of amydoum.
& medle hem al to-gederes in a panne. & set it ouer +te fier.
& let it boile til it be +ticke. & when it is +ticke take
it don. & let it stonde til it be cold. & +ten take +te white
of .viij. eyron & medle +ter-with. +Tis same medicyne
is good also for boylynge of venum. +Tese cures as
I vndurstonde schal hele an hors for +te farcioun ful
wel. A charme for +te same. (\Dytez ceste charme 
par .iij. iors apres le solayl couchaunte sur le chyual uers
le west turne primez pater noster hysmabet pater noster 
mechay pater noster amathanay pater noster Crux
Christi amen pater noster. Cinke foyrz dirrs cest charme.
par .iij. iours outre le chyual & par seux. iij. iours ne
doit le chyual este en bon erre ne prouendre mag ne ewe
currant passer mays selk fame manguse & garra.\)
ffor +te farcyn & for +te feloun a good charme. (\In nomine
patris & filij & spiritus sancti amen. Ie te coniure felon ou   #
farcyn
ou verme male suz d[{a{]uant par dieu omnipotent de ceel & de
terre & de solial & de lune & de tutz creaturis & de sent       #
autres
& de sent abbes & de sent euesqes bien atturnes com de
messes chauntere de nuit de noele & de la paylle so[{?{]
dount deu fuit en-volupe si tu i es ne demurrez niemt
si tu ne es ne entres poynt al nom du pere & fitz &
saunt espyrit te coniure qe tu ne augz. Ceo ditz
troi foitz outre le best & garra.\) Or ellus take +te
<P 99>
rede nettel. & +te popi rote. & myntes & flex & make
a plaster & bynde to +te frounte of +te hors. .v. daies &
 .v. ny+gttus. & +gif him drynke herbes. beteyne. quycseluer.
And +tat also for to hele +te wondes of +te farcyn. 
Tak floure of whete & hony & medle hem to-geder.
& ley to +te sore. & aftur pouder of piper & caste in +te
wondus. & +gif him drynk of +te same & he schal be
hole. A charme for +te same. (\In nomine patris. & filij. &
spiritus. sancti. amen.\) In +te worschip of oure lord ihesus   #
crist &
of oure ladi seynt marie & of seynt Iobis fadur
soule
& for his modur soule & for al his antecers
soulus sey. iij. pater noster. & .iij. aue maria. Seynt Iob     #
had.
 .ix. wormes. & o worme had non hed. Sey +tus aboute
+te hors. Also for al-maner of farcyn. Make
a plaster of an vnce of vertegrece and eisel
& arnement & ley +ter-to a ny+gt.
   Mangew gendere+t of brend blod & rotoun
& nameliche in herueste when a hors traueyle+t ouer-muche
with litel mete. or litul drynke. & aftur ha+t
myche reste aftur grete trauayle. And or he be let blod
he most be trauayle. a+gen. And o+ter-while it
come+t upon an hors when pouder & swot I-dried
to. be ouer-ny+gt. upon him & is not currayde & made
clene. And also it wil come of sodayne fast ridynge.
when an hors aftur gret traueyle. or aftur gret
swetynge stondu+t vnheled. or out of house. or in eny
<P 101>
o+ter cold stede. +Te mangew wol bi-gynne bi-side
+te necke in +te heere & +ter wol genderi whelkus o+ter
bilus & in o+ter dyuerse stedus of his bodi. and in +te
same stede wol +te here pile awey. & +te hors wol
gnappe him-self & rubbe out of curs. & but +tat hors
be holpe in tyme +tat mangew wol turne in-to a foule
schabbe +terfore tak of +tese medicynes +tat folue+t.
