<B CMNTEST>
<Q M3 XX NEWT WYCNEW>
<N NEW TEST WYCL>
<A X>
<C M3>
<O 1350-1420>
<M 1350-1420>
<K CONTEMP>
<D SL>
<V PROSE>
<T BIBLE>
<G TRANSL>
<F LATIN>
<W WRITTEN>
<X X>
<Y X>
<H X>
<U X>
<E X>
<J X>
<I X>
<Z X>
<S SAMPLE X>


[^TEXT:  THE NEW TESTAMENT.
THE NEW TESTAMENT IN ENGLISH ACCORDING
TO THE VERSION BY JOHN WYCLIFFE ABOUT
A. D. 1380 AND REVISED BY JOHN PURVEY
ABOUT A. D. 1388.
ED. J. FORSHALL AND F. MADDEN.
OXFORD: CLARENDON PRESS, 1879.
JOHN I.1 - XI,56^]

<P I,1>
[}JOHN}]
[}CAP.I.}]

   In the bigynnyng was the word, and the word was at God, 
and God was the word. This was in the bigynnyng at God.
Alle thingis weren maad bi hym, and withouten hym was
maad no thing, that thing that was maad. In hym was lijf, 
and the lijf was the li+gt of men, and the li+gt schyneth in    #
derknessis,
and derknessis comprehendiden not it. A man was
sent fro God, to whom the name was Joon. This man cam
in to witnessyng, that he schulde bere witnessing of the li+gt,
that alle men schulden bileue bi hym. He was not the li+gt,
but that he schulde bere witnessing of the li+gt. There was a 
very li+gt, which li+gtneth ech man that cometh in to this      #
world.
He was in the world, and the world was maad bi hym, and
the world knew hym not. He cam in to his owne thingis,
and hise resseyueden hym not. But hou many euer resseyueden
hym, he +gaf to hem power to be maad the sones of
God, to hem that bileueden in his name; the whiche not
of bloodis, nether of the wille of fleische, nether of the
wille of man, but ben borun of God. And the word was
maad man, and dwellyde among vs, and we han seyn the
glorie of hym, as the glorie of the oon bigetun sone of
the fadir, ful of grace and of treuthe. Joon berith witnessyng
of hym, and crieth, and seith, This is, whom Y seide, He that
schal come aftir me, is maad bifore me, for he was tofor me,
and of the plente of hym we alle han takun, and grace for
grace. For the lawe was +gouun bi Moises; but grace and
treuthe is maad bi Jhesu Crist. No man sai euer God, no
but the oon bigetun sone, that is in the bosum of the fadir,
he hath teld out. And this is the witnessyng of Joon, whanne
Jewis senten fro Jerusalem prestis and dekenes to hym, that
thei schulden axe hym, Who art thou? 
<P I,20>
He knoulechide,
and denyede not, and he knoulechide, For Y am not Crist.
And thei axiden hym, What thanne? Art thou Elie? And
he seide, Y am not. Art thou a profete? And he answeride,
Nay. Therfor thei seiden to hym, Who art thou? that we
+gyue an answere to these that senten vs. What seist thou of    #
thi
self? He seide, Y (^am^) vois of a crier in deseert, Dresse     #
+ge the
weie of the Lord, as Ysaie, the prophete, seide. And thei that
weren sent, weren of the Fariseis. And thei axiden hym,
and seiden to hym, What thanne baptisist thou, if thou art
not Crist, nether Elie, nether a profete? Joon answeride to
hem, and seide, Y baptise in watir, but in the myddil of +gou
hath stonde oon, that +ge knowen not; he it is, that schal
come aftir me, that was maad bifor me, of whom Y am
not worthi to louse the thwong of his schoo. These thingis
weren don in Bethanye bi+gende Jordan, whare Joon was           #
baptisyng. 
Anothir day Joon say Jhesu comynge to hym, and
he seide, Lo! the lomb of God; lo! he that doith awei the
synnes of the world. This is he, that Y seide of, Aftir me
is comun a man, which was maad bifor me; for he was
rather than Y. And Y knew hym not, but that he be schewid
in Israel, therfor Y cam baptisynge in watir. And Joon bar
witnessyng, and seide, That Y sei+g the spirit comynge doun
as a culuer fro heuene, and dwellide on hym. And Y knew
hym not; but he that sente me to baptise in watir, seide
to me, On whom thou seest the Spirit comynge doun, and
dwellynge on hym, this is he, that baptisith in the Hooli
Goost. And Y say, and bar witnessyng, that this is the sone
of God. Anothir dai Joon stood, and tweyne of hise disciplis; 
and he biheeld Jhesu walkinge, and seith, Lo! the
lomb of God. And twei disciplis herden hym spekynge, and
folewiden Jhesu. And Jhesu turnede, and say hem suynge
hym, and seith to hem, What seken +ge? And thei seiden to
hym, Rabi, that is to seie, Maistir, where dwellist thou? And   #
he
seith to hem, Come +ge, and se. And thei camen, and sayn
where he dwellide; and dwelten with hym that dai. And it
was as the tenthe our. 
<P I,40>
And Andrewe, the brother of Symount
Petir, was oon of the tweyne, that herden of Joon, and hadden
sued hym. This foond first his brother Symount, and he
seide to him, We han foundun Messias, that is to seie, Crist;
and he ledde him to Jhesu. And Jhesus bihelde hym, and
seide, Thou art Symount, the sone of Johanna; thou schalt
be clepid Cefas, that is to seie, Petre. And on the morewe
he wolde go out in to Galilee, and he foond Filip; and he
seith to hym, Sue thou me. Filip was of Bethsaida, the citee
of Andrew and of Petre. Filip foond Nathanael, and seide to 
hym, We han foundun Jhesu, the sone of Joseph, of Nazareth, 
whom Moyses wroot in the lawe and profetis. And
Nathanael seide to hym, Of Nazareth may sum good thing
be? Filip seide to hym, Come, and se. Jhesus si+g Nathanael
comynge to hym, and seide to hym, Lo! verili a man of
Israel, in whom is no gile. Nathanael seide to hym, Wherof
hast thou knowun me? Jhesus answerde, and seide to hym,
Bifor that Filip clepide thee, whanne thou were vndur the fige
tree, Y sai+g thee. Nathanael answerde to hym, and seide,
Rabi, thou art the sone of God, thou art kyng of Israel.
Jhesus answerde, and seide to hym, For Y seide to thee,
Y saw+g thee vndur the fige tre, thou bileuest; thou schalt
se more than these thingis. And he seide to hem, Treuli,
treuli, Y seie to +gou, +ge schulen se heuene opened, and the
aungels of God stiynge vp and comynge doun on mannys
sone.

<P II,1>
[}CAP. II.}]

