<B CMSAWLES>
<Q M1 IR HOM SWARD>
<N SWARD>
<A X>
<C M1>
<O 1150-1250>
<M 1150-1250>
<K CONTEMP>
<D WMO>
<V PROSE>
<T HOMILY>
<G X>
<F X>
<W WRITTEN>
<X X>
<Y X>
<H X>
<U X>
<E X>
<J X>
<I X>
<Z INSTR REL>
<S SAMPLE X>


[^TEXT:  SAWLES WARDE.
THE KATHERINE GROUP.
EDITED FROM MS. BODLEY 34.
BIBLIOTHEQUE DE LA FACULTE DE PHILOSOPHIE
ET LETTRES DE L'UNIVERSITE DE LIEGE, CCXV.
ED. S. T. R. O. D'ARDENNE.
PARIS: SOCIETE D'EDITION "LES BELLES
LETTRES", 1977.
PP. 165.20 - 183.24^]

<P 165>
I +te feaderes. ant i +te sunes. & i +te hali
gastes Nome
her bigine+d; sawles warde.
   (\Si sciret paterfamilias qua hora fur uenturus esset;
vigilaret utique & non sineret perfodi domum suam.\)
<P 166>
Ure lauerd i +te godspel teache+d us +turh a bisne. hu we
ahen wearliche to biwiten us-seoluen wi+d +te unwiht
of helle. & wi+t his wernches. +gef +tes lauerd wiste he        #
sei+d. 
hwenne & hwuch time. +te +teof walde cume to his
hus; he walde wakien. ne nalde he nawt +tolien +te +teof
forte breoken hire. +tis hus +te ure lauer+d speke+d of;
is seolf +te mon inwi+d +te monnes wit. I +tis hus. is +te
huse-lauerd. Ant te fulitohe wif; mei beon wil ihaten. 
+tt ga +te hus efter hire; ha diht hit al to wundre.
bute wit ase lauerd chasti hire +te betere. & bineome
hire muchel of +tt ha walde. ant tah walde al hire hird
folhin hire ouer-al; gef wit ne forbude ham. for
alle hit beo+d untohene. & rechelese hinen; bute +gef
he ham rihte. Ant hwucche beo+d +teos hinen; Summe
beo+d wi+d-vten. & summe wi+d-innen. +teo wi+d-vten beo+d.
+te monnes fif wittes. Sih+de. & herunge. smechunge.
& smeallunge. & euch limes felunge. +teos beo+d 
hinen vnder wit. as under huse-lauerd. & hwer-se he is
+gemeles; nis hare nan +te ne feare+d ofte untoheliche.
& gulte+d ilome. o+der i fol semblant; oder in vuel
dede. In-wi+d beo+d his hinen. in se moni mislich
+tonc to cwemen wel +te husewif; a+gein godes wille.
& swerie+d somet-rea+dliche; +tt efter hire hit schal
<P 167>
gan. +tah we hit ne here nawt; we mahen hare
nur+d. & hare untohe bere. a-+tet hit
cume for+d. & ba wi+d eie. & wi+d luue tuhte
ham +te betere. Ne bi+d neauer his hus for +teos hinen
wel iwist. for hwon +tt he slepe. o+der ohwider
from hame. +tt is hwen mon for-+get his
wit. & let ham iwur+den. ah ne bihoue+d hit nawt.
+tt tis hus beo irobbet. for +ter is inne +te tre
+tt godd +gef him-seolf fore. +tt is monnes sawle. forte
breoke +tis hus efter +tis tresor. +tt godd bohte
mid his dea+d. & lette lif o rode; is Moni +teof
abuten ba bi dei & bi niht. vnseheliche gasttes
wi+d alle unwreaste +teawes. & a+gein euch
god +teaw. +te biwite+d i +tis hus godes deore castel.
vnder wittes wissunge +tt is huse-lauerd. is eauer
hire un+teaw forte sechen in-+gong abute +te wahes
to a-mur+drin hire +trinne. +tt heaued +trof
is +te feont. +te meistre+d ham alle a+geines him
& his keis. +te husebonde +tt is wit; warne+d his
hus +tus. Vre lauerd haue+d ileanet him froure of
<P 168>
his dehtren. +tt beo+d to vnderstonden +te fowr
heaued-+teawes. +te earste is warschipe icleopet.
ant te o+ter is ihaten gastelich streng+de. &
te +tridde is mea+d. riht-wisnesse +te feor+de.