And +gif an hors be rancke of blod. +ten let him
blod in his necke. & with +tat same blod hot whasche
him ouer-al. & frote hym ri+gt faste & spare him not. And
aftur +te +tridde daye of his blod-letynge let wasche
him wel with hot lie j-made of axes of barli-straw. &
see-water or with vyneger or with sowre ale. Or ellus 
wasche him with +te croppus of horhone or ellus with sede. or   #
with
+te gresse of an erbe +tat men clepu+t hemloke. Or ellus 
with +te croppus of walwort +tat ha+t kyndeli vertu with a
porcioun of salt wel j-soden & wasche him wel. & curreye
him wel with an hors-combe. & make him ri+gt clene. &
when he is ri+gt drie or ellus upon +te morwe anoynte
him with an oynement +tat j schal +te teche. +Tou schalt
tak +te rote of +te rede docke & +te rote of hemlok.
& se+te hem wel in vyneger or eysel or wyn. longe til
+tei be ri+gt neysche. & +ten +tou schalt take awey +te
hardust of +te herbes & grynde it. or when +tei bu+t
sumdel drie with olde swynes grece. & with +tat oynement
a+gens +te sunne or +te fyer loke +tou grece him wel.
<P 103>
Or ellus tak quycseluer & freische grece & hony. porcioun
+tese +tre to-gederis & anoynte him +ter-with & or
he be anoynted let him blod on +te sides & whasche
+te sore +ter-with. Or ellus take .ij. libra of barwus grece.
& a quarterun of uertegrece & a quartron of quycseluer
& half a pond of frankencence. & .ij. sauserful
of womman mylke +tat ha+t a knaue childe with-inne 
+tre +gere age & medle al +tese to-geder & wasche
him +ter-with.
   And +gif an hors wol gnappe hymself.
tak +te rede water-kerse for +tei bu+t
hatter & bettur +ten +te whit & wermode & hemlok
with a gret dele of sote til +tei be muche iliche to
grece. & +ten grece him ouer-al & +tat schal lete him to
gnappe. Or ellus wasche him wel in bene bro+t &
poune to-geder piper & vertegrece & arnement & cerfoyle
& make a good fier a-boute +te hors &
grece him +ter-with .3. daies.
   Scabbe wol brede in +te necke. & on +te dok
of +te taile ri+gt as +te mangew. & it
peli+t awei +te heere up bi +te rotes so +tat +te hors
wille rubbe him-self +tat +te necke & +te dok of his
taile schal be al bare & +tat wol come of superfluyte of
blod. or of o+ter wicked humourr. & of +te same cause +tat +te
mangew wol gendre so wol +tis. of bi-stonding bi a
schabbed hors or bi gnappynge of an hors. or if he
be whiped with a wippis curreyed with a combe +tat a schabbed
<P 105>
hors ha+t be curreyd with. or if he ete of +te corn
or of +te hey +tat a schabbed hors ha+t ymoneld on
bi-fore. or if +te oynde of a schabbed hors come+t
muche in his nose. Cure +terfore. If +te hors be
stalworde. let him wel blod & wasche +te schabbed  
stedes with +te hot blod & when it is drie rubbe him wel
with an hors-combe euer-more til +te blod sprynge out
of +te skyn amonge +te schabbes. & +ten +tou schalt wasche
him with a lye +tat clerkus clepu+t on latyn capitellum
+te whiche is made on +tis manere. Take .3. parties
of asche asken. & .ij. parties of askus of bene-halm.
o partie of vnsleked lym. & medle hem wel to-geder &
do hem in a brod vessel ful of holes ri+gt as +tou
makest lye & helde aboue see-water or lye +tat was
ymade of asche askus euer til it droppe. & geder +tat
clene in a vessel. & when +te capytel is made. take
an eye of an hen & wynde a +trede +ter-aboute. & do
it softeli in +tat capytel. & +gif it synk not +ti capytel
is good. or ley +ter-on a gret neld & if he flete
+ti capytel is good. Come not hende +te hole skyn
for +ten it wol make +te here pile awey +trou+g violense
of it-self. but wasche +te schabbes with +te
capytel. & +tat ri+gt wel. And when it is drie 
+ten schalt +tou grece it with an oynement +tat is ymade
on +tis manere. Take sulphur vyue. & whit
tartre & blak. & grynde him al to-geder & tempere it with
<P 107>
strong eisel. & with oyle til it be of +te +tickenus
of an oynement. & twies on +te day grece him on
+te scabbede stedus. And on +tis same manere do
to an hors +tat ha+t +te mangew euer til he be hole.