   And the thridde dai weddyngis weren in the Cane of
Galilee; and the modir of Jhesu was there. And Jhesus was
clepid, and hise disciplis, to the weddyngis. And whanne
wijn failide, the modir of Jhesu seide to hym, Thei han not
wijn. And Jhesus seith to hir, What to me and to thee,
womman? myn our cam not +git. His modir seith to the
mynystris, What euere thing he seie to +gou, do +ge. And there
weren set sixe stonun cannes, aftir the clensyng of the Jewis,
holdynge ech tweyne ether thre metretis. And Jhesus seith
to hem, Fille +ge the pottis with watir. And thei filliden hem,
vp to the mouth. And Jhesus seide to hem, Drawe +ge now,
and bere +ge to the architriclyn. And thei baren. And whanne
the architriclyn hadde tastid the watir maad wiyn, and wiste
not wherof it was, but the mynystris wisten that drowen the
watir, the architriclyn clepith the spouse, and seith to hym,
Ech man settith first good wiyn, and whanne men ben fulfillid,
thanne that that is worse; but thou hast kept the good
wiyn in to this tyme. Jhesus dide this the bigynnyng of
signes in the Cane of Galilee, and schewide his glorie; and
hise disciplis bileueden in hym. Aftir these thingis he cam
doun to Cafarnaum, and his modir, and hise britheren, and
hise disciplis; and thei dwelliden there not many daies. And
the pask of Jewis was ny+g, and Jhesus wente vp to Jerusalem.
And he foond in the temple men sillynge oxun, and
scheep, and culueris, and chaungeris sittynge. And whanne
he hadde maad as it were a scourge of smale cordis, he
droof out alle of the temple, and oxun, and scheep; and
he schedde the money of chaungeris, and turnede vpsedoun
the boordis. And he seide to hem that selden culueris, Take
awei fro hennus these thingis, and nyle +ge make the hous of
my fadir an hous of marchaundise. And hise disciplis hadden
mynde, for it was writun, The feruent loue of thin hous hath
etun me. Therfor the Jewis answeriden, and seiden to hym,
What token schewist thou to vs, that thou doist these thingis?
Jhesus answerde, and seide to hem, Vndo +ge this temple, and
in thre daies Y schal reise it. 
<P II,20>
Therfor the Jewis seiden to
hym, In fourti and sixe +geer this temple was bildid, and       #
schalt
thou in thre daies reise it? But he seide of the temple of his
bodi. Therfor whanne he was risun fro deeth, hise disciplis
hadden mynde, that he seide these thingis (^of his bodi^) ; and
thei bileueden to the scripture, and to the word that Jhesus
seide. And whanne Jhesus was at Jerusalem in pask, in the
feeste dai, many bileueden in his name, seynge his signes that
he dide. But Jhesus trowide not hym silf to hem, for he
knewe alle men; and for it was not nede to hym, that ony man
schulde bere witnessyng, for he wiste, what was in man.

<P III,1>
[}CAP. III.}]

   And there was a man of the Farisees, Nychodeme bi
name, a prince of the Jewis. And he cam to Jhesu bi
ni+gt, and seide to hym, Rabi, we witen, that thou art comun
fro God maister; for no man may do these signes, that
thou doist, but God be with hym. Jhesus answerde, and
seide to hym, Treuli, treuli, Y seie to thee, but a man be
borun a+gen, he may not se the kyngdom of God. Nychodeme
seide to hym, Hou may a man be borun, whanne 
he is eeld? whether he may entre a+gen in to his modris
wombe, and be borun a+gen? Jhesus answeride, Treuli,
treuli, Y seie to thee, but a man be borun a+gen of watir,
and of the Hooli Goost, he may not entre in to the kyngdom
of God. That that is borun of the fleisch, is fleisch; and
that that is borun of spirit, is spirit. Wondre thou not,
for Y seide to thee, It bihoueth +gou to be borun a+gen. The
spirit brethith where he wole, and thou herist his vois, but
thou wost not, fro whennus he cometh, ne whidir he goith;
so is ech man that is borun of the spirit. Nychodeme
answeride, and seide to hym, Hou moun these thingis be
don? Jhesus answeride, and seide to hym, Thou art a
maister in Israel, and knowist not these thingis? Treuli,
treuli, Y seie to thee, for we speken that that we witen,
and we witnessen that that we han seyn, and +ge taken not
oure witnessyng. If Y haue seid to +gou ertheli thingis,
and +ge bileuen not, hou if Y seie to +gou heueneli thingis,
schulen +ge  bileue? And no man stieth in to heuene, but
he that cam doun fro heuene, mannys sone that is in heuene.
And as Moises areride a serpent in desert, so it bihoueth
mannys sone to be reisid, that ech man that bileueth in
hym, perische not, but haue euerlastynge lijf. For God
louede so the world, that he +gaf his oon bigetun sone, that
ech man that bileueth in him perische not, but haue             #
euerlastynge 
lijf. For God sente not his sone in to the world, 
that he iuge the world, but that the world be saued bi him.
He that bileueth in hym, is not demed; but he that bileueth
not, is now demed, for he bileueth not in the name of the
oon bigetun sone of God. And this is the dom, for li+gt cam
in to the world, and men loueden more derknessis than li+gt;
for her werkes weren yuele. 
<P III,20>
For ech man that doith yuele,
hatith the li+gt; and he cometh not to the li+gt, that hise     #
werkis
be not repreued. But he that doith treuthe, cometh to the
li+gt, that hise werkis be schewid, that thei ben don in God.
Aftir these thingis Jhesus cam, and hise disciplis, in to the
loond of Judee, and there he dwellide with hem, and baptiside.
And Joon was baptisinge in Ennon, bisidis Salym,
for many watris weren there; and thei camen, and weren
baptisid. And Joon was not +git sent in to prisoun.
Therfor a questioun was maad of Jonys disciplis with
the Jewis, of the purificacioun. And thei camen to Joon,
and seiden to hym, Maister, he that was with thee bi+gonde
Jordan, to whom thou hast borun witnessyng, lo! he baptisith,
and alle men comen to hym. Joon answerde, and
seide, A man may not take ony thing, but it be +gouun to
hym fro heuene. +Ge +gou silf beren witnessyng to me,
that Y seide, Y am not Crist, but that Y am sent bifore
hym. He that hath a wijf, is the hosebonde; but the
freend of the spouse that stondith, and herith hym, ioieth
with ioye, for the vois of the spouse. Therfor in this thing
my ioye is fulfillid. It bihoueth hym to wexe, but me to
be maad lesse. He that cam from aboue, is aboue alle;
he that is of the erthe, spekith of the erthe; he that cometh
from heuene, is aboue alle. And he witnessith that thing
that he hath seie, and herde, and no man takith his             #
witnessing. 
But he that takith his witnessyng, hath confermyd
that God is sothefast. But he whom God hath sent, spekith
the wordis of God; for not to mesure God +gyueth the spirit.
The fadir loueth the sone, and he hath +gouun alle thingis
in his hoond. He that bileueth in the sone, hath euerlastynge 
lijf; but he that is vnbileueful to the sone, schal
not se euerlastynge lijf, but the wraththe of God dwellith
on hym. 

<P IV,1>
[}CAP. IV.}]