Wit +te husbonde godes cunestable cleope+d warschipe
for+d. & makid hire durewart. +te warlic
he loki hwam ha leote in & ut. & of feor bihalde
alle +te cuminde. hwuch beo wur+de in+gong 
to habben; o+der beon bisteken +trute. Streng+de
stont nest hire +tt +gef ei wule in; warschipes vn+tonkes.
warni streng+de fore. +tt is hire suster; &
heo hit ut warpe. +te +tridde suster +tt is mea+d. hire
he make+d meistre ouer his willesfule hir+d +tt we
ear of speken. +tt ha leare ham mete. +tt me meosure
hat. +te middel of twa uueles. for +tt is +teaw in
euch stude & tuht forte halden. & hate+d ham
alle +tt nan of ham a+gein hire; nohwer wid vnmea+d;
ne ga ouer mete. +te feor+de suster rihtwisnesse.
sit on hest as deme, & beate+d +teo +te a+gulte+d.
& crune+d +teo +te wel do+d. & deme+d euchan
his dom efter his rihte. fordret of hire nime+d
<P 169>
his hir+d euch efter +tt he is warde to witene. +te
ehnen hare. +te mu+d his. +te earen hare. +te
honden hare. & euch alswa of +te o+tre wit +tt onont
him ne schal nan un+teaw cumen in.
   As +tis is ido +tus. & is al stille +trinne; warschipe 
+tt aa is waker is offearet lest sum fortruste
him. & feole o slepe. & for+geme his warde.
& sent ham. in a sonde. +tt ha wel cnawe+d. of
feorren icumen. forte offearen +teo +te beo+d
ouerhardi. & +teo +te +gemelese beo+d; halden ham
wakere. he is underuon in. & swi+de bihalden of ham
alle. for lonc he is. & leane. & his leor dea+dlich.
& blac & elheowet. & euch her +tunche+d
+tt stont in his heaued up; warschipe hat him
tellen biuoren hwet he beo & hweonene he comme
& hwet he +ter seche. Ne mei ich ne sei+d. nohwer
speoken. bute ich habbe god lust; lustni+d
me +tenne. Fearlac ich hatte. ant am dea+des sonde.
& dea+des munegunge. & am icumen biuore
hire to warnin ow of hire cume. warschipe
+tt best con bisetten hire wordes. & ec hire
werkes; speke+d for ham alle. & freine+d hweonene
he cume. & hwuch hird ha leade. fearlac
<P 170>
hire ontswere+d. Ich nat nawt +te time; for ha ne
seide hit me nawt. ah eauer loki+d hwenne. for hire
wune is to cumen bi stale ferliche & unmundlunge
hwen me least wene+d. of hire hird
+tt tu easkest. Ich +te ondswerie. ha lihte+d hwer
se ha eauer kime+d wi+d a +tusent deoflen. & euch
an bere+d a gret boc al of sunnen iwriten
wi+d swarte smeale leattres. & an unrude raketehe
gled-read of fure. forte binden & to
drahen in-to in-warde helle. hwuch-se he mei preouin
+turh his boc +tt is on euch sunne enbreuet;
+tt he wi+d wil. o+der wi+d word. o+der wi+d werc.
wrahtte in al his lif-si+de. bute +tt he haue+d i-bet
ear+ton wi+d so+d schrift. & wi+d deadbote. ant warschipe
hire easke+d. Hweonene cumest tu fearlac
dea+des munegunge. Ich cume he sei+d of helle. Of
helle ha sei+d warschipe. & hauest tu isehen helle?