Or do make suche an oynement for +te same. Take
sulphur vif. & frankencence. nytre & tartre. & aschyn
rynde vitriole & vertegrece. whit ellebore & blak.
er+tenotes. & +gelkes of hard-soden eyren. boyle al
+tese in oile of olyue til it wexe +ticke. & with +tat anoynte
+te hors twies or +tries on +te day as +te
+tynke+t best. Or in +tis manere schalt +tou make &
oyle a+gens +te scabbe. Tak of +te myddel rynde of
a tre +tat sum men clepu+t buchyl & +tei make+t caudeles
of +tat same rynde. take +ten +tat same rynde & schaue
awey +te ouemuste & take +te myddel rynde. & hew
it al smale & fil a pot of er+te +tat is newe ful +ter-of &
loke +tat +te same pot haue +tre holis or .4. in +te bottum
+ter-of. & take an-o+ter pot +tat is wel ileded with-inne
& set +te pot with +te ryndus upon +te leded pot & loke
+tat +te brynkes of +te leded pottus mou+te & +te brynkus
of +te pot with +te ryndus be wel dabbid with cleye &
with hors-donge so +tat non o+ter flauor entre in-to +te
pottus ne non reche come oute. And if +tou se eny reche
come out loke +tou daube it eft-sonus. & also +te pottis
mou+te with +te ryndus +tou schalt helyn it with a ston &
daube it in +te manere forsayde & +ten make a good fyer
<P 109>
aboute +te pottis of wode & cole. and when +te wode
& +te cole bu+t I-bred oute. +ten take oute +te pottis
& +te oyle +tat +tou fyndest in +te ne+ter pot geder it up &
with a fe+ter grece +te schabbede stedus +tries on +te daie. or
oftur if it be nede. & fro +te firste daie +tat +te hors is     #
furst
gresed with +tis oile loke +tat +te hors be wel kept from
al-manere wetynges of water & fro gnappynge & rubbynge
til +te. .7. daies be passed. And sum men make+t 
oile in +te same wise +tat +tis forsayde oile is made of        #
schrapynge
of hertes-hornes. or of drie schauynges of
aschentre. or of eldir-tre. or of wode appeltre. or of
+te rynde of blak-+torn. +te whiche oile +tey sey for-so+te
it is good for al-manere schabbe. & al o+ter fil+te & maladie
+tat gendere+t on +te skyn. +Gif +te schabbe be in +te dok
of +te taile +ten schalt +tou take blak comyn & grynde it
se+te a litel in swete mylke it when it is hote a-noynte
+te schabbe ofte +ter-with. & loke +tat +te schabbede hors
stonde no+gt amonge o+ter +tat +tei ne take +te same 
   Fike is an euel +tat wol gendri in hore of hym.
& it is called a fyke for-as-myche as it is
neysche gaderynge of humorus of rede colour or of blo
colour or blak with-oute hooro spryngynges oute of
+te skyn in +te manere of a rype fyge where-of it
take+t his name. & hit gendre+t of to myche blod
+tat regne+t bi-twexst +te hyde & +te hold & +tus +tou
schalt cure it. ffurst loke in what lyme +tat it be
<P 111>
& if it be eny-+tynge brode. And +ten +tou schalt take
a gobet of le+ter & make a rownde hole in +te myddel
of +te le+ter aftur quantite of +te fyke so +tat it be fast     #
sittynge
bi-twexst +te fyke & +te hol skyn. & take tow+g cley.