   Therfor as Jhesu knew, that the Farisees herden, that
Jhesu makith and baptisith mo disciplis than Joon, thou+g
Jhesus baptiside not, but hise disciplis, he lefte Judee, and
wente a+gen in to Galilee. And it bihofte hym to passe
bi Samerie. Therfor Jhesus cam in to a citee of Samarie,
that is seid Sicar, bisidis the place, that Jacob +gaf to       #
Joseph,
his sone. And the welle of Jacob was there; and Jhesus
was weri of the iourney, and sat vpon the welle. And
the our was, as it were the sixte. And a womman cam fro
Samarie, to drawe watir. And Jhesus seith to hir, +Gyue
me drynk. And hise disciplis weren gon in to the citee,
to bie mete. Therfor thilke womman of Samarie seith to
him, Hou thou, whanne thou art a Jewe, axist of me drynk,
that am a womman of Samarie? for Jewis vsiden not (^to dele^)
with Samaritans. Jhesus answerde, and seide to hir, If thou
wistist the +gifte of God, and who he is, that seith to thee,
+Gyue me drynk, thou perauenture woldist haue axid of hym,
and he schulde haue +gouun to thee quyk watir. The womman
seith to him, Sire, thou hast not where ynne to drawe, and
the pit is deep; wherof thanne hast thou quik watir?
Whethir thou art grettere than oure fadir Jacob, that +gaf
to vs the pit? and he drank therof, and hise sones, and
hise beestis. Jhesus answerde, and seide to hir, Eche
man that drynkith of this watir, schal thirste efte soone;
but he that drynkith of the watir that Y schal +gyue hym,
schal not thirste with outen ende; but the watir that Y
schal +gyue hym, schal be maad in hym a welle of watir,
spryngynge vp in to euerlastynge lijf. The womman seith
to hym, Sire, +gyue me this watir, that Y thirste not, nether
come hidur to drawe. Jhesus seith to hir, Go, clepe thin
hosebonde, and come hidir. The womman answerde, and
seide, Y haue noon hosebonde. Jhesus seith to hir, Thou
seidist wel, That Y haue noon hosebonde; for thou hast
hadde fyue hosebondis, and he that thou hast, is not thin
hosebonde. This thing thou seidist sotheli. The womman
seith to hym, Lord, Y se, that thou art a prophete. 
<P IV,20>
Oure
fadris worschipiden in this hil, and +ge seien, that at         #
Jerusalem
is a place, where it bihoueth to worschipe. Jhesus seith
to hir, Womman, bileue thou to me, for the our schal come,
whanne nether in this hil, nethir in Jerusalem, +ge schulen
worschipe the fadir. +Ge worschipen that +ge knowen not;
we worschipen that that we knowen; for helthe is of the
Jewis. But the tyme is comun, and now it is, whanne
trewe worschiperis schulen worschipe the fadir in spirit
and treuthe; for also the fadir sekith suche, that worschipen
hym. God is a spirit, and it bihoueth hem that worschipen
hym, to worschipe in spirit and treuthe. The womman
seith to hym, Y woot that Messias is comun, that is seid
Crist; therfor whanne he cometh, he schal telle vs alle
thingis. Jhesus seith to hir, Y am he, that spekith with
thee. And anoon hise disciplis camen, and wondriden,
that he spak with the womman; netheles no man seide
to hym, What sekist thou, or, What spekist thou with hir?
Therfor the womman lefte hir watir pot, and wente in to
the citee, and seide to tho men, Come +ge, and se +ge a
man, that seide to me alle thingis that Y haue don;
whether he be Crist? And thei wenten out of the citee,
and camen to hym. In the mene while hise disciplis
preieden hym, and seiden, Maistir, ete. But he seide to
hem, Y haue mete to ete, that +ge knowen not. Therfor
disciplis seiden togidir, Whether ony man hath brou+gt him
mete to ete? Jhesus seith to hem, My mete is, that Y do
the wille of hym that sente me, that Y perfourme the werk
of hym. Whether +ge seien not, that +git foure monethis ben,
and rype corn cometh? Lo! Y seie to +gou, lifte vp +goure
i+gen, and se +ge the feeldis, for now thei ben white to repe.
And he that repith takith hire, and gaderith fruyt in to
euerlastynge lijf; that bothe he that sowith, and he that
repith, haue ioye togidere. In this thing is the word trewe,
for anothir is that sowith, and anothir the repith. Y sente
+gou to repe, that that +ge haue not trauelid; othere men
han trauelid, and +ge han entrid in to her trauels. And of
that citee many Samaritans bileueden in hym, for the
word of the womman, that bare witnessyng, That he seide
to me alle thingis that Y haue don. 
<P IV,40>
Therfor whanne Samaritans
camen to hym, thei preieden hym to dwelle there;
and he dwelte there twey daies. And many mo bileueden
for his word, and seiden to the womman, That now not
for thi speche we bileuen; for we han herd, and we witen,
that this is verili the sauyour of the world. And aftir twei
daies he wente out fro thennus, and wente in to Galilee,
And he bar witnessyng, that a profete in his owne cuntre
hath noon onour. Therfor whanne he cam in to Galilee,
men of Galilee resseyueden hym, whanne thei hadden seyn
alle thingis that he hadde don in Jerusalem in the feeste
dai; for also thei hadden comun to the feeste dai.
Therfor he cam eftsoone in to the Cane of Galile,
where he made the watir wiyn. And a litil kyng was,
whos sone was sijk at Cafarnaum. Whanne this hadde
herd, that Jhesu schulde come fro Judee in to Galilee, he
wente to hym, and preiede hym, that he schulde come
doun, and heele his sone; for he bigan to die. Therfor
Jhesus seide to him, But +ge se tokenes and grete wondris,
+ge bileuen not. The litil kyng seith to hym, Lord, come
doun, bifor that my sone die. Jhesus seith to hym, Go,
thi sone lyueth. The man bileuede to the word, that
Jhesus seide to hym, and he wente. And now whanne
he cam doun, the seruauntis camen a+gens hym, and telden
to hym, and seiden, That his sone lyuede. And he axide
of hem the our, in which he was amendid. And thei
seiden to hym, For +gistirdai in the seuenthe our the feuer
lefte him. Therfor the fadir knewe, that thilke our it was,
in which Jhesus seide to hym, Thi sone lyueth; and he
bileuede, and al his hous. Jhesus dide eft this secounde
tokene, whanne he cam fro Judee in to Galilee.

<P V,1>
[}CAP. V.}]

   Aftir these thingis ther was a feeste dai of Jewis, and
Jhesus wente vp to Jerusalem. And in Jerusalem is a waissynge
place, that in Ebrew is named Bethsaida, and hath fyue
porchis. In these lay a greet multitude of sike men, blynde,
crokid, and drie, abidynge the mouyng of the watir. For the
aungel of the Lord cam doun certeyne tymes in to the watir,
and the watir was moued; and he that first cam doun in to
the sisterne, aftir the mouynge of the watir, was maad hool of
what euer sijknesse he was holdun. And a man was there,
hauynge ei+gte and thritti +geer in his sikenesse. And whanne
Jhesus hadde seyn hym liggynge, and hadde knowun, that he
hadde myche tyme, he seith to hym, Wolt thou be maad
hool? The sijk man answerde to hym, Lord, Y haue no
man, that whanne the watir is moued, to putte me in to the
cisterne; for the while Y come, anothir goith doun bifor me.
Jhesus seith to hym, Rise vp, take thi bed, and go. And
anoon the man was mad hool, and took vp his bed, and
wente forth. And it was sabat in that dai. Therfor the
Jewis seiden to him that was maad hool, It is sabat, it is not
leueful to thee, to take awei thi bed. He answeride to hem,
He that made me hool, seide to me, Take thi bed, and go.
Therfor thei axiden him, What man is that, that seide to thee,
Take vp thi bed, and go? But he that was maad hool, wiste
not who it was. And Jhesus bowide awei fro the puple, that
was set in the place. Aftirward Jhesus foond hym in the
temple, and seide to hym, Lo! thou art maad hool; now
nyle thou do synne, lest any worse thing bifalle to thee. 
Thilke man wente, and telde to the Jewis, that it was Jhesu
that made hym hool. Therfor the Jewis pursueden Jhesu,
for he dide this thing in the sabat. And Jhesus answeride
to hem, My fadir worchith til now, and Y worche. Therfor
the Jewis sou+gten more to sle hym, for not oneli he brak the
sabat, but he seide that God (^was^) his fadir, and made hym
euene to God. Therfor Jhesus answerde, and seide to hem,
Treuli, treuli, Y seye to +gou, the sone may not of hym silf do
ony thing, but that thing that he seeth the fadir doynge; for
what euere thingis he doith, the sone doith in lijk maner tho
thingis. 
<P V,20>
For the fadir loueth the sone, and schewith to hym
alle thingis that he doith; and he schal schewe to hym
grettere werkis than these, that +ge wondren. For as the
fadir reisith deed men, and quykeneth, so the sone quykeneth
whom he wole. For nethir the fadir iugith ony man, but
hath +gouun ech doom to the sone, that alle men onoure the
sone, as thei onouren the fadir. He that onourith not the 
sone, onourith not the fadir that sente hym. Treuli, treuli, Y
seie to +gou, that he that herith my word, and bileueth to hym
that sente me, hath euerlastynge lijf, and he cometh not in
to doom, but passith fro deeth in to lijf. Treuli, treuli
Y seie to +gou, for the our cometh, and now it is, whanne deed
men schulen here the vois of Goddis sone, and thei that
heren, schulen lyue. For as the fadir hath lijf in hym silf,
so he +gaf to the sone, to haue lijf in him silf; and he +gaf   #
to
hym power to make doom, for he is mannys sone. Nyle +ge
wondre this, for the our cometh, in which alle men that ben
in birielis, schulen here the voice of Goddis sone. And thei
that han do goode thingis, schulen go in to a+genrisyng of
lijf; but thei that han done yuele thingis, in to a+genrisyng   #
of
doom. Y may no thing do of my silf, but as Y here, Y deme,
and my doom is iust, for Y seke not my wille, but the wille
of the fadir that sente me. If Y bere witnessing of my silf,
my witnessyng is not trewe; another is that berith witnessyng
of me, and Y woot that his witnessyng is trewe, that he berith
of me. +Ge senten to Joon, and he bar witnessyng to treuthe.
But Y take not witnessyng of man; but Y seie these thingis,
that +ge be saaf. He was a lanterne brennynge and schynynge;
but +ge wolden glade at an our in his li+gt. But Y haue
more witnessyng than Joon, for the werkis that my fadir +gaf
to me to perfourme hem, thilke werkis that Y do beren           #
witnessyng
of me, that the fadir sente me. And the fadir that
sente me, he bar witnessyng of me. Nether +ge herden euere
his vois, nether +ge seien his licnesse. And +ge han not his
word dwellynge in +gou; for +ge byleuen not to hym, whom he
sente. Seke +ge scripturis, in which +ge gessen to haue         #
euerlastynge
lijf; and tho it ben, that beren witnessyng of me.
<P V,40>
And +ge wolen not come to me, that +ge haue lijf. Y take not
clerenesse of men; but Y haue knowun +gou, that +ge han
not the loue of God in +gou. Y cam in the name of my
fadir, and +ge token not me. If another come in his owne
name, +ge schulen resseyue hym. Hou moun +ge bileue, that
resseyuen glorie ech of othere, and +ge seken not the glorie
that is of God aloone? Nyle +ge gesse, that Y am to accuse
+gou anentis the fadir; it is Moises that accusith +gou, in     #
whom
+ge hopen. For if +ge bileueden to Moises, perauenture +ge
schulden bileue also to me; for he wroot of me. But if +ge
bileuen not to hise lettris, hou schulen +ge bileue to my
wordis? 