   +Ge sei+d fearlac witerliche. ofte & ilome. Nu sei+d
+tenne warschipe. for+ti trow+t treoweliche tele us
hwuch is helle. & hwet tu hauest isehen +trin. Ant
ich he sei+d fearlac o mi trow+de blu+deliche. nawt tah
efter +tt hit is. for +tt ne mei na tunge tellen. ah efter +tt  #
ich
mei & con; +ter toward ich chulle reodien.
<P 171>
   Helle is wi+d-ute met. & deop wi+d-ute grunde. ful of
brune uneuenlich. for ne mei nan eor+dlich fur
euenin +ter towart. ful of stench un+tolelich. for ne
mahte in eor+de na cwic +ting. hit +tolien. ful of sorhe
untalelich. for ne mei na mu+d for wrecchedom ne for
wa; rikenin hit ne tellen. Se +ticke is +trinne +te             #
+tosternesse;
+tt me hire mei grapin. for +tt fur. ne +geue+d
na liht. ah blent ham +te ehnen. +te +ter beo+d
wi+d a smor+drinde smoke smeche forcu+dest. & tah
i +tt ilke swarte +teosternesse swarte +tinges ha iseo+d
as deoflen +tt ham mealli+d & derue+d aa & drecche+d
wi+d alles cunnes pinen. & iteilede draken grisliche
ase deoflen +te forswolhe+d ham ihal. & speowe+d ham
eft ut biuoren & bihinden. o+der hwile torende+d
ham & to-cheowe+d ham euch greot. ant heo
eft iwur+de+d hal. to a swuch bale bute bote as ha
ear weren. Ant ful wel ha i-seo+d ham to grisle &
to grure. & to echen hare pine. +te la+de helle wurmes.
<P 172>
tadden & froggen. +te freote+d ham ut
to ehnen. & te nease gristles. Ant snike+d in. & ut
neddren. & eauroskes. nawt ilich +teose her; ah
hundret si+de grisluker et mu+d. & et earen. ed ehnen.
& ed neauele. Ant ed te breoste holke as mea+den
i forrotet flesch eauer+gete +tickest. +ter is remunge
i +te brune. to+des hechelunge i +te snawi weattres.
ferliche ha flutte+d from +te heate; into +te chele.
Ne neauer nuten ha of +teos twa; hwe+der ham +tunche+d
wurse. for ei+der is un+tolelich. ant i +tis ferliche
mong +te leatere +turh +te earre derue+d +te mare,
+tt fur ham forbearne+d al to colen calde. +tt pich ham
forwalle+d a +det ha beon for-mealte. & eft acwikie+d
anan to drehen al +tt ilke; ant muchedeale
wurse a wi+d-uten ende. Ant til ilke unhope is
ham meast pine. +tt nan naue+d neauer mare hope
of nan a couerunge. Ah aren sikere of euch uuel
to +turh leasten i wa from world in-to worlde aa on
echnesse. Euch a+trusme+d o+der. & euch is o+dres pine.
Ant euchan heate+d o+der. & him-seoluen as
+te blake deouel. & eauer se ha i +tis world luuede ham
mare; se ha heatie+d ham swi+dere. & ei+der
<P 173>
curse+d o+der. & fret of o+dres earen. & te nease
alswa. Ich habbe bigunne to tellen of +ting +tt ich
ne mahte nawt bringe to eni ende. +tah ich hefde
a +tusent tungen of stele & talde a +det ha weren
alle forwerede. Ah +tenche+d nu her +turh hwuch +te
measte pine beo; for +te leaste pine is se heard +tt
hefde a mon islein ba mi feader. & mi moder ant al
+te ende of mi cun. & ido me seoluen al +te scheome
& te hearm +tt cwic mon mahte +tolien. & ich isehe
+tes mon i +te ilke leaste pine. +tt ich iseh in helle; Ich
walde +gef hit mahte beon. +tolien a +tusent dea+des
to a-rudden him ut +trof. swa is +te sih+de grislich &
reow+dful to bihalden. for +tah neauer nere man o+der
pine bute to iseon eauer +te unseli gastes. & hare grisliche
schape. biseon on hare grimfule. & grurefule  
nebbes. & heren hare rarunge. & hu ha wi+d hokeres
edwite+d & up-breide+d euchan his sunnen. +tis schen+dlac
& te grure of ham were unimete pine; & hure
+tolien & abeoren hare unirude duntes wi+d mealles
istelet. & wi+d hare eawles gled-reade hare dustlunges.