or past of smal floure & cramme it ri+gt wel so +tat +te
hole skyn be not I-hurte with eny hot +tyng +tat schal
be y-layd +ter-to. When it is so ydi+gt take horhoune
& grynde it wel & make +ter-of ballus of +te gretnus
of perus. or of +te gretnus of +te fyke. & ley him upon
an hot ston or on yren til +tei be wel y-rosted. & +ten
take a bal al hote & +trast in-to +te fyke. & when it is
cold ley an-o+ter to al hote with-oute delay. & so euermore
oon aftur an-o+ter til +te fyke bi-gynne to
wexe white. And if +tou haue non horhoune 
take water-kresus or +te myddel rynde of +te hasel. &
make balles. & rost hem & do in +te same manere
as it is forsayde of horhoune. Or ellus if +tou 
wolt +tou my+gt schere a-wey +te fyke euene bi +te
hole skyn & let +te euel blod blede out euerydel +ten
schalt +tou strawe upon pouder of unsleked lyme
or of chalke. And take an yre as brode as
+te sore is & let brenne it ri+gt wel til +tou hopest
+tat +te fier come to +te hole flesche. And if +te
fyke be in eny jnnor be y-warre +tat +tou do esili +tat
+te senues ne +te Ioyntus be not ytowched with
+te fyer. And +ten schalt +tou take freische rothorus
<P 113>
scherne. or henne dryt. or doues dryt & grynde
it with sope & bynde it +ter-to & let it leye +ter-to. ij.      #
daies
stille. & +ten afturwarde +tou schalt anoynte it with sum 
hote oynement +tat is to say with pentemyron or ellus
with hony. onus on +te day til it be hole. And in +te menetyme
kepe it wel from lickynge. & from wetynge of
colde water til .ix. daies be passed. And if it so be +tat
+te fyke be gret aboue & smal bi +te bodi as a stalke
of a walnote. take +ten. .v. silken +tredus. & +tre heres
of an hors taile +tat neuer rode mare. & twyne hem wel
to-geder as an harpestrenge. bynde it fast bi +te bodi
vndur +te fyke. And on +te morwe aftur if it be asclaked.
draw it eft fastur. & so +tou schalt do oft til +te fyke falle
awey him-self. And when he is falle awey. +Gif so be +tat
an-o+ter wol come vp +ter a+gen +tou schalt do +tus. Do
past or cleye +ter-upon al aboute as ytold bi-fore
caste scaldynge hote hony euene +ter-upon. but loke
+tou kepe with al +ti my+gt +tat no+gt of +te hote +tynge
come hende +te skynne. & eft-sonus when it is kelid.
make it ri+gt drie & cast efte-sonus +ter-upon as +tou dedust
bi-fore. & if +te +tynke +tat +te rotus be depe in +te flesche.
+Gif +tou schalt hele it wel as y haue seide bi-fore. And
if he haue many fykos in his bodi +ten +tou schalt let him
blede aftur +tat his elde & his streng+te wol streche.