<P VI,1>
[}CAP. VI.}]

   Aftir these thingis Jhesus wente ouere the see of Galilee,
that is Tiberias. And a greet multitude suede hym; for thei
sayn the tokenes, that he dide on hem that weren sijke.
Therfor Jhesus wente in to an hil, and sat there with hise
disciplis. And the paske was ful ni+g, a feeste dai of the
Jewis. Therfor whanne Jhesus hadde lift vp hise i+gen, and
hadde seyn, that a greet multitude cam to hym, he seith to
Filip, Wherof schulen we bie looues, that these men ete?
But he seide this thing, temptynge hym; for he wiste what
he was to do. Filip answerde to hym, The looues of tweyn
hundrid pans sufficen not to hem, that ech man take a litil
what. Oon of hise disciplis, Andrew, the brothir of Symount
Petre, seith to him, A child is here, that hath fyue barli
looues and twei fischis; but what ben these  among so
manye? Therfor Jhesus seith, Make +ge hem sitte to the
mete. And there was myche hey in the place. And so men
saten to the mete, as fyue thousynde in noumbre. And
Jhesus took fyue looues, and whanne he hadde do thankyngis,
he departide to men that saten to the mete, and also
of the fischis, as myche as thei wolden. And whanne thei
weren fillid, he seide to hise disciplis, Gadir +ge the relifs  #
that
ben left, that thei perischen not. And so thei gadriden, and
filliden twelue cofyns of relif of the fyue barli looues and
twei fischis, that lefte to hem that hadden etun. Therfor
tho men, whanne thei hadden seyn the signe that he hadde
don, seiden, For this is verili the profete, that is to come    #
in to
the world. And whanne Jhesus hadde knowun, that thei
weren to come to take hym, and make hym kyng, he flei+g
aloone eft in to an hille. And whanne euentid was comun,
his disciplis wenten doun to the see. And thei wenten vp in
to a boot, and thei camen ouer the see in to Cafarnaum.
And derknessis weren maad thanne, and Jhesus was not
come to hem. And for a greet wynde blew, the see roos vp.
Therfor whanne thei hadden rowid as fyue and twenti furlongis
or thretti, thei seen Jhesus walkynge on the see, and to
be nei+g the boot; and thei dredden. 
<P VI,20>
And he seide to hem,
Y am; nyle +ge drede. Therfor thei wolden take hym in to
the boot, and anoon the boot was at the loond, to which thei 
wenten. On the tother dai the puple, that stood ouer the see,
say, that ther was noon other boot there but oon, and that
Jhesu entride not with hise disciplis in to the boot, but hise
disciplis aloone wenten. But othere bootis camen fro Tiberias 
bisidis the place, where thei hadden eetun breed, and
diden thankyngis to God. Therfor whanne the puple hadde
seyn, that Jhesu was not there, nether hise disciplis, thei
wenten vp in to bootis, and camen to Cafarnaum, sekynge
Jhesu. And whanne thei hadden foundun hym ouer the see,
thei seiden to hym, Rabi, hou come thou hidur? Jhesus
answerde to hem, and seide, Treuli, treuli, Y seie to +gou, +ge
seken me, not for +ge sayn the myraclis, but for +ge eten of
looues, and weren fillid. Worche +ge not mete that perischith,
but that dwellith in to euerlastynge lijf, which (^mete^)       #
mannys
sone schal +gyue to +gou; for God the fadir hath markid hym.
Therfor thei seiden to hym, What schulen we do, that we
worche the werkis of God? Jhesus answerde, and seide to
hem, This is the werk of God, that +ge bileue to hym, whom
he sente. Therfor thei seiden to hym, What tokene thanne
doist thou, that we seen, and bileue to thee? what worchist
thou? Oure fadris eeten manna in desert, as it is writun, He
+gaf to hem breed fro heuene to ete. Therfor Jhesus seith to
hem, Treuli, treuli, Y seie to +gou, Moyses +gaf +gou not breed
fro heuene, but my fadir +gyueth +gou veri breed fro heuene;
for it is very breed that cometh doun fro heuene, and +gyueth
lijf to the world. Therfor thei seiden to hym, Lord, euere
+gyue vs this breed. And Jhesus seide to hem, Y am breed
of lijf; he that cometh to me, schal not hungur; he that
bileueth in me, schal neuere thirste. But Y seid to +gou,
that +ge han seyn me, and +ge bileueden not. Al thing, that
the fadir +gyueth to me, schal come to me; and Y schal not
caste hym out, that cometh to me. For Y cam doun fro
heuene, not that Y do my wille, but the wille of hym that
sente me. And this is the wille of the fadir that sente
me, that al thing that the fadir +gaf me, Y leese not of it,
but a+gen reise it in the laste dai. 
<P VI,40>
And this is the wille of my  
fadir that sente me, that ech man that seeth the sone, and
bileueth in hym, haue euerlastynge lijf; and Y schal a+gen
reyse hym in the laste dai. Therfor Jewis grutchiden of
hym, for he hadde seid, Y am breed that cam doun fro
heuene. And thei seiden, Whether this is not Jhesus, the
sone of Joseph, whos fadir and modir we han knowun. Hou
thanne seith this, That Y cam doun fro heuene? Therfor
Jhesus answerde, and seide to hem, Nyle +ge grutche togidere.
No man may come to me, but if the fadir that sente me,
drawe hym; and Y schal a+gen reise hym in the laste dai.
It is writun in prophetis, And alle men schulen be able for to
be tau+gt of God. Ech man that herde of the fadir, and hath
lerned, cometh to me. Not for ony man hath sey the fadir,
but this that is of God, hath sey the fadir. Sotheli, sotheli,
Y seie to +gou, he that bileueth in me, hath euerlastynge lijf.
Y am breed of lijf. +Goure fadris eeten manna in desert,
and ben deed. This is breed comynge doun fro heuene,
that if ony man ete therof, he die not. Y am lyuynge breed,
that cam doun fro heuene. If ony man ete of this breed, he
schal lyue withouten ende. And the breed that Y schal +gyue,
is my fleisch for the lijf of the world. Therfor the Jewis
chidden togidere, and seiden, Hou may this +gyue to vs his
fleisch to ete? Therfor Jhesus seith to hem, Treuli, treuli,
Y seie to +gou, but +ge eten the fleisch of mannus sone, and
drenken his blood, +ge schulen not haue lijf in +gou. He that
etith my fleisch, and drynkith my blood, hath euerlastynge
lijf, and Y schal a+gen reise hym in the laste dai. For my
fleisch is veri mete, and my blood is very drynk. He that
etith my fleisch, and drynkith my blood, dwellith in me, and
Y in hym. As my fadir lyuynge sente me, and Y lyue for the
fadir, and he that etith me, he schal lyue for me. This is
breed, that cam doun fro heuene. Not as +goure fadris eten
manna, and ben deed; he that etith this breed, schal lyue
withouten ende. He seide these thingis in the synagoge,
techynge in Cafarnaum. 
<P VI,60>
Therfor many of hise disciplis
herynge, seiden, This word is hard, who may here it? But
Jhesus witynge at hym silf, that hise disciplis grutchiden
of this thing, seide to hem, This thing sclaundrith +gou?
Therfor if +ge seen mannus sone stiynge, where he was bifor?
It is the spirit that quykeneth, the fleisch profitith no       #
thing;
the wordis that Y haue spokun to +gou, ben spirit and lijf.
But ther ben summe of +gou that bileuen not. For Jhesus
wiste fro the bigynnynge, which weren bileuynge, and who
was to bitraye hym. And he seide, Therfor Y seide to +gou,
that no man may come to me, but it were +gouun to hym of my
fadir. Fro this tyme many of hise disciplis wenten abak,
and wenten not now with hym. Therfor Jhesus seide to the
twelue, Whether +ge wolen also go awei? And Symount
Petre answeride to hym, Lord, to whom schulen we gon?
Thou hast wordis of euerlastynge lijf; and we bileuen, and
han knowun, that thou art Crist, the sone of God. Therfor
Jhesus answerde to hem, Whether Y chees not +gou twelue,
and oon of +gou is a feend? And he seide this of Judas
of Symount Scarioth, for this was to bitraye hym, whanne
he was oon of the twelue.