as +tah hit were a pilche-clut euchan towart
o+der i misliche pinen. O helle dea+des hus. wununge
of wanunge. of grure ant of granunge. heatel
ham. & heard wan. of alle wontrea+des. buri of bale.
& bold of eauer-euch bitternesse. +tu la+dest lont 
of alle. +tu dorc stude ifullet of alle dreorinesses.
<P 174>
Ich cwakie of grisle & of grure. & euch ban scheke+d
me. & euch her me rue+d up of +ti munegunge.
for nis +ter na steuene bituhhe +te fordemde bute
wumme. & wa is me. & wa beo +te. & wa beo +te. wa ha +geie+d.
& wa ha habbe+d ne of al +tt eauer wa is; ne schal ham
neauer wontin. +te swuch wununge ofearne+d. for ei
hwilinde blisse her o +tisse worlde; wel were him +gef
+tt he neauer ibore nere. bi +tis +ge mahen sumdel witen
hwuch is helle. for iwis ich habbe +trin isehen a +tusent
si+de wurse. & from +teonne kime+d dea+d wi+d a +tusent
deoflen hiderwart as ich seide. ant ich com +tus q+d fearlac
forte warnin ow fore; & tellen ow +teos tidinges.
   Nv lauerd godd q+d warschipe wardi us & werie. & rihte
us & reade hwet us beo to donne: Ant we beon +te
warre & wakere to witen us on euch half under
godes wengen. +gef we wel werie+d & wite+d ure hus &
godes deore tresor +tt he haue+d bitaht us; cume dea+d
hwen he wule. Ne +turue we now+der beon ofdred for
hire. ne for helle. for ure dea+d bi+d deore godd & in+gong
in-to heouene. of +teos fikelinde world; ne of
hire false blisse: ne neome we neauer +geme. for al +tt
is on eor+de. nis. bute as a schadewe; for al wur+de+d
<P 175>
to noht bute +tt deore tresor godes deorewur+de feh +tt
is us bitaht to witene. Ich habbe +teruore sar care
for ich iseo sei+d warschipe hu +te unwhiht wi+d his  
ferd ase liun iburst. +gea+d abuten ure hus sechinde
+geornliche hu he hit forswolhe. & tis ich mei
sei+d warschipe warnin ow his la+d & for his wrenches.
ah ich ne mei nawt a+geines his streng+de.
   Do nu q+d streng+de. warschipe suster +tt te limpet to +te
& warne us of his wiheles. for of al his streng+de
ne drede we nawiht. for nis his streng+de noht wur+d
bute hwer-se he ifinde+d e+deliche. & wake unwarnede
of treowe bileaue. +te apostle sei+d. Etstont. +ten feont.
& he fli+d anan-riht. schulde we +tenne fleon him? +ge
nis godd ure scheld. & alle beo+d ure wepnen of his deore 
grace. ant godd is on ure half. & stont bi us ifehte.
+gef he schute towart me wi+d weole & wunne of +te world.
wi+d este of flesches lustes. of +tulliche nesche wepnen
ich mahte carien summes weis. ah ne mei me
na +ting heardes offearen. ne nowcin. ne na wone
falsi min heorte ne wursi mi bileaue towart him
+tt +geue+d me alle mine streng+den.