   Tortes be+t apostemes in +te ouer half of +te
flesche. genderynge with-inne +te skyn in +te
<P 115>
manere of a Cake +tat men clepu+t tarteles. of +te whiche
he take+t his name. & it wol come of oute-rage of
blod +tat is rotun. & of humours +tat be+t bi-twexst +te hyde
& +te holde. & of hertynge of flesche or of strokes. &
of stondynge bi o+ter hors. +terfore in +tis cure +tus schalt
+tou don. +Tou schalt slitte +te skyn of +te torte up & don
euene in +te myddes of +te torte. & undur-ne+te +ter +te        #
swellynge
o+ter +te bolnynge stondu+t. with a flewme +tou schalt
aripe al +te bagge & breke +te gaderynge +tat is with-inne
& +treste +te quyture out. And efte if it nede be 
ronge it ri+gt wel. Or ellus an-o+ter manere if +te like
it betere. Amyddes +te torte slyte +te skyn euene doun to
+te er+te til +te slitte come to +te hole flesche & +ten clanse
it wel +tat is redi rotun. And +ten stoppe +te holes
ful of herdus of hempe or of lynne. & loke +tat +tei
be clene y-di+gt with-out eny schyues. but wete hem
furst in botter or in sayme or in +te white of an ey. And
+tus euery day di+gt it onus til he be hole. Or if be
turte at +te furste tyme be nesche. & +tou vndurstonde
+tat it be rotid. in +te stede +ter +te +tynke+t +tat it
is neyschest. +Ten +tou schalt bi good avyse in +te ne+ter  
half make a good sclitte & in ei+ter half of +te torte
quyse it with +ti fyngrus al +te while +tat +ter wol
renne out eny quyter. And aboue on his bak
+tou schalt let him blede first in +tat on side & aftur .7.
daies on +tat o+ter side. And +ten aftur .xv. daies +tou schalt
<P 117>
efte let him blod vpon +te same side +tat he was furst +ter
late blod. But loke +tou do not +te last cure of letynge
of blod but if +te +tynke be good syngnes +tat
it be nede. +tat is to say. +tat blod be enchesoun. or ellus
o+ter humors. Where-+tro+g +te torte schold al-wei gendre       #
upon +te hors.
   Corn is an euel & it is cleped 
+te corn for-as-myche as +te hyde of +te hors
with +te flesche. or ellus +te flesche bi him-self. is so harde
as +tou+g it were an horne. And +tat wol come +trou+g
gret hurtynge & of gret burdyn. & of swellynge. &
or +tat swellynge be passed awei efte-so[{n{]us bere+t sum heuy
burdyn +tat brese+t it wel more. Also it come+t for
many o+ter causes of +te whiche me nede+t not telle
of now+te. But for to teche +gow how +ge schul kepe 
an hors +tat he ne take no suche manere harme. y wold
if y cow+te. +Tus haue j seie men kepe here hors
from cornus. When an hors for-trauailed & beru+t ou+gt
heuy. When +te burdun is downe +ten +tei wol tak
of +te sadul or +te hors be colded. & grope ouer-al
if +tei fynde eny hurtynge or swellyng. And if +tei se
or fele eny hurtynge or swellynge. a-non +tei take+t
cold water & salt to-geder. & waschu+t ouer-al & frote+t
him wel. Also swithe +tei set up +te sadul a+gen & so
+tei lettu+t him stonde til he be kelid ri+gt wel. & so do+t
+tei .ij. or .3 . & sette+t vp +te sadul a-bouen a+gen. & so    #
wol
+te swellynge aswage wel I-now+g. But if it be
<P 119>
so +tat +te corn be genderid. +ten +tou moste schaue it aboute
+te corn o+ter +te swellynge. & +ten schalt +tou garce it with
many smale pikes meneliche depe. +tat +te brused blod
may out ren. B[{u{]t if +te bolnynge be ou+gt olde. +ten
schalt +tou first or +tou garse him. ba+te it ri+gt wel with    #
warme
water. & +tat a longe while. & +tat is for to make
+tynne +te bresid blod +tat it may come out +te
bettur. And aftur +tou schalt make a plaster of smalache
& of walwort & of askes of elder-tre. grunde
wel al to-geder. & chaufed in sayme. or in wyn. & lay it
to +te corn. Or make a plaster of +te holi +tystel. &
of faire whete-floure. or of rye. & .iiij. eryn. or of
 .v. & al hote ley +ter-to & aftur when it is roted. & +te
swellyng aswage+t. +ten schalt +tou take a smal elsen
& al hot glowyng +trest in-to +te corn al aboute.