<P VII,1>
[}CAP. VII.}]

   Aftir these thingis Jhesus walkide in to Galilee, for he
wolde not walke in to Judee, for the Jewis sou+gten to sle
hym. And ther was nei+g a feeste dai of the Jewis, Senofegia.
And hise britheren seiden to hym, Passe fro hennus,
and go in to Judee, that also thi disciplis seen thi werkis
that thou doist; for no man doith ony thing in hiddlis, and
hym silf sekith to be opyn. If thou doist these thingis,
schewe thi silf to the world. For nether hise britheren
bileueden in hym. Therfor Jhesus seith to hem, My tyme
cam not +git, but +goure tyme is euermore redi. The world
may not hate +gou, sothely it hatith me; for Y bere witnessyng
therof, that the werkis of it ben yuele. Go +ge vp to
this feeste dai, but Y schal not go vp to this feeste dai,
for my tyme is not +git fulfillid. Whanne he hadde seid
these thingis, he dwelte in Galilee. And aftir that hise
britheren weren gon vp, thanne he +gede vp to the feeste
dai, not opynli, but as in priuyte. Therfor the Jewis sou+gten
hym in the feeste dai, and seiden, Where is he? And
myche grutchyng was of hym among the puple. For
summe seiden, That he is good; and othere seiden, Nai,
but he disceyueth the puple; netheles no man spak opynli
of hym, for drede of the Jewis. But whanne the myddil
feeste dai cam, Jhesus wente vp in to the temple, and
tau+gte. And the Jewis wondriden, and seiden, Hou can
this (^man^) lettris, sithen he hath not lerned? Jhesus         #
answerde
to hem, and seide, My doctryne is not myn, but his that
sente me. If ony man wole do his wille, he schal knowe
of the techyng, whethir it be of God, or Y speke of my
silf. He that spekith of hym silf, sekith his owne glorie;
but he that sekith the glorie of hym that sente hym, is
sothefast, and vnri+gtwisnesse is not in hym. Whether Moises
+gaf not to +gou a lawe, and noon of +gou doith the lawe? What
seken +ge to sle me? 
<P VII,20>
And the puple answerde, and seide,
Thou hast a deuel; who sekith to sle thee? Jhesus answerde,
and seide to hem, Y haue don o werk, and alle +ge wondren.
Therfor Moises +gaf to +gou circumcisioun; not for it is of
Moyses, but of the fadris; and in the sabat +ge circumciden a
man. If a man take circumcicioun in the sabat, that the lawe
of Moises be not brokun, han +ge indignacioun to me, for
Y made al a man hool in the sabat? Nile +ge deme aftir
the face, but deme +ge a ri+gtful doom. Therfor summe of
Jerusalem seiden, Whethir this is not he, whom the Jewis
seken to sle? and lo! he spekith opynli, and thei seien no
thing to hym. Whether the princes knewen verili, that this
is Crist? But we knowun this (^man^) , of whennus he is; but
whanne Crist schal come, no man woot of whennus he is.
Therfor Jhesus criede in the temple techynge, and seide,
+ge knowen me, and +ge knowen of whennus Y am; and
Y cam not of my silf, but he is trewe that sente me,
whom +ge knowen not. Y knowe hym, and if Y seie that
Y knowe hym not, Y schal be lijk to +gou, a liere; but
Y knowe hym, for of hym Y am, and he sente me. Therfor
thei sou+gten to take hym, and no man sette on hym
hoondis, for his our cam not +git. And many of the puple
bileueden in hym, and seiden, Whanne Crist schal come,
whether he schal do mo tokenes, than tho that this doith?
Farisees herden the puple musinge of hym these thingis;
and the princis and Farisees senten mynystris, to take
hym. Therfor Jhesus seide to hem, +Git a litil tyme Y
am with +gou, and Y go to the fadir, that sente me. +Ge
schulen seke me, and +ge schulen not fynde; and where
Y am, +ge may not come. Therfor the Jewis seiden to
hem silf, Whidur schal this gon, for we schulen not fynde
hym? whether he wole go in to the scateryng of hethene
men, and wole teche the hethene? What is this word,
which he seide, +Ge schulen seke me, and +ge schulen not
fynde; and where Y am, +ge moun not come? But in the
laste dai of the greet feeste, Jhesus stood, and criede, and
seide, If ony man thirstith, come he to me, and drynke.
He that bileueth in me, as the scripture seith. Floodis of
quyk watir schulen flowe fro his wombe. But he seide this
thing of the Spirit, whom men that bileueden in hym
schulden take; for the Spirit was not +git +gouun, for Jhesus
was not +git glorified. 
<P VII,40>
Therfor of that cumpanye, whanne
thei hadden herd these wordis of hym, thei seiden, This
is verili a prophete. Othere seiden, This is Crist. But
summe seiden, Whether Crist cometh fro Galilee? Whether
the scipture seith not, that of the seed of Dauid, and of
the castel of Bethleem, where Dauid was, Crist cometh?
Therfor discencioun was maad among the puple for hym.
For summe of hem wolden haue take hym, but no man
sette hondis on hym. Therfor the mynystris camen to
bischopis and Farisees, and thei seiden to hem, Whi
brou+gten +ge not hym? The mynystris answeriden, Neuere
man spak so, as this (^man^) spekith. Therfor the Farisees
answeriden to hem, Whether +ge ben disseyued also? whether
ony of the pryncis or of the Farisees bileueden in hym?
But this puple, that knowith not the lawe, ben cursid.
Nychodeme seith to hem, he that cam to hym bi ny+gt,
that was oon of hem, Whethir oure lawe demith a man,
but it haue first herde of hym, and knowe what he doith?
Thei answeriden, and seiden to hym, Whether thou art
a man of Galilee also? Seke thou scripturis, and se thou,
that a prophete risith not of Galilee. And thei turneden
a+gen, ech in to his hous.