   For ba meh ah. q+d mea+d. ant for heart of nowcin.
& for wone of wunne dreden. & carien. for moni for
to muchel heard of wa +tt he drehe+d. for+get ure lauerd.
ant ma +tah for nesche ant for flesches licunge for
+geme+d ham ofte. bituhhen heard & nesche. bituhhe
wa of +tis world ant to muche wunne. bituhhe
<P 176>
muchel & lutel is in euch worldlich +ting +te middel
wei guldene. +gef we hire halde+d +tenne ga we sikerliche 
ne +terf us now+der for dea+d ne for deouel dreden.
hwet-se beo of heardes ne drede ich nawiht nesches
for ne mei na wunne. ne na flesches licunge
ne licomlich este bringe me ouer +te midel of mesure. 
& of mete.
   Rihtwissnesse speke+d nu. Mi suster ha sei+d warschipe
+te haue+d wit. & schad bituhhe god. & uuel. &
wat hwet is in euch +ting to cheosen & to schunien;
reade+d us & leare+d forte +geme lutel alle
fallinde +ting. & witen warliche +teo +te schulen a
lesten. & sei+d as ha so+d sei+d +tt +turh unweotenesse.
ne mei ha nawt sunegin. & tah nis nawt siker of
+te unwihtes strengde as +teo +te halt hire wac +tah
ha beo muche wur+d & ure alre ehnen deme+d hire
unmihti onont hire-seoluen to etstonden wi+d his
turnes & de+d ase +te wise. Mi suster streng+de is swi+de
bald. & sei+d +tt nawiht heardes ne mei hire offearen.
ah +tah ha ne trust nawt on hire ahne wepnen;
ah de+d o godes grace & +tt ich demi riht & wisdom
to donne. Mi +tridde suster. mea+d speke+d of middel
sti. bituhhe riht & luft +tt lut cunnen halden.
<P 177>
& sei+d i nesche ha is bald. & heard mei hire offearen.
& for-+ti ne +gelpe+d ha of na sikernesse ant de+d as +te
wise. Mi meoster is to do riht forte demen ant
ich deme me-seolf +tt ich me do hit nawt;
for al +tt god is of godd +tt we her habbe+d. Nu is riht
+tenne +tt we demen us-seolf eauer unmihtie to werien
& to witen us o+der ei god to halden wi+d-ute godes
helpe. +te rihtwise godd wule +tt we demen us-seolf
e+deliche & lahe. Ne beo we neauer swucche; for +tenne
deme+d he us muche wur+d & gode ant halt for his
dehtren. for +tah mi forme suster war beo of euch
uuel; ant min o+der strong beo to-+geines euch
nowcin; ant mi +tridde mea+dful in alles cunnes
estes; & ich do riht & deme. bute we wi+d al +tis milde
beon & meoke; & halden us wake. godd mei
mid rihte fordemen us of al +tis +turh ure prude.
ant for-+ti is riht dom +tet we al ure god +tonkin
him ane. Wit +te husebonde godes cunestable
here+d alle hare sahen & +tonke+d god +georne wi+d
swi+de glead heorte of se riche lane as beo+d +teos sustren
his fowr dehtren +tt he haue+d ileanet him on
helpe forte wite wel & werien his castel. & godes deorewur+de
feh. +tt is biloke +trinne.
   +Te willesfule husewif halt hire al stille. ant al +tt
hird +tt ha wes i-wunet to dreaien efter hire; turne+d
<P 178>
ham treowliliche to wit hare lauerd. & to +teos
fowr sustren. Vmben ane stunde speke+d eft
warschipe. & sei+d ich iseo a sonde cumen swide gledd-icheret
feier & freolich & leofliche aturnet
let him in sei+d wit +gef godd wule he bringe+d 
us gleade tidinges. ant +tt us were muche
neod. for fearlac dea+des sonde haue+d wi+d his;
offearet us swi+de mid alle. warschipe let him in.