And take afturward a cloute of hempe or of
lynne too fyngur brod +ter +te corn is & lay it vpon
+te corn. And aftur take a drie stikke of wy+ti
or of hasel & +twyte +ter-on longe sponus & +tynne
in-to +tat on ende of +tat styke. & +tat o+ter ende of +te
styke schal be scharpe. +ter-on +tou schalt styke
a gobet of fat lard. & +ten +tou schalt take a long
yren & scharpe. & styke in-to +te +twyten stykkes.
& +ten hold it ouer +te fier til it haue y-chaut hete
of +te fier. & hold it ouer +te corn & let +te larde droppe
ouer +te cloute so +tat +te hote sayme may renne 
<P 121>
in-to +te corn +trou+g +te holes +tat +te elsen made.
& aftur or +te clout be remeued let him swete. & aftur if
it be nede +tou maist take sayme of lard in a sawcer & anoynte
+te corn with a fe+ter or with a splent of tre. And
so ofte-tymus til +te cor wol arise & may be take out.
Or take +te snayles +tat be+t in here schellis. & ri+gt
so stampe hem to-gederes. & make a plaster & ley to +te
sore. & ofte-tyme meue +te corn hyder & +tidur til he
arise. And +tou haue nede to ride upon +tis same
hors or +te corn be oute. +ten make a +tynne plaster of
+te forseide snayles. & set +ti sadul aboue & schyft hit
no+gt til +te corn arise. And y haue seye make a 
plaster of hey askes ytempered with pysse y-leide to +te
corn til +tat he a-rise. & when +te corn is oute +ten schalt
+tou euery day onus fille +te hole ful of herdes wel y-clensid
of hempe or of flexe y-hewe nameliche 
smale. ffor herdus wol kyndeliche clensi woundes
or apostemes & also +tei wol not suffri ded flesche
engendri in +te sore. But let no wete
of water come on +te hole +ter +te corn was inne.
   Ded flesche o+ter-while engendere+t in wondes.
& in apostemes if so be +tat kynde helpe & skilful
be not don +terto. or ellus if +tat sore be not wasche
& di+gt in tyme. And +terfore schalt +tou when +tou sixte +te
flesche ouer-passe +te brynkes of +te skyn with-jnne
+te wonde. Or if +tou se pappes in +te brynkes of
<P 123>
wondes or blankus with-ynne +te wonde. & litel quyter           #
+ter-ynne.
+tat is uerei signe of ded flesche. And bi +tat +tou
maist it knowe if +tou it touche it wol gladli blede.
& when +tou sixt +tat. take a rasor & pare it as ney as +tou
maist til +tou trowe +tat +tou be at +te good flesche. +Gif so  #
be +tat
veynes & synues lettu+t not. ffor wite +tou forso+te +tat
it falle+t +te not to kerue ne to brenne in stedes +ter veynes
& synuus buth liggynge as in +te Ioyntes & o+ter stedes +tat is
good ynow+g bu+t to knowe. And aftur +tat it is coruen
+tou schalt brenne it with an hote yre & aftur +tou schalt take
netus scherne & ley +ter-vpon. Or ellus take +gelkus of
eyrin & herdes. & wete hem +ter-ynne & ley +ter-to & remeue
it not bi-fore +te +tridde day. And +gif +tou wilt 
haue out +te wicked flesche with-oute keruyng. or brennyng 
+ten schalt +tou make suche a poudur. Take +te
white of eyrin. & olde sope +te blak is +te bettere of bo+te
iliche myche. & stere hem bo+te to-gedur til +tei be al of
o color. & take as moche of unsleked lyme & medle
it al to-geder so +tat it be sumdel +ticke & a-non ley it upon
+te ded flesche. But let it not longe leye +ter-to for
peyringe of +te quycke flesche. And +ten aftur +tou schalt 
anoynte it with oile of olyue euer til it be hole. Or
ellus +tou maist hele it with bature y-made of smalache.