<P VIII,1>
[}CAP. VIII.}]

   But Jhesus wente in to the mount of Olyuete. And
eerli eft he cam in to the temple; and al the puple cam
to hym; and he sat, and tau+gte hem. And scribis and
Fariseis bryngen a womman takun in auoutrye, and thei
settiden hir in the myddil, and seiden to hym, Maystir,
this womman is now takun in auoutrie. And in the lawe
Moises comaundide vs to stoone suche; therfor what seist
thou? And thei seiden this thing temptynge hym, that
thei my+gten accuse hym. And Jhesus bowide hym silf
doun, and wroot with his fyngur in the erthe. And whanne
thei abiden axynge hym, he reiside hym silf, and seide to 
hem, He of +gou that is without synne, first caste a stoon
in to hir. And eft he bowide hym silf, and wroot in the
erthe. And thei herynge these thingis, wenten awei oon
aftir anothir, and thei bigunnen fro the eldre men; and
Jhesus dwelte aloone, and the womman stondynge in the
myddil. And Jhesus reiside hym silf, and seide to hir,
Womman, where ben thei that accusiden thee? no man
hath dampned thee. Sche seide, No man, Lord. Jhesus
seide (^to hir^) , Nethir Y schal dampne thee; go thou, and
now aftirward nyle thou synne more. Therfor eft Jhesus
spak to hem, and seide, Y am the li+gt of the world; he
that sueth me, walkith not in derknessis, but schal haue
the li+gt of lijf. Therfor the Fariseis seiden, Thou berist
witnessyng of thi silf; thi witnessyng is not trewe. Jhesus
answerde, and seide to hem, And if Y bere witnessyng
of my silf, my witnessyng is trewe; for Y woot fro whennus
Y cam, and whidur Y go. But +ge witen not fro whennus
Y cam, ne whidur Y go. For +ge demen aftir the fleisch,
but Y deme no man; and if Y deme, my doom is trewe,
for Y am not aloone, but Y and the fadir that sente me.
And in +goure lawe it is writun, that the witnessyng of
twei men is trewe. Y am, that bere witnessyng of my
silf, and the fadir that sente me, berith witnessyng of me.
Therfor thei seiden to hym, Where is thi fadir? Jhesus
answeride, Nether +ge knowen me, nethir +ge knowen my
fadir; if +ge knewen me, perauenture +ge schulden knowe
also my fadir. 
<P VIII,20>
Jhesus spak these wordis in the tresorie,
techynge in the temple; and no man took hym, for his
our cam not +git. Therfor eft Jhesus seide to hem, Lo!
Y go, and +ge schulen seke me, and +ge schulen die in +goure
synne; whidur Y go, +ge moun not come. Therfor the Jewis
seiden, Whether he schal sle hym silf, for he seith, Whidur Y
go, +ge moun not come? And he seide to hem, +Ge ben of bynethe,
Y am of aboue; +ge ben of this world, Y am not of this
world. Therfor Y seide to +gou, that +ge schulen die in +goure
synnes; for if +ge bileuen not that Y am, +ge schulen die in    #
+goure
synne. Therfor thei seiden to hym, Who art thou? Jhesus
seide to hem, The bigynnyng, which also speke to +gou. Y
haue many thingis to speke, and deme of +gou, but he that
sente me is sothefast; and Y speke in the world these
thingis, that Y herde of hym. And thei knewen not, that
he clepide his fadir God. Therfor Jhesus seith to hem,
Whanne +ge han areisid mannus sone, thanne +ge schulen
knowe, that Y am, and of my silf Y do no thing; but as
my fadir tau+gte me, Y speke these thingis. And he that
sente me is with me, and lefte me not aloone; for Y do
euermore tho thingis, that ben plesynge to hym. Whanne
he spak these thingis, manye bileueden in hym. Therfor
Jhesus seide to the Jewis, that bileueden in hym, If +ge
dwellen in my word, verili +ge schulen be my disciplis;
and +ge schulen knowe the treuthe, and the treuthe schal
make +gou fre. Therfor the Jewis answeriden to hym,
We ben the seed of Abraham, and we serueden neuere
to man; hou seist thou, That +ge schulen be fre? Jhesus
answeride to hem, Treuli, treuli, Y seie to +gou, ech man
that doith synne, is seruaunt of synne. And the seruaunt
dwellith not in the hows with outen ende, but the sone
dwellith with outen ende. Therfor if the sone make +gou
fre, verili +ge schulen be fre. Y woot that +ge ben Abrahams
sones, but +ge seken to sle me, for my word takith
not in +gou. Y speke tho thingis, that Y say at my fadir;
and +ge doen tho thingis, that +ge sayn at +goure fadir. Thei
answerden, and seiden to hym, Abraham is oure fadir.
Jhesus seith to hem, If +ge ben the sones of Abraham,
do +ge the werkis of Abraham. 
<P VIII,40>
But now +ge seken to sle
me, a man that haue spoken to +gou treuthe, that Y herde
of God; Abraham dide not this thing. +Ge doen the werkis
of +goure fadir. Therfor thei seiden to hym, We ben not
borun of fornycacioun; we han o fadir, God. But Jhesus
seith to hem, If God were +goure fadir, sotheli +ge schulden
loue me; for Y passide forth of God, and cam; for nether
Y cam of my silf, but he sente me. Whi knowen +ge not
my speche? for +ge moun not here my word. +Ge ben of
the fadir, the deuel, and +ge wolen do the desyris of +goure
fadir. He was a mansleere fro the bigynnyng, and he
stood not in treuthe; for treuthe is not in hym. Whanne
he spekith lesyng, he spekith of his owne; for he is a
liere, and fadir of it. But for Y seie treuthe, +ge bileuen
not to me. Who of +gou schal repreue me of synne? if
Y sey treuthe, whi bileuen +ge not to me? He that is of
God, herith the wordis of God; therfor +ge heren not,
for +ge ben not of God. Therfor the Jewis answeriden,
and seiden, Whether we seien not wel, that thou art a
Samaritan, and hast a deuel? Jhesus answerde, and seide,
Y haue not a deuel, but Y onoure my fadir, and +ge han
vnhonourid me. For Y seke not my glorye; there is he,
that sekith, and demeth. Treuli, treuli, Y seie to +gou, if
ony man kepe my word, he schal not taste deth with outen
ende. Therfor the Jewis seiden, Now we han knowun,
that thou hast a deuel. Abraham is deed, and the prophetis,
and thou seist, If ony man kepe my word, he schal not
taste deth withouten ende. Whether thou art grettere
than oure fader Abraham, that is deed, and the prophetis
ben deed; whom makist thou thi silf? Jhesus answeride,
If Y glorifie my silf, my glorie is nou+gt; my fadir, is that
glorifieth me, whom +ge seien, that he is +goure God. And
+ge han not knowun hym, but Y haue knowun hym; and
if Y seie that Y knowe hym not, Y schal be a liere lich
to +gou; but Y knowe hym, and Y kepe his word. Abraham,
+goure fadir, gladide to se my dai; and he sai+g, and
ioyede. Thanne the Jewis seiden to hym, Thou hast
not +git fifti +geer, and hast thou seien Abraham? Therfor
Jhesus seide to hem, Treuli, treuli, Y seie to +gou, bifor
that Abraham schulde be, Y am. Therfor thei token stonys,
to caste to hym; but Jhesus hidde hym, and wente out
of the temple.

