<B CMMOON>
<Q M2 NI FICT MMOON>
<N MAN IN MOON>
<A X>
<C M2>
<O 1250-1350>
<M 1250-1350>
<K NON-CONTEMP>
<D WML>
<V VERSE>
<T FICTION>
<G X>
<F X>
<W WRITTEN>
<X X>
<Y X>
<H X>
<U X>
<E X>
<J X>
<I X>
<Z NARR IMAG>
<S SAMPLE X>


[^TEXT:  MAN IN THE MOON.
EARLY MIDDLE ENGLISH VERSE AND PROSE.
ED. J. A. W. BENNETT AND G. V. SMITHERS.
OXFORD: CLARENDON PRESS, 1968 (1966).
PP. 127.1 - 128.40^]

<P 127>
Mon in +te mone stond ant strit;
On is bot-forke is bur+ten he bere+t.
Hit is muche wonder +tat he n'adoun slyt - 
For doute leste he valle he shoddre+t ant shere+t!
When +te forst frese+t, muche chele he byd.
+Te +tornes be+t kene - is hattren totere+t.
Nis no wy+tt in +te world +tat wot wen he syt,
Ne (bote hit bue +te hegge) whet wedes he were+t.

Whider trowe+t +tis mon ha +te wey take?
He ha+t set is o fot is o+ter toforen.
For non hi+tte +tat he ha+t ne sy+tt me hym ner shake - 
He is +te sloweste mon +tat euer wes yboren.
Wher he were o +te feld pycchynde stake,
For hope of ys +tornes to dutten is doren,
He mot myd is twybyl o+ter trous make,
O+ter al is dayes werk +ter were yloren.

+Tis ilke mon vpon heh when er he were,
Wher he were y +te mone boren ant yfed,
He lene+t on is forke ase a grey frere.
+Tis crokede caynard sore he is adred!
Hit is mony day go +tat he was here.
Ichot of is ernde he na+t nout ysped:
He ha+t hewe sumwher a bur+ten of brere - 
+Tarefore sum hayward ha+t taken ys wed.

'+Gef +ty wed ys ytake, bring hom +te trous!
Sete for+t +tyn o+ter fot, stryd ouer sty!
We shule preye +te haywart hom to vr hous
Ant maken hym at heyse for +te maystry -  
<P 128>
Drynke to hym deorly of fol god bous,
Ant oure dame Douse shal sitten hym by.
When +tat he is dronke ase a dreynt mous,
+tenne we schule borewe +te wed ate bayly.'

+Tis mon here+t me nout, +tah Ich to hym crye;
Ichot +te cherl is def - +te del hym todrawe!
+Tah Ich +ge+ge vpon he+t nulle nout hye - 
+Te lostlase ladde con nout o lawe.
Hupe for+t, Hubert, hosede pye!
Ichot +tart amarscled into +te mawe.
+Tah me teone wi+t hym +tat myn teh mye,
+Te cherld nul nout adoun er +te day dawe. 