& morel if +tou maist gete it. & do +ter-to whit of eyryn
& a parti of hony & tempere it with rye-floure or with
whete & upon herdus ley it +ter-to. Also sum men
<P 125>
make+t suche a poudur for ded flesche +tei take+t .iij.
parties of vnsleked lyme & .ij. of poudur of oisturschellus
& oon of salt. & an-o+ter of hertus-hornes o+ter
netus & stampe hem al to-geders & tempere hem with stronge
ley or with mannus vreyne. & make al +tat in manere
of a lof. & in +te her+te. or in +te ownen or in +te fier bake
it til it be ri+gt harde. +ten +tou schalt make poudur +ter-of  #
&
hote of +te pouders a day ley +ter-on. & if +te ded flesche
be y-wasted away in on stede of +te wonde & not in an-o+ter.
+ten schalt +tou take herdes & wasche hem with spotel
in parti & ley hem vpon +te stede +tat +te +tynke is clansed.
& +ter +te +tynke+t it is not clene ley of +te forseide pouder
+ter-to til it be clene wastid away. & +tou schalt aftur take   #
herdes
& wete hem in sayme or boture. or in oile olyue or in hony
or in wyn. & euer-more ley it +ter-to til +tou se +te good      #
flesche
euene with +te skyn. +ten schalt +tou with suche a pouder hele  #
up
+te wonde. Take of an hors-skyn a porcioun. & of +te 
bonus of an hors +ty or of +te rybbe. & of an hertus horne
or of a schep & old scho-soles. or of +te keruynge of le+ter
+tat +tou schalt fynde in corueseruus schoppes. And euereche
of +tese for-seide +tyngus +tou schalt brenne bi hem-self &     #
aftur
grynde euereche bi him-silf ri+gt smale & take of euereche
iliche myche & do hem alle to-geder & medle hem wel. & aftur
do +te pouder in-to a bladder & vse it when nede is.
Sum men make+t poudur of a gras +tat hate orygan &
medle it with bark dust. & ley+t +ter-to bi it-self & wol helpe
<P 127>
at nede. And if +tat hors schal be y-reden while his
bak is sore +ten +tou most use +te cure aforsaide +tat
is to say. at euene take of +te sadel. & wasche it
with hot wyn or vryne. or salt water. or in watere +tat
horshoune. or walwort or smalache or origan haue+t
bi sode ynne. & aftur drye +te sore. & ley a+gen sum
of +tese helynge pouderes or herdes wete in sayme.
or in sum of +te forseide +tyngus. or a plaster aforseide til   #
it
be hole
   And +gif +te schuldur of an hors be swolle
+trou+g stirtynge or fallynge. or if +te brawn
of +te sides be bolned or hurte with prykynge of +te spore
+ten schalt +tou helpe him in +tis manere. ffirst schalt +tou 
schere a-way +te here al aboute +te bolnynge & +ten
+tou schalt anoynte +te sore stede with sayme of lard or with
hote oile ri+gt ofte. And aftur schalt +tou take +te leues
of wermod. & +te tendre rotes of walwort & grynde 
hem ri+gt wel to-geder. & aftur frie hem ri+gt wel in sayme.
or in boter & make +ten +ter-of a plaster & ley it hot to +te
swellynge. And loke +tat +tou hold +te hole of +te
prychynge sumdel open. And if it be so +tat +tis
manere of swellynge aforseide haue y-be longe
with-oute helpe +ten schalt +tou sclyte +te skyn in myddes
+te bolnynge. And bi-ne+te in +te hole skyn +ter +te swellynge
stynte+t +tou schalt kerue an hole & put +terynne
a seyne. but loke +tat +tou do it wiseliche for
hurtynge of veynes & of synues. And if +te
<P 129>
brest be bolned bi-side +te necke of prykynge 
of +te spore. or ellus +te side. +ten schalt +tou seyne him
in +te brest but not ouer ney +te schulder +tese 
medicynes bu+t good & prophytable. 