<P IX,1>
[}CAP. IX.}]

   And Jhesus passynge, sei+g a man blynd fro the birthe.
And hise diciplis axiden hym, Maistir, what synnede this
man, or hise eldris, that he schulde be borun blynd?
Jhesus answeride, Nether this man synnede, nether hise
eldris; but that the werkis of God be schewid in hym.
It bihoueth me to worche the werkis of hym that sente
me, as longe as the dai is; the ny+gt schal come, whanne
no man may worche. As longe as Y am in the world,
Y am the li+gt of the world. Whanne he hadde seid these 
thingis, he spette in to the erthe, and made cley of the
spotil, and anoyntide the cley on hise i+gen, and seide to
hym, Go, and be thou waisschun in the watir of Siloe,
that is to seie, Sent. Thanne he wente, and waisschide,
and cam seynge. And so nei+gboris, and thei that hadden
seyn him bifor, for he was a beggere, seiden, Whether
this is not he, that sat, and beggide? Othere men seiden,
That this it is; othere men (^seyden^) , Nai, but he is lijc    #
hym.
But he seide, That Y am. Therfor thei seiden to hym,
Hou ben thin i+gen openyd? He answerde, Thilke man,
that is seid Jhesus, made clei, and anoyntide myn i+gen,
and seide to me, Go thou to the watre of Siloe, and
wassche; and Y wente, and wasschide, and say. And
thei seiden to hym, Where is he? He seide, Y woot not.
Thei leden hym that was blynd to the Farisees. And 
it was sabat, whanne Jhesus made cley, and openyde hise
i+gen. Eft the Farisees axiden hym, hou he hadde seyn.
And he seide to hem, He leide to me cley on the i+gen;
and Y wasschide, and Y se. Therfor summe of the Fariseis
seiden, This man is not of God, that kepith not the
sabat. Othere men seiden, Hou may a synful man do
these signes. And strijf was among hem. Therfor thei
seien eftsoone to the blynd man, What seist thou of hym,
that openyde thin i+gen? And he seide, That he is a 
prophete. Therfor Jewis bileueden not of hym, that he
was blynd, and hadde seyn, til thei clepiden his fadir and
modir, that hadde seyn. And thei axiden hem, and seiden,
Is this +goure sone, which +ge seien was borun blynd? hou
thanne seeth he now? 
<P IX,20>
His fadir and modir answeriden
to hem, and seiden, We witen, that this is oure sone, and
that he was borun blynd; but hou he seeth now, we witen
neuer, or who openyde hise i+gen, we witen nere; axe +ge
hym, he hath age, speke he of hym silf. His fader and
modir seiden these thingis, for thei dredden the Jewis;
for thanne the Jewis hadden conspirid, that if ony man
knoulechide hym Crist, he schulde be don out of the
synagoge. Therfor his fadir and modir seiden, That he
hath age, axe +ge hym. Therfor eftsoone thei clepiden
the man, that was blynd, and seiden to hym, +Gyue thou
glorie to God; we witen, that this man is a synnere.
Thanne he seide, If he is a synnere, Y woot neuer; o
thing Y woot, that whanne Y was blynd, now Y se. Therfor
thei seiden to hym, What dide he to thee? hou openyde
he thin i+gen? He answerde to hem, Y seide to +gou now,
and +ge herden; what wolen +ge eftsoone here? whether +ge
wolen be maad hise discyplis? Therfor thei cursiden hym,
and seiden, Be thou his disciple; we ben disciplis of Moises.
We witen, that God spak to Moises; but we knowen not
this, of whennus he is. Thilke man answeride, and seide
to hem, For in this is a wondurful thing, that +ge witen not,
of whennus he is, and he hath openyd myn i+gen. And we
witen, that God herith not synful men, but if ony man is
worschypere of God, and doith his wille, he herith hym.
Fro the world it is not herd, that ony man openyde the
i+gen of a blynd borun man; but this were of God, he my+gt
not do ony thing. Thei answeriden, and seiden to hym,
Thou art al borun in synnes, and techist thou vs? And
thei putten hym out. Jhesus herd, that thei hadden putte
hym out; and whanne he hadde founde hym, he seide to
hym, Bileuest thou in the sone of God? He answerde,
and seide, Lord, who is he, that Y bileue in hym? And
Jhesus seide to hym, And thou hast seyn him, and he it
is, that spekith with thee. And he seide, Lord, Y byleue.
And he felle doun, and worschipide hym. Therfor Jhesus
seide to hym, Y cam in to this world, in to doom, that thei
that seen not, see, and thei that seen, be maad blynde. 
<P IX,40>
And summe of the Faryseis herden, that weren with hym, and
thei seiden to hym, Whether we ben blynde? Jhesus seide
to hem, If +ge weren blynde, +ge schulden not haue synne;
but now +ge seien, That we seen, +goure synne dwellith stille.

<P X,1>
[}CAP. X.}]

   Treuli, treuli, Y seie to +gou, he that cometh not in by
the dore in to the foold of scheep, but stieth bi another
weie, is a ny+gt theef and a dai theef. But he that entrith
bi the dore, is the scheepherde of the scheep. To this
the porter openeth, and the scheep heren his vois, and he
clepith his owne scheep bi name, and ledith hem out. And
whanne he hath don out his owne scheep, he goith bifor
hem, and the scheep suen hym; for thei knowun his vois.
But thei suen not an alien, but fleen from hym; for thei
han not knowun the vois of aliens. Jhesus seide to hem
this prouerbe; but thei knewen not what he spak to hem.
Therfor Jhesus seide to hem eftsoone, Treuli, treuli, Y
seie to +gou, that Y am the dore of the scheep. As many
as han come, weren ny+gt theues and dai theues, but the
scheep herden not hem. Y am the dore. If ony man
schal entre bi me, he schal be sauyd; and he schal go
ynne, and schal go out, and he schal fynde lesewis. A
ny+gt theef cometh not, but that he stele, sle, and leese;
and Y cam, that thei han lijf, and haue more plenteousli.
I am a good scheepherde; a good scheepherde +gyueth
his lijf for hise scheep. But an hirid hyne, and that is
not the scheepherde, whos ben not the scheep his owne,
seeth a wolf comynge, and he leeueth the scheep, and
fleeth; and the wolf rauyschith, and disparplith the scheep.
And the hirid hyne fleeth, for he is an hirid hyne, and it
parteyneth not to hym of the scheep. Y am a good 
scheepherde, and Y knowe my scheep, and my scheep
knowen me. As the fadir hath knowun me, Y knowe
the fadir; and Y putte my lijf for my scheep. Y haue
othere scheep, that ben not of this foolde, and it bihoueth
me to brynge hem togidir, and thei schulen here my vois;
and it schal be maad o foolde and o scheepherde. Therfor
the fadir loueth me, for Y putte my lijf, that eftsoone Y
take it. No man takith it fro me, but Y putte it of my
silf. Y haue power to putte it, and Y haue power to take
it a+gen. This maundement Y haue takun of my fadir.
Eft dissencioun was maad among the Jewis for these wordis.
<P X,20>
And many of hem seiden, He hath a deuel, and maddith;
what heren +ge hym? Othere men seiden, These wordis
ben not of (^a man^) that hath a feend. Whether the deuel
may opene the i+gen of blynde men? But the feestis of
halewyng of the temple weren maad in Jerusalem, and
it was wyntir. And Jhesus walkide in the temple, in the
porche of Salomon. Therfor the Jewis camen aboute
hym, and seiden to hym, Hou long takist thou awei oure
soule? if thou art Crist, seie thou to vs opynli. Jhesus
answerde to hem, Y speke to +gou, and +ge bileuen not;
the werkis that Y do in the name of my fadir, beren witnessyng
of me. But +ge bileuen not, for +ge ben not of my
scheep. My scheep heren my vois, and Y knowe hem,
and thei suen me. And Y +gyue to hem euerelastynge
lijf, and thei schulen not perische with outen ende, and
noon schal rauysche hem fro myn hoond. That thing
that my fadir +gaf to me, is more than alle thingis; and no
man may rauysche fro my fadris hoond. Y and the fadir
ben oon. The Jewis token vp stoonys, to stoone hym.
Jhesus answerde to hem, Y haue schewide to +gou  many
good werkis of my fadir, for which werk of hem stonen
+ge me? The Jewis answerden to hym, We stoonen thee
not of good werk, but of blasfemye, and for thou, sithen
thou art a man, makist thi silf God. Jhesus answerde to
hem, Whether it is not writun in +goure lawe, That Y seide,
+Ge ben goddis? Yf he seide that thei weren goddis, to
whiche the word of God was maad, and scripture may not
be vndon, thilke that the fadir hath halewid, and hath
sent in to the world, +ge seien, That thou blasfemest, for
Y seide, Y am Goddis sone? Yf Y do not the werkis
of my fadir, nyle +ge bileue to me; but if Y do, thou+g +ge
wolen not bileue to me, bileue +ge to the werkis; that +ge
knowe and bileue, that the fadir is in me, and Y in the fadir.
Therfor thei sou+gten to take hym, and he wente out of her
hondis. 
<P XI,40>
And he wente eftsoone ouer Jordan, in to that
place where Joon was firste baptisynge, and he dwelte there.
And manye camen to hym, and seiden, For Joon dide no
myracle; and alle thingis what euer Joon seide of this,
weren sothe. And many bileueden in hym.