& he gret wit +ten lauerd. & al +tt hird seo+den. wi+d lahhinde
chere. ant ha +gelde+d him his gretunge. &
beo+d alle ilihtet & igleadet ham +tunche+d of his onsih+de.
for al +tt hus schine+d. & schimme+d of his leome.
he easke+d ham +gef ham biluue+d to heren him
ane hwile. +ge q+d ha rihtwisnesse. wel us biluue+d
hit. & wel is riht +tt we +te li+deliche lustnin.
   Hercni+d nu +tenne he sei+d. & +geornliche understonde+d.
ch am mur+des sonde. & munegunge of eche lif.
ant liues luue ihaten & cume riht from heouene
+tt ich habbe isehen nu ant ofte ear +te blisse +tt na
monnes tunge ne mei of tellen. +te iblescede godd
iseh ow offruhte. & sumdel drupnin of +tt fearlac
talde of dea+d. & of helle. ant sende me to gleadien
ow. nawt for+ti +tt hit ne beo al so+d +tt he seide. & +tt
schulen alle uuele fondin. & ifinden. Ah +ge wi+d +te
fulst of godd ne +turue na +ting dreden for he sit on
<P 179>
heh +tt is ow on helpe. & is al-wealdent +tt haue+d ow to       #
witene.
   A sei+d warshipe welcume liues
luue. ant for +te luue of godd seolf +gef +tu eauer
sehe him: tele us sumhwet of him. & of
his eche blisse. +ge iseo+d q+d liues luue; Murhdes
sonde. Ich habbe isehen him ofte nawt
tah alswa as he is; for a+gein +te brihtnesse
& te liht of his leor. +te sunne-gleam is dosc & +tunche+d
a schadewe. ant for-+ti ne mahte ich nawt
a+gein +te leome of his wlite lokin ne bihalden;
bute +turh a schene schawere bituhhe me & him
+tt schilde mine ehnen. Swa ich habbe ofte
isehen +te hali +trumnesse. feader & sune. & hali gast.
+treo an unto-dealet. ah lutle hwile ich mahte +tolie
+te leome. ah summes weis ich mahte bihalden ure
lauerd iesu crist godes sune +tt bohte us o rode. hu he
sit blisful on his feader riht-half +tt is al-wealdent
rixle+d i +tt eche lif bute linnunge. se unimete feier:
+tt te engles ne beo+d neauer ful on him to bihalden.
ant +get ich iseh etscene +te studen of his wunden.
& hu he schawe+d ham his feader to cu+den hu he
luuede us & hu he wes buhsum to him +te sende him
swa to alesen us & biseche+d him a for moncunnes heale.
   Efter him ich iseh on heh ouer alle heouenliche +te
eadi meiden his moder marie inempnet sitten in
<P 180>
a trone se si+de briht wid +gimmes i-stirret. & hire
wlite se weoleful; +tt euch eor+dlich liht; is +teoster
+te a-+geines. +tear ich iseh as ha bit hire deorewur+de
sune se +geornliche. & se inwardliche for +teo +tt
hire serui+d. & he hire +gette+d blideliche al +tt ha           #
biseche+d.
   +Tet liht +ta ich ne mahte lengre
+tolien; Ich biseh to +te engles & to +te archangles
ant to +te o+dre; +te beo+d buuen ham. iblescede gastes
+te beo+d a biuore godd & serui+d him eauer. & singe+d
a unwerget. Nihe wordes +ter beo+d. ah hu ha
ha beo+d i-ordret & sunderliche isette. +te an buue
+te o+dre. & euchanes meoster were long to tellen.
Se muche murh+de ich hefde on hare on-sih+de; +tt
ne mahte ich longe while elles-hwider lokin. 