<P XI,1>
[}CAP. XI.}]

   And ther was a sijk man, Lazarus of Bethanye, of the
castel of Maria and Martha, hise sistris. And it was Marye,
which anoyntide the Lord with oynement, and wipte hise
feet with hir heeris, whos brother Lazarus was sijk. Therfor
hise sistris senten to hym, and seide, Lord, lo! he whom  
thou louest, is sijk. And Jhesus herde, and seide to hem,
This syknesse is not to the deth, but for the glorie of God,
that mannus sone be glorified bi hym. And Jhesus louyde
Martha, and hir sistir Marie, and Lazarus. Therfor whanne
Jhesus herde, that he was sijk, thanne he dwellide in the
same place twei daies. And after these thingis he seide to
hise disciplis, Go we eft in to Judee. The disciplis seien
to hym, Maister, now the Jewis sou+gten for to stoone thee,
and eft goist thou thidir? Jhesus answerde, Whether ther
ben not twelue ouris of the dai? If ony man wandre in
the dai, he hirtith not, for he seeth the li+gt of this world.
But if he wandre in the ni+gt, he stomblith, for li+gt is not
in him. He seith these thingis, and aftir these thingis he
seith to hem, Lazarus, oure freend, slepith, but Y go to
reise hym fro sleep. Therfor hise disciplis seiden, Lord,
if he slepith, he schal be saaf. But Jhesus hadde seid of
his deth; but thei gessiden, that he seide of slepyng of
sleep. Thanne therfor Jhesus seide to hem opynli, Lazarus
is deed; and Y haue ioye for +gou, that +ge bileue, for Y was
not there; but go we to hym. Therfor Thomas, that is 
seid Didymus, seide to euen disciplis, Go we also, that we
dien with hym. And so Jhesus cam, and foond hym hauynge
thanne foure daies in the graue. And Bethany was bisidis
Jerusalem, as it were fiftene furlongis. And many of the
Jewis camen to Mary and Martha, to coumforte hem of her
brothir. 
<P XI,20>
Therfor as Martha herde, that Jhesu cam, sche
ran to hym; but Mary sat at home. Therfor Martha seide
to Jhesu, Lord, if thou haddist be here, my brother hadde
not be deed. But now Y woot, that what euere thingis
thou schalt axe of God, God schal +gyue to thee. Jhesus
seith to hir, Thi brother schal rise a+gen. Martha seith to
hym, Y woot, that he schal rise a+gen in the a+gen risyng in
the laste dai. Jhesus seith to hir, Y am a+gen risyng and lijf;
he that bileueth in me, +ghe, thou+g he be deed, he schal lyue;
and ech that lyueth, and bileueth in me, schal not die with
outen ende. Bileuest thou this thing? Sche seith to hym,
+Ge, Lord, Y haue bileued, that thou art Crist, the sone of
the lyuynge God, that hast come in to this world. And
whanne sche hadde seid this thing, sche wente, and clepide
Marie, hir sistir, in silence, and seide, The maister cometh,
and clepith thee. Sche, as sche herd, aroos anoon, and cam
to hym. And Jhesus cam not +git in to the castel, but he
was +git in that place, where Martha hadde comun a+gens hym.
Therfor the Jewis that weren with hir in the hous, and
coumfortiden hir, whanne thei sayn Marie, that sche roos
swithe, and wente out, thei sueden hir, and seiden, For
sche goith to the graue, to wepe there. But whanne Marie
was comun where Jhesus was, sche seynge hym felde doun
to his feet, and seide to hym, Lord, if thou haddist be
here, my brother hadde not be deed. And therfor whanne
Jhesu sai+g hir wepyng, and the Jewis wepynge that weren
with hir, he made noise in spirit, and troblide hym silf,
and seide, Where han +ge leid hym? Thei seien to hym,
Lord, come and se. And Jhesus wepte. Therfor the
Jewis seiden, Lo! hou he louede hym. And summe of hem
seiden, Whethir this (^man^) that openyde the i+gen of the      #
borun
blynde (^man^) , my+gte not make that this schulde not die?
Therfor Jhesus eft makynge noise in hym silf, cam to the
graue. And there was a denne, and a stoon was leid
theronne. And Jhesus seith, Take +ge awey the stoon.
Martha, the sistir of hym that was deed, seith to hym, Lord,
he stynkith now, for he hath leye foure daies. 
<P XI,40>
Jhesus seith
to hir, Haue Y not seid to thee, that if thou bileuest, thou
schalt se the glorie of God? Therfor thei token awei the
stoon. And Jhesus lifte vp hise i+gen, and seide, Fadir, Y
do thankyngis to thee, for thou hast herd me; and Y wiste,
that thou euermore herist me, but for the puple that stondith
aboute, Y seide, that thei bileue, that thou hast sent me.
Whanne he hadde seid these thingis, he criede with a greet
vois, Lazarus, come thou forth. And anoon he that was
deed, came out, boundun the hondis and feet with boondis,  
and his face boundun with a sudarie. And Jhesus seith
to hem, Vnbynde +ge hym, and suffre +ge hym to go forth.
Therfor many of the Jewis that camen to Marie and Martha,
and seyn what thingis Jhesus dide, bileueden in hym. But
summe of hem wente to the Farisees, and seiden to hem,
what thingis Jhesus hadde don. Therfor the bischopis and
the Farisees gadriden a counsel a+gens Jhesu, and seiden,
What do we? for this man doith many myraclis. If we
leeue hym thus, alle men schulen bileue in hym; and
Romayns schulen come, and schulen take our place and
oure folk. But oon of hem, Cayfas bi name, whanne he
was bischop of that +geer, seide to hem, +Ge witen nothing,
ne thenken, that it spedith to +gou, that o man die for the
puple, and that al the folc perische not. But he seide not
this thing to hym silf, but whanne he was bischop of that
+geer, he prophesiede, that Jhesu was to die for the folc,
and not oneli for the folc, but that he schulde gadere in
to oon the sones of God that weren scaterid. Therfor
fro that dai thei sou+gten for to sle hym. Therfor Jhesus
walkide not thanne opynli among the Jewis; but he wente
in to a cuntre bisidis desert, in to a citee, that is seid      #
Effren,
and there he dwellide with hise disciplis. And the pask of
the Jewis was ni+g, and many of the cuntrey wenten vp to
Jerusalem bifor the pask, to halewe hem silf. Therfor
thei sou+gten Jhesu, and spaken togidere, stondynge in the
temple, What gessen +ge, for he cometh not to the feeste day?
For the bischopis and Farisees hadden +gouun a maundement,
that if ony man knowe where he is, that he schewe, that thei
take hym.