   Efter ham ich iseh towart te patriarches. & te prophetes
+te makied swuch murh+de +tt ha aren nu+de i +tt
ilke lont of blisse +tt ha hefden of feor igret ear
on eor+de & seo+d nu al +tt iso+det. +tt ha hefden longe
ear icwiddet of ure lauerd as he hefde iscawed ham
i gastelich sih+de. Ich iseh +te apostles poure. &
lah on eor+de. ifullet & bigoten al of unimete
<P 181>
blisse sitten i trones. ant al under hare uet +tt
heh is i +te worlde. +garowe forte demen i +te dei of
dome kinges & keiseres. & alle cunreadnes of
alles cunnes ledenes.
   Ich biheolt te Martyrs. & hare unimete murh+de
+te +toleden her pinen. & dea+d for ure lauerd. & lihtliche
talden to alles cunnes neowcins. & eor+dliche tintreohen.
a+geines +te blisse +tt godd in hare heorte schawede
ham to cumene.
   Efter ham ich biheolt +te cunfessurs hird +te liueden
i god lif. & haliche deiden. +te schine+d as do+d
steorren i +te eche blissen. & seo+d godd in his wlite
+tt haue+d alle teares iwipet of hare ehnen.
   Ich iseh +tt schene & +tt brihte ferreden of eadi meidnes
ilikest towart engles. ant feolahlukest wi+d
ham blissin & gleadien. +te libbinde i flesche ouerga+d
flesches lahe ant ouercume+d cunde +te leade+d heouenlich
lif in eor+de as ha wunie+d hare murh+de. & hare blisse.
+te feierleac of hare wlite. +te swetnesse of hare song;
ne mei na tunge tellen. Alle ha singe+d +te +ter beo+d.
Ah hare song ne mahe nane buten heo singen. Se
swote smeal ham folhe+d hwider-se ha wende+d. +tt me mahte 
libben aa bi +te swotnesse. hwam-se heo biseche+d fore;
is sikerliche iborhen. for a+gein hare bisocnen; godd
<P 182>
him-seolf arise+d +tt alle +te o+dre halhen sittende ihere+d.
   Swi+de wel q+d warschipe like+d us +tt tu seist. Ah nu +tu
hauest se wel iseid of euch-a setnesse; of +te seli
sunderlepes sumhwet sei us nu hwuch blisse is to
alle iliche meane; & liues luue hire ondswere+d.
   +Te imeane blisse is seouenfald. leng+de of lif. wit. &      #
luue.
& of +te luue a gleadunge. wi+d-ute met murie. loft
song. & lihtschipe. ant sikernesse. is +te seoue+de. +tah
ich +tis sei+d warschipe sumdel understonde; +tu most
unwreo +tis witerluker & openin to +teos o+dre. ant hit
schal beon sei+d liues luue warschipe as +tu wilnest.
   Ha liuie+d a in a wlite. +tt is brihtre seoueuald. & schenre
+ten +te sunne. ant eauer in a streng+de to don buten euch
swinc al +tt ha wulle+d. & eauer-mare in a steal in al +tt      #
eauer
god is wi+d-ute wonunge. wi+d-uten euch +ting +tt mahe
hearmin o+der eilin. in al +tt eauer is, softe o+der swote. &
hare lif is godes sih+de. & godes cnawlechunge as ure
lauerd seide. +tt is q+d he eche lif to seon & cnawen sod godd.
& him +tt he sende iesu crist ure lauerd to ure alesnesse &
beo+d for-+ti ilich him i +te ilke wlite +tt he is. for ha      #
seo+d
him as he is. nebbe to nebbe. Ha beo+d se wise +tt ha
witen alle godes reades. his runes & his domes +te derne
<P 183>
beo+d. & deopre +ten eni sea-dingle. ha seo+d i godd
alle +ting. & witen of al +tt & wes & eauer schal iwurden.
hwet hit beo. hwi. & hwerto & hwer-of hit bigunne.
   Ha luuie+d god wi+d-ute met. for +tt ha understonde+d hu
he haue+d bi ham idon +turh his muchele godlec &
hwet ha ahen his deorewurde milce to +gelden. ant euch
an luue+d o+der ase muchel as him-seoluen. 



